ATUALITÂT – La vite di Pileu a Cjistielvuardie

Scrivi par canais al è dificil, in cualsisei lenghe. Se dopo si vûl ancje scrivi di argoments storics, lassant in bande la component narative e privilegjant chê didatiche, il lavôr al devente ancjemò plui delicât. Si à di distrigâsi jenfri il pericul di stufâ, la capacitât di proviodi informazions justis e chê di fâlu intune maniere semplice e immagante.
Cui che al scrîf par fruts lu sa ben: la lôr atenzion e je simpri su la puarte, pronte a scjampâ vie, gafade dal prin stimul.
E dut chest lu sa ben, sigûr, ancje Laura Guaianuzzi, la autore di «Jo vivo in un castello – Jo o vîf intun cjistiel», un piçul librut ilustrât (63 pp.; 10 Euro, edizions L’Omino Rosso) che al conte la vite di Pileu, un frut di vot agns che e vîf ae fin dal XIV secul a Cjistielvuardie, in mieç di chel che nô, cumò, o clamìn Friûl.
Il libri, doprant la sielte bilengâl talian-furlan, al conte di chest fantacin, fi di un nobil de Ete di Mieç e de sô vite di ogni dì, partint de descrizion dal cjistiel e rivant a lis cuistions cuotidianis plui naturâls, come mangjâ, durmî, zuiâ, cjaçâ, lavâsi e parfin lâ di cuarp.
I fruts, in cheste maniere, o podaràn scuvierzi cemût che in lôr coetani al viveve e cemût che si fasevin lis robis che ancje lôr, in di di vuê a fasin. Fasint cussì, si dopre la curiositât di ognidun par un argoment che nol è lontan, come che al puès jessi intun manuâl di storie, ma al è sintût «dongje», ancje se tal mieç a son passâts secui.
Di marcâ, in chest lavôr, a son soredut dôs sieltis. La prime e rivuarde la suaze che e je stade doprade par lis descrizions didatichis, ven a stâi un sorte di «trovadôr dal timp», Ulrich, che intun imagjinari puint temporâl al interviste Pileu, permetint subit al letôr di identificâsi in lui e jessi, in cheste maniere, diretamentri interessât aes rispuestis.
La seconde sielte induvinade e je chê relative ae struture dal libri, che no dome e dopre i dissens (opare de stesse autore), par rindi tratîfs i contignûts, ma e alterne ae part descritive, une part fate di «Curiositâts» e une componude di «Domandis di Ulrich». Lis informazions su la Ete di Mieç e vegnin cussì dividudit in «pirulis» e a deventin une vore plui facilis e plasevulis di gleti.
Insome, se o vês voie di imparâ, cence fâ fature, parcè che un falcon al valeve tant che un regâl di gnocis o cemût che si lavavisi i dincj, baste fâ chest viaç tal timp a Cjistielvuardie.
Raffaele Serafini