ATUALITÂT – Ancje Cividât e devente Patrimoni Mondiâl de Umanitât

La citât che e à dât il non al Friûl, “Forum Julii”, e je jentrade te liste dai sîts che a fasin part dal Patrimoni Mondiâl de Umanitât: lu à decidût la Unesco a Parîs ai 25 di Jugn, lant a zontâ il cjaflûc des valadis dal Nadison ae altre localitât furlane considerade un tesaur internazionâl, ven a stâi Aquilee. Si complete cussì il ricognossiment di dutis lis tradizions che a àn metût dongje la ereditât dal Friûl.
La prime e je chê aquileiese, che chi e à viodût a sflurî il Patriarcjât cu la sô Basiliche Mari, riferiment pe evangjelizazion di dute la Europe centrâl e prime lidrîs dal nestri popul. Ma di chê altre bande e je ancje une seconde tradizion, chê dai Langobarts: lu dimostre il fat che a chest impuartant travuart si è rivâts dome lant a metisi dongje cun altris sîs lûcs di Italie che a àn vût lidrîs langobardis: Brescia, Castelseprio e Gornate Olona (Varese), Spoleto e Campello sul Clitunno (Perugia), Benevento, Monte Sant’Angelo (Foggia).
Une buine sielte: Cividât cumò e podarà vê gnovis oportunitâts ancje adun cun chestis altris localitâts talianis. Ma cheste concuiste e je impuartante ancje dal pont di viste culturâl parcè che e ricognòs ancje un aspiet che al ven tasût des cronachis, ven a stâi il fat che i Langobarts no son dome impuartants pal Templi di Sante Marie in Val, pal Batisteri di Calist o pal Altâr di Ratchis. A son chei che a àn viert un gnûf troi inte storie dal Friûl. Il lôr domini al semene pe prime volte inte nestre storie une cussience dal particolarisim furlan, viodût che per prime volte i Duchis dal Friûl di Gjisulf in jù a costruissin un vêr o propri Stât autonim sul teritori dal Friûl. Al è cun lôr che “Forum Julii” e je passade di “municipium” a “Civitas”, deventant intai secui seguitîfs Cividât. Al è cetant impuartant duncje che il lôr lassit al vegni valorizât miôr che si pues, parcè che al è il cûr de nestre identitât. No a câs ancje i Patriarcjis, erêts ancje lôr di Aquilee ancje se plui in gracie di Sant Marc che di Cesar, muarte la “Sante Mari” dal Friûl a son colâts ancje lôr su Cividât. Un sît Patrimoni de Umanitât, ma soredut Patrimoni dai furlans che cumò ur tocje dâsi di fâ par tignîlu.
No dome Cividât
Ancje il sît protostoric di Palût de Livence, famôs pes palafitis preistorichis, al è deventât patrimoni mondiâl de Unesco.
Walter Tomada