AI 32 DI MAI. Lis miezis stagjons a esistin ancjemò

Oh, ce biel: e rive la Primevere!
Ancje se ducj a disin che lis miezis stagjons no esistin plui, jê e rive distès, ducj i agns, e ducj a samein contents che e rivi.
A son ducj tant convints di cheste robe des miezis stagjons, che ancje il “cambi di stagjon” tal armaron si fâs dome dôs voltis ad an, come se lis stagjons a fossin dôs. Pecjât che cussì al sucêt simpri di cjatâsi cu la classiche ploie di Març che e disfrede dut intun moment e cun dome une maiute cu lis maniis curtis intor parcè che «aromai o ai bielzà fat il cambi di stagjon e lis maiis plui pesantis lis ai metudis vie dutis».
A disin ducj che lis miezis stagjons no esistin plui, ma a pene che tu fasis une starnudade «ah, e sarà une alergjie primaverîl!» e se tu sameis un pôc strache «ah, al sarà il cambi di stagjon» (no chel dal armaron, chel climatic). Alore e je vere che la stagjon e je cambiade!
E, a proposit di strache: la Primevere e je la stagjon mancul furlane di dutis.
Cul prin soreli e cu la prime sclipide dal an, insiemit aes temperaduris a cressin ancje la voie di durmî e la sensazion di vê simpri il cjâf a nolis, e – come ducj chei altris – ancje il furlan al devente plui debulut, plui sparagnefadiis, plui durmion. Si podarès dî che, se nol las ator pai cjamps a cjapâ sù urtiçons (ativitât furlane par ecelence), il furlan in Primevere al tacarès a sintîsi un tic triestin.
Ancje parcè che la Primevere e je plene di fiestis, di puints, di scusis par stâ a cjase dal lavôr: il lunis di Pasche, il 25 di Avrîl, il prin di Mai. Une stagjon fate pai sflacjons, in sumis.
Chest an, che il lunis di Pasche al cole ai 25 di Avrîl e il prin di Mai al cole di domenie, al sameave l’an plui furlan di ducj, ma cualchidun al à decidût che o vin di fâ fieste ai 17 di Març, par ricuardâsi che a son passâts 150 agns de Unitât de Italie.
A dî la veretât, no ai capît ben ce che e varès di festezâ la Italie, stant che tal 1861 si è zontade sì, ma cence la part plui impuartante di dutis: il Friûl.
Al sarès une vore miôr, pe Italie, fâ fieste tal 2016, e ricuardâ l’aniversari di cuant che e à vuadagnât il Friûl, ma cence Triest.
BETE DI SPERE