CULTURE – LICÔF. Slargjâ il voli te Rêt

Une volte si diseve “navigâ” in internet ma chel verp vuê nol sodisfe plui, nol è plui adeguât. La idee dal web tant che di un mâr di esplorâ, di archivis e bibliotechis eletronichis come isulis di visitâ e forsit botinâ, no corispuint plui ai nestris compuartaments presints.
NAVIGANTS DEVENTâTS GNÛFS ABITANTS_ Nô vuê o sin a stâ in maniere stabile in Rêt. Li dentri o vin la pueste, la bancje, il Comun e lis impresis, gjornâi e libris, il cine e la radio. In cuindis agns, o vin costruît sul web lûcs di socialitât frecuentâts di milions di personis, placis e tinei dulà che ogni dì o partecipìn al dibatiment public, leìnt e comentant chel che altris a àn scrit. Nô stes o produsìn contignûts che dopo o publichìn intes nestris gnovis cjasis digjitâls, sui blogs e sul social networks che o frecuentìn.
In Rêt si sin costruîts une identitât sociâl, o vin cjatât fûr o coltivât afiets e relazions, o vin une reputazion e o savìn a cui dâ fiducie. O esprimìn in libertât nô stes intes conversazions, e ben planc o sin daûr a deventâ cussients dai nestris dirits tant che citadins digjitâi.
LA NOVITÂT_ Cheste vision plui clare e leibile dal nestri fâ e pues jessi riferide – benintindût – ancje a subiets amplis tant che lis coletivitâts umanis, ai atôrs sociâi e aes comunitâts locâls che, in gracie de Rêt, a àn vuê struments partecipatîfs vierts e democratics par dâ imagjin e par contâ in maniere mediatiche il lôr concret jessi a stâ sul teritori. Finalmentri, e pues vignî fûr une identitât sociâl pardabon polivocâl e pluraliste, intai gnûfs Lûcs dal teritori digjitâl.
Ma se o vin gnovis cjasis indulà jessi a stâ, alore e covente une inaugurazion.
Il licôf tant che scree, lu savìn, al è di intindi come un rituâl sociâl gaudiôs par “bagnâ” cuntun brindis ce che o vin creât, chel che prime nol jere. In chê frascje di peç metude sul cuviert des cjasis a pene fatis sù, riunint Nature e Culture, o leìn in prospetive mitologjiis e narazions che la umanitât e met in sene par se stesse, intal so costruî manufats e adatâ in maniere tecnologjiche il teritori aes propriis esigjencis insediativis.
Cun chestis pagjinis dedicadis di pueste ae Culture Tecnologjiche e Digjitâl, la Patrie dal Friûl e scree uficialmentri une sezion editoriâl che e fevele di Lûcs web e di socialitât online, e chest al è un prin licôf. La Patrie al stes timp e je daûr a consolidâ i propris Lûcs web, e cjape in mût simpri plui fuart e definît identitât e conotazion ancje intal mont digjitâl, e cheste e pues jessi calcolade une seconde inaugurazion.
LICÔF DIGJITÂL_ Al è forsit spazi par un paralêl: intal mont fisic, il licôf al è celebrât tal moment de costruzion dal cuviert de cjase, ma o sin ancjemò lontans dal podê la a stâ, stant che ancjemò a àn di jessi finidis  lis struturis internis, i implants, il furniment. Intal mont digjitâl, vint a ce fâ cun ogjets e ambients imateriâi, o savìn ben che, di là de publicazion di un sît o di un blog che si pues simpri tornâ a viodi e miorâ, il vêr impegn al è intal mantigniment de comunicazion, par “furnî” in mût simpri plui comut i Lûcs di socialitât dal web, par introdusi intal dialic public contignûts di cualitât.
Chest licôf digjitâl, segn di un impegn, al mostre la promesse di un lavôr intal timp, come che intal timp si davuelç la azion dal jessi a stâ, chel mantignî e vê cure dai teritoris vuê sedi fisics che digjitâi dulà che o vivìn e dulà che o esprimìn nô stes, inte conversazion civîl.
Giorgio Jannis