La tutele linguistiche come risorse economiche

A pene alc di plui di doi milions di Euros par an par tutelâ la lenghe tes scuelis, tai mieçs di comunicazion, tes aministrazions publichis, tes manifestazions culturâls, tes ricercjis di imprescj inovatîfs par inzornâ la lenghe, come che al capite a dutis lis lenghis vivis. In sumis, par tutelâ la marilenghe, fâle cressi e lâ indenant cuntune serie politiche linguistiche, in 10 agns, dal 1996 al 2006, si à investît 21 milions 512 mil 118 Euros. Ce che il Gales al met an par an. Cun di plui dome il 16,6% di chei finanziaments a àn creât un lavôr stabil. Sù par jù il 50% al à sotignût lavôrs precaris. Chel altri 33,4% al à finanziât “spesis gjenerichis” di servizi o materiâi. Dut câs sul teritori a scomencin a nassi i prins servizis professionâi peâts ae marilenghe cence il diret contribût public.
LA RICERCJE_ E je cheste la fotografie che e je saltade fûr de ricercje “Efiets economics e ocupazionâi des leçs di tutele de lenghe furlane”, fate de cooperative Seerliing cun finanziaments regjonâi e presentade za fa cualchi zornade tal cjastiel di Colorêt, in colaborazion cun il Servizi identitât linguistiche regjonâl e il patrocini de Comunitât culinâr. Curade di Linda Picco e Alessandro Carrozzo, il studi oltri a meti subit in clâr la miserie dai bêçs publics e il lôr vignî al mancul ogni an che al passe, fale par chei dâts diretementri a lis scuelis, al à metût in lûs compuartaments che a varessin di mudâ par podê ufrî tant plui lavôr ancje cu la situazion di cumò. Secont i curadôrs de ricercje, cun di fat, “la ocupazion stabile e podarès almancul triplicâ”. Se cheste proporzion e reste basse, a àn continuât Picco e Carrozzo scrutinant numars e compuartaments, “al è par vie che si è intune fase di transizion, ma ancje par vie che nol è un control reâl di cualitât de esecuzion dai progjets: se si impon criteris di cualitât – a àn scrit – al è clâr che si favorìs la cressite dai professioniscj che le puedin garantî”. In zonte al covente ancje un control de congruitât de spese, “ma al sarà une vore dificil se e reste la confusion legjislative tra progjets che a jentrin te politiche linguistiche e altris (lenghe e culture furlanis), se no si domande un model unic di rindicont che al fasi risaltâ ancje i efiets economics e ocupazionâi, se no si met un impegn costant tal studi e te valutazion di chescj dâts”.
IL SETÔR SCUELE_ Une peraule particolâr il studi le pant par il setôr de scuele “che al domande une atenzion particolâr, pe sô impuartance e ancje pe sô potenzialitât di creâ puescj di lavôr”. Il scandai al stime che in dì di vuê a sedin une cuarantine i contrats di lavôr dipendent, pe metât a mieç timp. I finanziaments publics a contribuiressin in forme impuartant ae ocupazion fisse di 15 personis. “I bêçs a pro de lenghe furlane no son avonde no dome par vê risultâts interessants tal mont dal lavôr, ma adiriture par vê un risultât tecnic positîf – e dîs tes conclusions la ricercje –. E po, lis spesis pe television e pe promozion, doi aspiets fondamentâi par il status de lenghe, nocate che a surbissin une part impuartant dal sfuarç economic, a son tant che une gote tal mâr”. La situazion e je fate ancjemò plui grivie stant il fat che, dome cu la ecezion de leç regjonâl 3/2002, chê che e sosten in maniere direte la scuele, “i ents publics – Regjon e Stât – a àn sbassadis lis cuotis di partecipazion”.
I FINANZIAMETS_La Regjon, dut câs in 10 agns e à sostignût di bessole i doi tierçs dal sfuarç economic, invezit il Stât dal 2002 al è simpri mancul presint. La ricercje de Picco e di Carrozzo e ufrìs ancje la storie di 22 sogjets finanziâts cun plui dal 1% dai bêçs a disposizion. In spice de scjale e je la Societât filologjiche furlane (11,23%) che, “nocate e vei vût finanziaments stabii e simpri impuartants – a disin i studiôs –, no à savût saltâ fûr di un sisteme di volontariât e di assistenzialissim”. Al secont puest la Universitât dal Friûl (5,28%); la Provincie di Udin (4,97%), la Rai (4,62%). Al cuint puest Informazion furlane – Onde furlane, cul 4,58% dai finanziaments. In gjenerâl, però, si lei tal studi “i finanziaments a son dispierdûts, parcè che il 37% si divît in porzions di mancul di 20 mil Euro par ogni an”. La scuele e fâs cjapitul a se, stant che, a ricognossin Picco e Carrozzo cun tant di numars, e je “un ambient un grum vivarôs, e l’interès al è in continue cressite”.
La esperience galese
“In Gales – al à contât un dai ospits ae cunvigne, Maite Puigdevall, linguiste dal Ciemen, il Centri internazionâl minorancis etnichis e nazionâls di Barcellona –, intun an a son a disposizion 13 milions di Euros dome tai servizis publics. La scuele e i mieçs di comunicazion a son finanziâts a part, tant che si rive sui 20 milions par an”. E i risultâts a son sot i voi di ducj. In dîs agns, la politiche linguistiche e je di fat scomençade tal 1997, la lenghe e à mudât status, e à prodot une “economie identitarie”, tant che al cjate vore plui prest chel che al sa lis dôs lenghis. “Soredut – è à continuât Puigdevall – dal 2001 si è fermât il vignî almancul de lenghe, tant che vuê cui che al fevele abitualmentri il galês al è passât dal 18% al 20,1%”.