EDITORIÂL – No si vent la tiere dulà che l’om al cjamine

No sai a voaltris, ma a mi mi capitave dutis lis voltis che o tornavi a cjase. Des bandis dal Tiliment mi someave di jessi jentrât intun lûc diviers di dulà che o jeri stât fin in chel moment. No sai se a jerin i odôrs, lis primis peraulis par furlan – se o jeri in tren – ma soredut il paisaç. Te mê vite o ai viodût avonde paîs, teritoris, la peraule che si dopre cumò par dî dut e nuie: tancj a jerin bielonons, mi son restâts tai voi, tal cûr, ma nissun mi fâs chel efiet strani tant che il Friûl.
A son i cjamps, i filârs dai morârs, ma soredut lis monts che tu viodis di lontan.
O ai scuvierzût che e pues jessi propit cheste dimension, in cualchi mût di finitece, di confin, di une cjase grande, chê che mi colpìs di plui. Provait a vignî sù dal mâr, de lagune, e a cjalâ viers nord: e tu lu viodis, il Friûl, tal so jessi une robe ugnule, “che e slargje la sô tende”. E sot di jê, o sin noaltris.
Po ben, dopo tante liriche, o vin di rabiâsi, parcè dut chest o stin par pierdilu e dome par colpe nestre.
Ai sorestants, ai forescj, dut chest no i interesse un boro: par lôr si clame teritori e lis cjartis che a doprin no segnin i riu, i vignâi, lis olmis di chei che la tiere le àn semenade e trasformade.
Si clamin zone artesanâl, zone industriâl, residenziâl, agricule; a son segnadis cu la letare A, B, Z. De storie di chel toc, di ce che al jere prime e parcè che al è deventât cussì, no i free. Numars e letaris, tant che i oms e lis feminis che a stan daûr ae mapadure.
Cheste concezion e je stade une vore ben claride dal architet Pirzio Biroli intune cunvigne cuintri l’eletrodot a Vilès.
Il paisaç duncje nol è dome une biele cartuline, l’ambient al è un patrimoni fondamentâl de nestre identitât, al sta tal Dna dal popul furlan tant che la lenghe, lis tradizions. Anzit, al è la fonde li che chês a son pognetis.
Se duncje cualchidun al à la pretese di fâ il paron su la tiere, su la aghe, al à di sigûr tal cjâf di podê fâ ancje dut cuintri la int di chel puest.
E chel popul che nol difint il so ambient, di sigûr al pierdarà dutis chês altris bataiis.
Se po dopo cualchidun al pense che a sedin dome posizions ideologjichis o, piês, romantichis, e bastarès une sole domande. Un Friûl segnât di discjariis, di eletrodots, di TAV e di autostradis, in sumis une scovacere,  ce “valôr zontât” puartial ae economie, al tant decantât “made in Friûl”?
Ma soredut, ce fuarce puedial vê tes sôs rivendicazions di autonomie, un popul che nol sa difindi nancje il curtîl di cjase sô?
Dree Valcic