SPECIÂL BIBIE – Chei restâts fûr

Dal sigûr, par ducj chei che a tegnin a fuart al Friûl e la sô lenghe, al è stât un event epocâl. Une di chês robis che tu disis “o ai di jessi ancje jo”, che ti pâr che se tu mancjis alfin alc ti mancjarà a ti. Si fevele de leture publiche de Bibie, pardabon l’event dal an, par chel che al inten no dome la Glesie furlane, ma ancje e soredut la nestre lenghe.
Di bogns furlans, prudents e usâts a fâ simpri il pas daûr de gjambe, o sin partîts sperant intun sucès e in numars almancul “suficients”, juste di no riscjâ di fâ une buse te aghe. E a man a man che i dîs a lavin indenant, si è presentade la sorprese: tu fevelavis cuntun e cun chel altri e ve che – ce strani! – in tancj a vevin la tô stesse intenzion, in tancj ti disevin “lu vûl fâ ancje jo”, cui bessôl, cui cu la parochie, cui cu la scuadre di protezion civîl, e v.i. Par chel, la prime sorprese e je stade scuvierzi che la int e saveve, e la seconde che e condivideve il progjet.
La tierce sorprese invezit e je rivade subite daspò, dolce e amare tal stes timp: tal zîr di un mês, no jerin plui puescj a disposizion! Dolce, par vie dal esit tant fortunât di cheste iniziative, e amare par cui che nol jere rivât adore a jentrâ in chel numar, vâl a dî almancul un cinccent di lôr.
Cualchidun di chei, a àn dade distès la lôr disponibilitât tal câs di cualchi sostituzion necessarie al ultin moment, ma in chest câs si acetavin “candidaturis” dome di bande di cui che in massime 25, 30 minûts, al varès podût rivâ a Udin, li de Glesie de Puritât.
Cussì, a tancj ur è restade dome la consolazion di passâ pe Glesie a scoltâ lis leturis, o di lâ in Internet, là che in streaming si podeve viodi e sintî i letôrs, e in cualchi maniere almancul partecipâ cul pinsîr al event.
Si à dut câs di dî che al è stât un moment coletîf, pardabon di popul, li che la individualitât si è sfantade te coralitât e se ancje no si à rivât in ducj a partecipâ, il sintiment al jere chel de condivision di un moment cetant alt e impuartant, li che – cuntune metafore che nol vûl jessi iriverente – ancje lis risiervis in panchine a àn judât la scuadre a vê il cjâf plui seren e le àn sotignude cu la lôr poie e cu la lôr disponibilitât a jentrâ in zûc se al fos coventât.
Linda Picco