CULTURE – FRIÛL TAL ETERE. La vuere di Tavagnà

La vuere – e nancje tant frede – tra lis dôs plui impuartantis televisions furlanis e je sclopade pôc prime di Dicembar, cuant che si è distudade la vecje television analogjiche. Duncje, ce che prime e jere concorince e je deventade vuere. Free e Telefriuli si indi fasin di ogni sorte. A scjadenâ la polemiche, la difusion dai dâts Auditel dai ultins mês dal an. Il confront al deve net vantaç a Free – in Novembar adiriture e veve doplade Tf, cun 1,2 milions cuintri i 650 mil contats. Ma cuntune diference di fonde. Free, che tai tabulâts e je inseride in Venit, al pant il segnâl su dut il Nordest. Sta di fat, che la proprietât di Panto e à burît fûr i dâts, cun tant di comunicât stampe (“O sin prins in Friûl-Vignesie Julie”) e publicitât sul MV. Soflant sul fûc. Tf e ancje TelePordenon, par vôs di Gigi Di Meo, a àn comentât la gnove, disint che il dât nol jere confrontabil, par difusion. Sta di fat che il grop di Panto al à tornât a rispuindi, disint che la programazion e je dome e dute pe nestre regjon, che il tg al ven fat tra Friûl e Triest e che se cualchi contat al salte fûr di Venit o Trentin o Sudtirôl, nol ven par une reâl “fidelizzazion”, ma par sporadic interès. Finide li? Malafenò.
Al rive il switch off. Free di cuatri mes al dîs intes sôs publicitât di jessi za pronte cu la tecnologjie, di trasmeti za tal gnûf mût. Tf invezit nol fas tant “Can can”. Dome che al moment de veretât, cuant che il DDT al è a plen regjim, Free al sparìs dai televisôrs. In vie Nazionâl, a Tavagnà, si freolin lis mans: par lôr il passaç al è stat cence dolôr. E lis curvis dal “audience” a tornin a zirâsi, cun buine pâs de bande di Petiziol.
Di bon ultin, il Gazzetin (grop che al à la maiorance des azions di Tf) al jes cuntun articul dedicât ai sucès di Tf e par rimarcâ la gnove strategjie cu la scree di une rêt bis dedicade ae sô storie (replichis dal sterminât archivi di passe trente agns). Par risolvi il probleme di tancj utents che no rivin plui a cjatâ il cjanâl, a Free a àn ativât ancje un numar vert. Pal moment, in dute cheste masnade, Telefriuli e samee che e vedi vude la miôr. E starìn a viodi cuâl che e sarà la evoluzion. E cuâl il prossin colp bas, te vuere di Tavagnà.
JAN TOTI