CULTURE – LA FABRICHE DAI… LIBRIS. Renato Iacumin, I mosaics de Basiliche di Aquilee

«La ricercje no je ancjemò finide, anzit salacor e je a pene tacade. I grancj risultâts positîfs che si è rivât a vê a dan fuarce par fâ scandais plui insot e a lassin viodi la feconditât de metodologjie che al à tignût il professôr Renato Iacumin. Il studiôs al è vuê devant di une miniere, ma dal sigûr, no za finide, cu la mape juste per esplorâle e par curâle.
Ancje l’osservadôr comun, che al reste cjapât de ricjece e de profonditât comunicative dal lengaç, si sint clamât de figurazion e in cualchi maniere si sint tirât drenti inte ricercje».
No fevelìn di un libri, cheste volte. O fevelìn di un cd.rom, clamât I MOSAICS DE BASILICHE DI AQUILEE, burît fûr intal 2006 dal Comun di Aquilee, su di un test inedit di Giovanni Battauz, rincurât di Flavio Cossar. O, miôr, o fevelìn di Renato Iacumin che i mosaics di Aquilee ju à studiâts e ju studie. O, ancjemò miôr, o fevelìn di chel patrimoni inestimabil, di chê miniere di cognossincis storichis, teologichis, religjosis, geografichis, botanichis, artistichis che e je costituide dai mosaics de basilche mari de cristianetât dal Friûl.
Lâ a Aquilee, jentrâ inte basiliche, cjalâ i mosaics, dî che a son biei… al è parfin masse facil. Cirî di capîju al è un pôc plui dificil, ma capîju pardabon e je une sodisfazion uniche. E chest e je la mission che si à dât Renato Iacumin che di chei mosaics al sa plui lui che ducj chei altris metûts insieme.
I mosaics no son dome elements decoratîfs, biei di viodi e di preseâ dal pont di viste artistic e de braure tecniche di cui che ju à fats. A son ancje un catechisim, un libri di lei, anzit plui di un libri, chel de aule nord (la plui antighe) e chel de aule sud. A contin la storie de anime, ma ancje lis evoluzions des teoriis teologjichis intai prins secui dal cristanesim, a scomençâ dal 300: dai tescj gnostics e de Pistis Sophia, al jedeucristanisim, al universalisim de salvece. Teoriis che a rivavin ancje de Afriche dal nord, di Alessandrie di Egjit, che Aquilee e jere in contat diret cun colegaments periodics regolârs par vie di aghe. Di li a rivavin ancje i riferiments a dutis chês bestiis fantastichis o straneosis che si viodin rapresentadis intai mosaics e che no fasin part de tradizionâl iconografie cristiane. Aquilee e jere une puarte sul Orient, su monts difarents, no par nuie e jere tolerante, un miscliç di int che e vignive di ogni dontri. E ancje la sô teologjie e jere une vore origjinâl rispiet a chê di Rome.
Bisugne lâ a cjalâju chescj oparis mestris e fâsi judâ di Iacumin par capîju. Tignît presinte une robe: in dì di vuê o fasìn un cd.rom, par conservâ memorie di une robe impuartante che o volìn che ancje altris a cjapin part. In chê volte, mîl e siet cent agns in daûr, a fasevin un paviment di mosaics.
PS. Renato Iacumin al è ancje un poete. Ma dal poete o favelarìn une altre volte.
Laurin Zuan Nardin