ATUALITÂT – «Une volte o jeris voaltris e cumò o sin ancje nô»

Il Mont al è daûr a cambiâ e cun chel la vision de emigrazion furlane che e vûl contâsi e agjî inovantsi, par lâ indevant a jessi protagoniste e testemonie di une societât vive. Cence discreditâ dal sigûr lis ativitâts dai Fogolârs “storics” e la publicistiche floride sul teme, cu la nassite e la difusion di internet prime e dal web 2.0 dopo, a son vignudis sù e si son dadis adun gnovis “fameis” di furlans tal forest che a àn cjatât visibilitât e fuarce in rêt. In Friûl, par altri, grups no leâts aes associazions storichis de “diaspore”, a àn elaborât progjets origjinâi che, cualchi volte, a àn vût ancje la poie dai ents locâi.
PONTS DI FUARCE DI SGARFEFURLANS_ Loris Vescovo al è di agns impegnât inte ricercje dai furlans residents intes latitudins plui insolitis dal globi: di Santo Domingo ae Ucraine, de Thailandie ae Cine. Il so program «focalizât sul mont e no dome sul Friûl» – culminât inte trasmission radiofoniche “Sgarfefurlans” (za presentade ancje da La Patrie dal Friûl, ndr), ospitade su lis frecuencis internazionâls di “Radio Onde Furlane” – al à vût il gradiment dal public, tant di dismovi la atenzion de Unesco che al à patrocinade la edizion dal 2008.
L’APEL DI VESCOVO_ Ancje ae lûs de definizion dai gnûfs criteris pal finanziament dai coregjonâi tal forest di bande dal Assessorât ae Culture de Regjon Autonome Friûl – Vignesie Julie, che e ponte sul coinvolziment dai zovins midiant dal disvilup di struments di comunicazion e di informazion, Loris si è indreçât cuntun messaç di pueste eletroniche «ai zovins di Ent Friûl intal Mont che dilunc de ultime convention di Maian a àn domandât di vê plui spazi dentri dal Ent». L’ideadôr di Sgarfefurlans al vûl che e deventi «visibile e protagoniste la comunitât di zovins migrants furlans intal mont» e contâ lis lôr storiis, i lôr siums e lis lôr problematichis, disfrutant lis pussibilitâts infinidis dadis dal web 2.0, inricjît di contignûts audio e video inedits.
VOIE DI RIGNUVIMENT GJENERAZIONÂL_ Cumò che la Vierte e je aes puartis e che il messaç di pueste eletroniche di Vescovo al è daûr a svolâ tant che une cisile pal mont, il cjantautôr di Clauian al domande ae comunitât furlane dai «emigrâts/emigrants e di chei che salacor a emigraran» di esprimi il propri parê par inviâ un ricambi gjenerazionâl e un rinovament programatic dentri dai Ents e des Associazions che a rapresentin la diaspore furlane intal Mont. Chel che al è ciert, al scrîf Vescovo, ispirantsi a une vilote, al è che «Un volte o jeris voaltris, e cumò o sin ancje nô»!
Daniele Martina