CULTURE – CUSINE. Un boç dut par me

Che al fos stât pardabon Einstein a dî che «se si estinguin lis âfs, timp cuatri agns e si estinguarà ancje l’om» e je une liende metropolitane, ma dut câs in cheste frase e je  une grande veretât. Parcè che chês besteutis – che bielzà si mertin la nestre stime pe mîl e pes altris maraveis che nus regalin (propoli, pape reâl, cere…) – a fasin ancje un grant lavôr par puartâ ator il polin, e par fâ “funzionâ” lis plantis e dut l’ecosisteme, contribuint cussì ancje a tignî l’aiar net e a fâ il mont un tic plui vert.
Stabilî une sorte di aleance cu lis âfs, pal om, al è di sigûr simpri un bon afâr: pal grant valôr nutritîf de mîl (grande risorse energjetiche e di oligominerâi, ma ancje antibateric naturâl doprât in mil manieris fin de antighitât par curâ tancj fastidis). E parcè che vê ator lis âfs e je la miôr garanzie di un ambient avonde san.
Dâ une man a lis âfs e a cui che si cjape cure di lôr e je duncje une maniere di dâ une man concrete a dute la nature. E se intant si rive ancje a procurâsi une furnidure par dut l’an di mîl, al vûl dî che si à fat propit un grant afâr.
Di fat, si sta slargjant la iniziative – di bande di apicultôrs – di meti in adozion i boçs, vâl a dî di domandâ ai clients di contribuî a mantignî une famee di âfs par dute la stagjon. In cambi, a varan furnidure di mîl par dut l’an e ancje la sodisfazion di vê un boç “personâl” di podê lâ a viodi ancje par imparâ cemût che si curin lis âfs (une biele esperience massime se si àn fruts, par fâur viodi dal vêr cemût che e funzione la nature).
Un esempli di cheste iniziative al è praticât de Aziende Agricule Biologjiche Canais di Sante Margarite dal Gruagn, che propit in chest periodi (fin ae fin di Mai) e je daûr a meti in adozion i siei boçs, a disposizion tant par privâts che par grups (amîs, fameis, coleghis, grups di compre…) par vê in cambi 10 kg di mîl (o 5 kg, par mieç boç). Une formule pensade ancje pes scuelis: par tirâ dentri une classe interie, ancje une serie di lezions di bande di apicultôrs, par spiegâur ai fruts il mont maraveôs des âfs.
La aziende bio Canais (vie Mazzanins 1, Sante Margarite, Morùs) e je vierte par informazions il martars, des 14 aes 18, e la sabide, des 8.30 aes 12.30. Par contats: 348.7532374, adottaunalveare@gmail.com o su Facebook.
Margherita Timeus