ATUALITÂT – Scuignî lâ al Est

Tancj e son – si sa – i furlans sparniçâts pal mont. E tancj e son chei finîts te Europe dal Est.
Al jere l’inizi dal Nûfcent cuant che i dissendents dai spicepieris de plane di Pordenon e lerin a implantâsi dongje il delta dal Danubi, boscadôrs e marangons a cjatarin bon stâ in Slovachie e Ucraine, imprenditôrs e muradôrs de zone di Udin e sielzerin la Transilvanie.
Vie vie tai agns, la emigrazion furlane viers l’Est e à continuât a cressi: zovins disocupâts in Italie, buteghîrs e impresaris a àn sielzût di trasferîsi ta chei paîs, cirint li furtune e sperancis.
Di chescj emigrants partîts dal Friûl tra il 1850 e il 2009 al fevele un documentari itinerant, nassût di un progjet di Loris Vescovo, cu la regjie di Marco D’Agostini. Il titul? “Lâ vie di là – Furlans de Europe dal Est”. Si trate di un video che nus puarte “su lis stradis” (“on the road”, si disarès par inglês), fasint fâ al spetadôr un viaç lunc 6 mil chilometris in machine, passant tra Slovachie, Ucraine, Romanie e Ongjarie.
Trê a son i ingredients di cheste biele opare: peraulis, imagjinis e musichis, che si fondin e si confondin tra lôr cun maestrie, intun miscliç ben costruît.
PERAULIS_ Tantis lis testemoneancis tiradis sù dai emigrants che a contin la lôr storie, lis lôr sieltis di partî, lis esperiencis di vore, il leam cu la tiere di adozion, cu la lenghe e la culture locâl. La memorie dal passât si messede ae fidance pal doman, la nostalgjie e lis lidrîs cul avignî.
IMAGJINS_ La cineprese e mostre paisaçs di borgadis puaris e di une campagne restade ai timps dai cjaruçs; di cuintri, lis senis ziradis tes citâts a pandin la confusion, la modernitât, il mismàs di dutis lis capitâls dal mont.
MUSICHIS_ A tignî dongje lis contis di vite e lis figuris di tieris dal Est e je la musiche, chê tradizionâl di chei paîs. Si passe di un continui dai blecs di melodie kletzmer ebraiche ai tocs di liturgje ortodosse, dai violins spirtâts de culture zingare ai balets dal folclôr locâl.
Si che duncje, traspuartâts tal Est de Europe, o podìn dâ un cuc ae situazion dai nestris paisans emigrâts vie di là, sbisiant il savôr dai lôr ricuarts e il gust dai lôr siums.
Il lavôr di Loris Vescovo al è stât presentât vinars ai 8 di Avrîl, aes 9 sot sere al Cine Benois – De Cecco di Codroip, prin documentari di produzion dal Circul culturâl Lumière.
Ilarie Colùs