Sfuei Mensîl Furlan Indipendent
Archivi de Patrie

LA FABRICHE DAI… LIBRIS – Ovidio Colussi, Il pilustrât

............

“-S’al nevea cussì par duta la not, par doman e ni riva fin in cjamara-, al à fat Niu fasint un sen di Crous tant a la svelta che nencja il Signour al devi jessisi necuart: po pi a la svelta encjamò al è coret via dal barcon di cjamara, al à tirat su la imbutida fin intal sufit e al è saltat four dal jet, tant di ficjon ch’al à rebaltat il urinal”.
Cussì al scomence chest biel romanç di Ovidio Colussi, scrit intai agns dal 80 (premiât de Filologjiche intal 1987) e rieditât intal 2009 inte golaine di leterature furlane” de Arlef in colaborazion simpri cu la SFF. Iniziative une vore mertorie cheste di ripublicâ chei che a son i classics de prose inte nestre lenghe, adatâts a la grafie uficiâl. Une vore utilis a son ancje lis notis, di caratar linguistic, lessicâl e storic. Dome une piçule osservazion: parcè no scrivi une rie ancje su cui che al jere Kossuth (p. 144), un personaç che, pai ongjarês al rapresente ce che pai italians al rapresente Mazzini?
Il libri al fevele di un zovin des bandis di Cjasarse che, vie pal 800, al ven pilustrât (reclutât a fuarce) dal esercit de Austrie-Ongjarie, daûr de denunzie dal so plevan.
E al ven di pensâ a pre Toni Beline, a ce maniere che lui al intindeve il rûl dal predi intune comunitât. E ancje a ce maniere che lu intindeve un predi che par pre Toni al jere stât esempli e mestri, vâl a dî don Lorenzo Milani.
Cuant che un dai siei arlêfs al veve di partî par lâ a lavorâ lontan, don Lorenzo, cence fâsi viodi, i veve tignût daûr fin a la stazion, par sedi sigûr che al montave sul tren. E, se no je ves fate in chel pas cussì grant par un puar montanâr, lui al sarès stât li, par dâi la man. Tant che un pari, plui di un pari.
E pre Toni che al spiete cun trepidazion che a tornin i fruts che a son lâts a dâ i esams, jù a Tumieç (mi pâr) e che nol rive a stâ fer, che al va a cjalâ se ju viôt rivâ.
Chel predi dal 800, invezit, al denunzie, lui, chel zovin a pene un ninin cjaviestri. …
Don Milani, pre Toni a saressin lâts fin in Ongjarie par viodi di lui, par molâi, magari, une buine sberlote pe macacade che al veve fat e po cjariâsal su lis spalis e tornâ a menâlu cjase, in barbe a lis autoritâts e a ducj i potents. Tant che un pari, plui di un pari.
E ni lui, il predi, ni Niu il pilustrât, a varessin fate chê brute fin.
Laurin Zuan Nardin

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +