Sfuei Mensîl Furlan Indipendent
Archivi de Patrie

TERITORIS – AUSTRIE. Lis scuelis austriachis a prudelin un sisteme di grande diversificazion

............

Daspò cuatri agns di scuele elementâr i arlêfs a vegnin distribuîts in diviersis sortis di scuele medie secont lis lôr abilitâts_ Ai 6 di Setembar e je tacade la scuele in Austrie: lu sai di prime man, parcè che ancje par gno fi si son viertis pe prime volte lis puartis de scuele. Ca di nô i fruts a lassin la scuele materne par po jentrâ tes elementârs cun in man la Schultüte, une borse a forme di un piçul cuar plen di dolçuts, une usance viere che e nassè tor il 1810 in Sassonie, te Gjermanie di Soreli Jevât. Dome dopo la Seconde vuere mondiâl cheste usance e je rivade te Gjermanie di Soreli a mont, po si è slargjade ancje tal rest dal teritori di lenghe todescje, cjapant dentri ancje la Austrie.
Sot il ream di Marie Taresie al ven impastanât il sisteme scolastic statâl_ In Austrie la scuele elementâr si clame Volksschule, ven a stâi «scuele dal popul»: chest non al è peât di un pont di viste storic ae istruzion obligatorie a pro des massis puaris. Sot il ream di Marie Taresie al ven impastanât tal 1774 il sisteme scolastic statâl tes tieris de corone. Al sucedè no dome par vie de influence dal Iluminisim, ma e fo ancje une necessitât militâr: i sucès dai soldâts di Prussie cuintri i austriacs a pandevin la impuartance di un sisteme di istruzion plui eficaç.
In dì di vuê la scuele elementâr e je obligatorie par ogni frut tacant de etât di sîs agns, e e dure cuatri agns. Dopo la riforme dal 2000, si fevele di trê abilitâts culturâls: leture, scriture, aritmetiche, dut un cu la ricercje e la elaborazion di informazions.
Tes zonis cun minorancis linguistichis in Carinzie e tal Burgenland (ancje li che e vîf la minorance slovene) e je proviodude la educazion bilengâl: la iscrizion e je libare ancje pai fruts di lenghe todescje.
Mancul violence graciis al sisteme cuntun insegnant_ In dì di vuê un insegnant al insegne dutis lis materiis fûr che la religjon e la lenghe foreste. Il sisteme cuntun insegnant sôl (par todesc Einlehrersystem), dulà che un mestri al insegne dutis lis materiis, al cree un clime cun plui fiducie jenfri mestris e arlêfs in aule, cussì si pues prevignî miôr la violence o il mobbing tra i students. Cun di fat, la violence te scuele al è un grant probleme, une vore discutût tes mediis: secont diviers studis za l’80 par cent dai arlêfs a son stats tibiâts di fats di violence a scuele.
Publiche istruzion e religjon_ Su la fonde dal concuardât cul Vatican firmât tal 1933 il Stât no si met framieç des cuistions religjosis: la impostazion dal personâl docent e la educazion dai insegnants a son compits dome des comunitâts religjosis.
La sielte de scuele secondarie_ Dopo cuatri agns di scuele elementâr, i fruts a frecuentin altris cuatri agns o tune scuele secondarie alte inferiôr (ven a stâi il liceu, sigle AHS) o ben cuatri agns tune scuele secondarie gjenerâl (par todesc Hauptschule). Pe AHS al è necessari vê vôts une vore alts o superâ un esam di amission. La scuele secondarie gjenerâl invezit e je vierte a ducj cence limitazions.
Daspò dal completament dal otâf grât, si pues sielzi tra cuatri scuelis principâls: la AHS-nivel indenant o ven a stâi il liceu, la scuele secondarie professionâl di grât superiôr (BHS), la secondarie professionâl di grât inferiôr (BMS) o la scuele politecniche professionâl. La BHS e la AHS a corispuindin al liceu e si sierin cu la maturitât che e da acès ae universitâts.
La istruzion tes lenghis dai migrants_ In Austrie i fruts in etât di scuele a rivin di passe 160 paîs di dut il mont: stant che dome il 10 par cent di lôr al fevele in cjase cui gjenitôrs par todesc, il ministeri de Publiche istruzion al organize ancje l’insegnament volontari tes lôr lenghis nativis. Il numar plui alt di students di marilenghe no todescje che a rivin di un altri paîs a fevelin il turc, il bosgnac, il crauat, il serp, l’albanês e il rumen. I cors di lenghe si inmanein tes scuelis elementârs e tes citâts grandis ancje a nivel di scuele secondarie. L’insegnament de lenghe mari si davuelç par solit dôs voltis par setemane tal dopomisdì, par un totâl di un pâr di oris par setemane. La partecipazion in classe si regjistre ancje tai certificâts dai students cun conferme de presince e dal vôt.
JANEZ ERAT

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +