OMS DI LIBERTÂT. Robert Burns, une lûs di sperance tal scûr de opression (Scozie)

Cuant che si pense ae lote pe libertât dal popul scozês il prin non che al ven tal cjâf al è chel di William Wallace, ma in Scozie al è un personaç inmò plui amât dal vincidôr di Stirling, o sei Robert Burns (1759 – 1796).
Calcolât tant che il poete nazionâl de Scozie e un dai pionîrs dal Romanticisim, Burns al à vût une grande influence su la leterature scozese dal ‘800 e dal ‘900. Al à ancje tirât sù cetantis cjançons tradizionâls che a àn dât un contribût di fonde pe racuelte “The Scots Musical Museum”. Cundut che al vedi scrit ancje par inglês, pes sôs lirichis plui impuartantis al à doprât il scots, la varietât linguistiche plui fevelade in Scozie.
Tun dai moments plui scûrs pe identitât de Scozie, segnade inmò dal pês de repression metude in at dopo des rivoltis jacobitis, Burns al à savût tignî impiât il sium di une Scozie libare. I siei riferiments al republicanisim, la condane des disavualiancis sociâls e une cierte vene di anticlericalisim lu àn fat deventâ un riferiment ancje pai prins liberâi e socialiscj.
Se intal mont ducj a cognossin la sô Auld Lang Syne, in Scozie Scots Wha Hae, che e fevele de vilie de bataie di Bannockburn, e je une sorte di imni no uficiâl. Now’s the day and now’s the hour (cumò e je la dì e cumò e je la ore) – al scrîf Burns – Free-man stand or Free-man fa’ (o restarìn achì di oms libars o di oms libars o murarìn): un ricuart de lote pe indipendence de Scozie par scjaldâ i cûrs in timps scûrs, par impiâ la sperance di un avignî di libertât.
CARLI PUP