SPECIÂL. “Maria Zef”, il prin film furlan

Tal 1981, intant che in Americhe si ziravin films come “Indiana Jones e i predatori dell’arca perduta”, “Ufficiale e gentiluomo” e “Il postino suona sempre due volte”, chi di nô in Friûl al stave nassint il prin film furlan, ven a stâi “Maria Zef”, pe regjie di Vittorio Cottafavi e che in curt al sarès deventât une piere fondamentâl de produzion culturâl di cjase nestre.
Fin in che volte in Friûl a jerin stâts fats plui che altri documentaris sui varis aspiets de nestre culture, magari regjistrâts in lenghe italiane, e mai si jere frontât il fat di une produzion di cine vere e proprie.
A vevin di rivâ l’inzegn, la passion e la volontât di Siro Angeli par vierzi cheste gnove strade, metint su la pelicule une storie une vore crude, scrite tancj agns prime de scritore Paola Drigo.
Siro Angeli, poete cjargnel, di chel romanç al à tirât fûr la senegjature dal film, cul jutori dal regjist Cottafavi, e insieme nus àn lassât une opare di un valôr assolût.
Lis critichis su di un film cussì dûr e vêr no si son mai fatis spietâ: se di une bande a son simpri stadis buinis pal grant valôr artistic de opare, e cul passâ dai agns a son cressudis ator pal mont, in cjase nestre il film nol è mai stât parât jù.
Baste pensâ che parfin in Americhe, tai grancj archivis dulà che a son regjistrâts e documentâts i films, si cjate un spazi dedicât a Maria Zef, in Friûl invezit la Rai – che lu à prodot – no lu à mai burît fûr, e i Ents culturâi di chenti lu àn simpri cjalât par traviers par vie che e jere une opare che e lave cuintri de culture furlane intindude in chei agns (e intune cierte maniere ancje cumò).
Fogolâr, scarpets, un bal cu la armoniche: cussì e veve di sei mostrade la culture furlane. Maria Zef invezit e mostrave il drame de miserie, i problemis di une vite puare in montagne, la tragjedie de violence patide in famee, une brute storie che no jere dome di Maria Zef, ma che e mostrave la realtât nude e crude cussì come che e jere dispès al inizi dal secul passât.
Un film impuartant che al è stât pôc viodût, e che si riscje di no viodi plui par vie che la pelicule origjinâl e je daûr a deperîsi; par chest, e varès bisugne di jessi restaurade prime che la grande storie di Marie, Barbe Zef e Rosute si pierdin par simpri.
Luca Zoratti