CONTECURTE. «Vencul»

«VENCUL»
di CHECO TAM
Al veve let Orwell.
Intun pas di »1984» i pareve che il scritôr al fos rivât dongje a ce che al provave lui cuant che al faseve i bruts insiums. Rivâ a un pas dal scuvierzi ce che i faseve cussì tante pôre tal insium ma po dopo sveâsi e no visâsi plui di nuie. Un vencul che al leve indevant cuasi a puntadis, come un di chei senegjâts di pôre che une volte a fasevin viodi pe television.
Des voltis si jere ancje sveât berlant. A voltis invezit i someave, sveantsi, di viodi come une sorte di figure blancje che e scjampave vie e si sfantave intun marilamp… come une sorte di schelendron…  Tite si sfuarçave di pensâ…
Si visave di une cjase, une sorte di vile neoclassiche o di cjiscjel dulà che a jerin robis tremendis: come des fantasimis neris cuntune sorte di cape. Chestis misteriosis figuris a vevin cumbinât alc di spaurôs ma nol jere nie di fâ: la pôre e durave un istant e dopo si sfantave; lui si dismenteave. Ma al veve voie di savê…
Une sere Tite, lât tal jet a buinore, si concentrà talmentri ben e al rivà a pensâ di jessi dentri ta chê vecje cjase…
Di li a pôc al jentrà tal insium. Al jere devant de scjalinade di chê antighe vile. Dongje al coreve un flum…
L’insium cheste volte i sameave cussì vêr…
Insome, Tite al monte sui scjalins e al jentre ta chê vile. Ator e je fumate, di chê basse e blancje che si viôt dopo i temporâi di Istât. Ator de stamberghe a son dai arbui scalembris cun parsore cualchi uciel noturni, forsi çus… barbezuans o no si sa ce…
Passât il puartin al note come des arcjis, des arcjis di piere… come dai altârs…. o… no… dai sarcofacs. Un di chescj al à un tapon di piere scloteât. Tite al va li e lu môf, al è pesant… si sint un strani rumôr… bas, come di alc che al vegni dal profont. Tite al mole il tapon, che al cole par tiere e si spache. Dal interni di chel grant sarcofac si alce une figure… e je dute intabarade di neri, di un vêl neri penç… La figure e je come se e fos resurride. Dal vêl su la muse si notin i dincj, la ridade di une crepe, une crepe di muart…
In pôc timp però la muse di scheletri si trasforme… planc planc si formin i muscui parsore dai vues e po dopo i muscui a vegnin ricuvierts di piel… la fisionomie no je foreste… sì parcè che il muart resurrît al à la muse di Tite!
Tite, tramant come une fuee, al domande: »Cui sêstu? Cui sêstu?»
Il muart i fâs: »Cui sêstu? Cui sêstu?»
Tite: »O soi Tite di Berto Mian!»
Il muart al rispuint: »O soi Tite di Berto Mian!»
Alore Tite al alce la man drete e le slungje bande dal muart. Chel al fâs altretant e lis dôs mans si incontrin…
Al sucêt alc e si sint come un rumôr di spieli che si spache. La figure dal muart si disfe in mil tocs…
Tite si svee… al sint come un pês sul pet…. un pês grandonon e nol rive a movisi… al scugne fâ un trement sfuarç par alçâsi … cheste volte però no si alce. No si alçarà plui.