TERITORI. Al torne il super8

La magjiche atmosfere dai filmins familiârs in 8mm e super8 a disposizion di ducj te Mediateche dal Cinemazero di Pordenon, par creâ une grande memorie coletive. La associazion cinematografiche che e pupile il cine di autôr, cheste volte e à decidût di valorizâ la culture plui popolâr. Puartant te Mediateche i filmins, la int e otignarà sore nuie une lôr copie in dvd, a condizion che une altre copie e resti tal archivi public di Cinemazero. “Une idee – e spieghe Silvia Moras, responsabile dal progjet – che e nas de volontât di preservâ la memorie popolâr e i ricuarts des personis. No ducj a san cemût conservâ chescj supuarts filmics cussì delicâts: ur volìn dâ une man”. Silvia e je laureade in conservazion cinematografiche, e e je inamorade dal 8mm, tant che a riprent ancjemò lis sôs vacancis in cheste maniere, cjatant tai laboratoris fotografichis vecjis peliculis. “Chest formât – e dîs – al à dute une atmosfere cjalde e particolâr. A stan cirint di recuperâle ancje tai videoclips, par esempli l’ultin dai Bluebeaters”. Pal moment, a son za rivâts te  Mediateche diviers filmins: massime matrimonis e fiestis familiârs, ma ancje testemoneancis ineditis dal taramot dal 1976, de aluvion dal 1966 e dal disastri dal Vajont. “A son ancje filmins interessants su cemût che e jere Vilegnove di Pordenon prime de costruzion dal cuartîr residenziâl – e zonte Silvia -, o resoconts di viaçs fûr dal Friûl, par esempli a New York e a San Francisco. O ai ancje viodût cressi leteralmentri lis personis, dal filmin dal batisim a chel dal lôr matrimoni”. Insiemit a Tommaso Lessio, in chest moment Silvia e je daûr a riversâ une cuarantine di 8mm e super8. “Nus plasarès – e siere – mostrâju a dute la int tal cors di seradis tematichis, par fâ viodi cemût che o jerin 20 o 30 agns fa”. Daspò, i dvd a saran a disposizion di dutis lis personis interessadis inte Mediateche, in place della Motta 2 a Pordenon.
Davide Francescutti
___________________________________________
Cinemazero, il cine a Pordenon
Trê salis cinematografichis, une Mediateche con 7.900 libris, 10.000 films e 45 rivistis periodichis. E ancje laboratoris didatics, concors, publicazions, conferencis e festivals (par esempli chel internazionâl sul cine mut). Dut chest al è Cinemazero, che chest an al à fat fieste pai siei prins 30 agns di ativitât. Une associazion che e pupile il cine di cualitât, sedi d’essai che di gjenar, contribuint ae incressite culturâl di Pordenon e de sô provincie.
Par informazions, al baste clicâ www.cinemazero.org
Davide Francescutti