ATUALITÂT – Il salût a Enrico Di Prampero

La Facoltât di Siencis Motoriis de Universitât dal Friûl – che e ten i siei cors a Glemone – il mês passât e à finît dîs agns, e tal celebrâ cheste impuartante ricorince e à cjapât ancje la ocasion par saludâ il professôr Pietro Enrico di Prampero, tra i fondadôrs dal cors e par un grum di timp so president, e che cul prin di Novembar si è ritirât in pension.
LA CUNVIGNE_ Par fâi onôr a chest fisiolic udinês di fame mondiâl, e storichementri un dai plui acanîts sostenidôrs de Universitât dal Friûl, e je stade organizade une cunvigne internazionâl tal cine di Glemone, ai 7 e ai 8 di Otubar,  sul teme de ricercje inte fisiologjie dal fâ moviment e sui limits de prestazion umane.
Ae cunvigne – intitulade «Exercise physiology and the limits of human performance» – a son intervignûts studiôs e ricercjadôrs des plui impuartantis universitât e centris di ricercje di Canadà, Gjermanie, Gran Bretagne, Slovenie, Stâts Unîts, Svezie e Svuizare (cualchidun di lôr al jere stât ancje student propit dal professôr Di Prampero), e ancje un grum di students dal cors.
A saludâ i ospits e a vierzi i lavôrs de cunvigne – promovude dal dipartiment di Siencis e Tecnologjiis Biomedichis de Facoltât di Medisine e Chirurgjie , dal cors di lauree in Siencis Motoriis e de Scuele di Specializazion in Medisine dal Sport – a son intervignûts il president dal consei dal cors magjistrâl di Sience dal Sport Guglielmo Antonutto, la retore di Udin Cristana Compagno, il preside de facoltât di Medisine e Chirurgjie Massimo Bazzocchi, e il sindic di Glemone Paolo Urbani.
NOMEE INTERNAZIONÂL_ Le nomee dal professôr Di Prampero e je leade a un lavôr di plui di 45 agns che al à viodût il miedi udinês confermâsi tra i plui preseâts esperts dal mont tal setôr de fisiologjie dal esercizi, de biomecaniche e de bioenergjetiche muscolâr. A lui – tra l’altri – i va il mert di vê creât il centri di ecelence MATI (Microgravity, aging, training and immobility) e il laboratori di fisiologjie dal esercizi, dôs realtât di impuartance internazionâl de Universitât dal Friûl, che cun lui e je ancje in debit pal impegn spindût par fâ nassi il cors di Siencis Motoriis e Sience dal Sport e par fâ cressi la facoltât di Medisine. Tal so curriculum impressionant, ancje l’incaric – tignût par agns – di «chief editor» dal «European Journal of Applied Physiology», une des rivistis sientifichis plui impuartantis tal mont in chel setôr.
ATENZION PE LENGHE FURLANE_ Di là di cheste cariere biele e luminose, che e à dât lustri a dute la nestre regjon, il professôr Di Prampero in plui ocasions si è ancje dimostrât atent e sensibil al teme de lenghe furlane, rindìnsi ancje disponibil a doprâ la marilenghe inte Universitât, come che nus veve confermât su la Patrie di Lui dal 2009 il so student Gianni Stelitano di Codroip.
Margherita Timeus