CULTURE – FRIÛL TAL ETERE. Mandi Jan

Al capite di viodi a mandâ i coleghis in pensions. Par gjoldisi chei cuatri francs che e passe la casse dal Inpgi: al è ancje comprensibil, daspò une vite passade daûr lis scrivaniis. E duncje vuê si cjatìn a vê di saludâ, a malincûr, il coleghe che, fintremai al numar passât, al scriveve in cheste rubriche. Jan Toti al va in pension e al à decidût di fermâ ogni gjenar di colaborazion cu la Patrie. Par saludâlu o vin pensadis chestis riis, che dal sigûr no i plasaran. Jan al jere, al è, un princip de modestie, duncje lis celebrazions no i plasin. Chês postumis, che a san di ultin salût al “caro estinto”, ancjemò di mancul. Par chest, i vin domandât un apontament e lu vin visât de robe: no vin voie di fâ sorpresis, o vin miôr un toc concuardât, specie cuant che si trate di un coleghe che al à vût la nestre stime.
Cirî di tirâ fûr e di spiegâ cui che al è stât Jan Toti e je une imprese. La sô ossession e je simpri stade une cierte riservatece. Unidirezionâl: lui al bramave di savê dut di ducj, ma su di se al meteve une coltre. Ma cheste sô vite professionâl pratichementri simpri platade e je stade une component dal so stes sucès. In pôcs a san alc di lui. Si sa, par esempli, che nol vignive mai aes riunions di redazion. Mai a chês di Dree Venier, mai a chês di Valcic. I tocs i ai comissionavin vie mail, e vie mail al mandave i siei coments.
E simpri in ritart (almancul siet dîs daspò de consegne, che par ogni numar e jere une ossession pal redatôr cjâf Romanini). O cirivin simpri di stiçâlu sui coleghis e condutôrs che le vevin cun lui, par vie che al jere stât masse trist. I disevin che si steve fasint tiere brusade intor, che ducj lu varessin odeât, che al sarès deventât une specie di Oriana Fallaci cui bregons, incancarît e isolât dal rest dal Friûl.
Lui al rideve e si divertive di chestis nestris provocazions. Cuant che lu vin sintût par scrivi chest toc, prime di saludânus, nus à slungjât une buste zale. E nus à dit: «Cheste e je la liste. Puars mai voaltris se no le publicais».
Ve chi la ultime befe di Jan Toti, gjornalist pardabon libar,
e di doman nancje plui gjornalist, ma libar e vonde.
Ve chi “La liste di Jan”.
“Jan Toti al va in pension.
Si congratulin pe sô lungje cariere (sante scugne) e a brindin, par vie che al è lât fûr dai pîts: dute “Telefriuli”, ma in particolâr il diretôr Terasso. Dute “Free”, ma in particolâr il diretôr Lorenzo Petiziol. La beniamine dal balon, Francesca Spangaro (a Jan i mancjaran lis sôs adenoidis, berladis tal pre partide al stadi Friûl). Ducj i vincidôrs dal “Patrie award”. Christian Romanini che cussì nol cjaparà plui telefonadis di proteste.
Si sbatin cetant: chei de Rai FVJ, che tant, che tu scrivis o no tu scrivis di lôr, al è compagn.
A son displasûts: Enrico Turloni e Filippo Fois, che cumò no saran plui cag**s di nissun; la beniamine dal gol Marina Presello, che si sta ancjemò domandant cui che al à contât dal so matrimoni, in stîl William & Kate. I membris de “Academy de Patrie”, che a saran riciclâts in cualchi altre jurie di cualchi altri premi. Telecom Italia pal mancjât vuadagn, par vie des telefonadis di proteste che di cumò indevant no saran plui.
Mandi, Jan”.
Redazion