CULTURE – Viva Onde Furlane

Dopo la fieste di Cjasielis di Mortean ai 9 di Otubar, o vin sintût il diretôr dai programs di Radio Onde Furlane, Mauro Missana.
Parcè cheste dificoltât?
«No crôt ai complots o robis dal gjenar, in chest sens o soi razionâl e realist. Dispès si dismenteìn che e je un grum di ignorance su chestis tematichis. Il probleme nol è il furlan come lenghe tout-court, ma une consapevolece di jessi europeans, plurilengâi, e cuntune proprie identitât. Sei a nivel di politiche che di societât no mi somee che o sedin madûrs par rivâ a cheste tape impuartante, ma o scugnìn fâlu, ancje par sorevivi a nivel economic e jessi plui fuarts. Dut câs, tornant a Onde Furlane, di dificoltâts a ‘nd à vudis tantis in 30 agns sedi par cause di cui che al è lât vie sedi ancje tra di noaltris che o sin restâts. Chest si zonte a di une indiference des autoritâts, cuant che no nus dan cuintri… Par fortune cualchidun al è de nestre bande e al ricognòs la nestre impuartance».
Parcè isal impuartant che ROF a resti in pîts?
«Al è impuartant parcè che e je simpri stade la uniche vere vôs che e à  testemoneât une sensibilitât diferente, doprant une lenghe e ancje un mût di jessi diviers di altris media che a jerin furlans dome di non. Ma no vin dismenteât ancje di viodi la evoluzion di une societât diventate simpri plui multiculturâl. Fevelant di musiche o ricuardi dome il «Premi Friûl» une vere farie pai nestris musiciscj, la organizazion di «Suns», festival european des minorancis linguistichis, la etichete «Musiche Furlane Fuarte». E po di ca a son passadis dutis lis realtâts culturâls dal Friûl
Tai ultins agns a son nassûts ancje progjets pes scuelis e i zovins come «Radio dîs o «Radio Ator». Ma no mi impensi nancje jo dut ce che Onde Furlane e à fat…»
Ce rispueste vesio vût a Cjasielis?
«La int e à  testemoneât il so afiet plui voltis, cu la fieste di Mortean, ma ancje cun telefonadis, par strade, su Facebook, cun e-mail e letaris. Tancj nus domandin ce che o vin intenzion di fâ, nus disin che guai se o mancjìn. Al fâs plasê, ma si scugne lâ indenant e par chest o domandi un jutori ae societât furlane. So o vessin di cambiâ nol sarà facil dâ un servizi come chel di cumò, cul unic notiziari fat par furlan e 16 oris di programs in dì. Cui lu fasial in Friûl? E po a son ducj chei che nus scoltin ator pal mont. Ma, forsit tancj si dismentein che Onde Furlane e je ancje un puest di vore par siet di lôr, plui une schirie di colaboradôrs. A son lavoradôrs che a àn spudât balins parcè che i crodin. Ancje chei no militants. Ai furlans ur domandìn che a fasin pression, che a scrivin, che a tabain ator».
La campagne «Viva Onde Furlane» e continue cu lis donazions sul CC postâl n. 18955336, intestât a Informazione Friulana, via Volturno 29, Udin.
Mauro Della Schiava