TERITORIS – SLOVENIE. No soi nazionalist, ma patriote

Al à la lenghe sclete e snait di vendi Boris Pahor. Te sô lungje vite, l’inteletuâl, scritôr e ativist sloven di Triest nol à mai smetût di scombati. Par vie di une sô interviste jessude sot Nadâl sul insert dal cuotidian Primorske Novice di Cjaudistrie (viôt box te pagjine), li che al critiche la elezion a sindic di Piran dal miedi di lidrîs ghanese Peter Bossman, si è jevât sù un grant davoi, no dome in Slovenie.
Tancj a son restâts a bocje vierte pes sôs declarazions…
O soi stât stracapît: no ai nuie cuintri Bossman, o marcavi dome il fat che i eletôrs a varessin vût di votâ o par un sloven o par un membri de comunitât taliane che e vîf a Piran. No je par nuie une cuistion di razisim, nancje di nazionalisim, ma ben di amôr di patrie: intun mont simpri plui globalizât, une realtât piçule come chê slovene e scuen fâsi valê par no pierdi la sô identitât. Chest al vâl inmò di plui pai slovens di Triest e dal Friûl.

Ce vuelial dî in dì di vuê fâ part di une minorance?
No mi plâs la peraule minorance”! Voaltris furlans, par esempli, sêso forsit minorance in regjon? E i catalans in Catalogne? Par chest o dopri il tiermin comunitât”. Di bande mê o soi simpri stât braurôs di jessi un sloven di Triest: o crôt che jessi fedêi ae proprie marilenghe al sedi necessari par difindi la identitât di ognidun di nô.
Cemût viodial la situazion dai slovens e dai furlans che a vivin in cheste regjon?
Magari cussì no, tante int si è lassade convinci che lis lenghis minôrs a son dome dialets e duncje cun pôc valôr: mi pâr che chest al vali ancje par voaltris furlans. La Italie, fassiste prime e po republicane, e à sostignût par agnorums la idee di un monolinguisim nazionâl, cence dâur aes lenghis mancul feveladis i dirits che ur spietin: ancje se tai ultins agns a son rivadis leçs di tutele di pueste, la situazion no je cambiade plui di tant.
Rispiet a voaltris, nô slovens o vin une storie plui lungje di bataiis pe difese de nestre identitât: par chest cumò o vin mieçs di comunicazion, teatris, bibliotechis, associazions di ogni sorte e parfin un partît par puartâ indevant la nestre lenghe e la nestre culture. Però lis vin paiadis un grum chestis concuistis, massime tai agns jenfri lis dôs vueris mondiâls.
Ce avignî varano lis nestris comunitâts?
Al covente rinfuartî la solidarietât jenfri slovens, furlans, sardegnûi e vie indevant: mi pâr il câs di inmaneâ une gnove conference che e meti adun dutis lis comunitâts linguistichis ricognossudis de leç 482 dal 1999.
LA POLEMICHE
Ve ca cualchi batude de interviste incriminade» («7. Val», insert dal Primorske Novice, 24.12.2010)
Viodêt ce che e fâs la Austrie cui Slovens in Carinzie. E viodêt la Italie, che e volarès talianizâ di gnûf la Istrie. E e rivarà a fâlu, par vie che i Slovens a àn masse pocje cussience. Chest si viôt a Piran, li che a àn un sindic di colôr».
Chest no i va ben?» i domande il gjornalist. Par nuie» al rispuint Pahor. Chest nol va ben pe Slovenie». Ce isal di mâl?» al insist il gjornalist. Trop che o vin dât par chel tocut di tiere, e cumò tu âs un sindic di colôr. O Signôr, chi dulà ise la cussience nazionâl? Nuie cuintri dal fat che al è di colôr. Ma se a vevin chê di elei un no-sloven, al plui a varessin dovût elei un membri de comunitât taliane che e vîf culà vie. Il fat di vê sielzût un forest tant che sindic al è un brut segnâl».
ALESSIO POTOCCO