ATUALITÂT – Cuant che il passât al devente creatîf

Siore Alda, intant compliments pe idee origjinâl, cemût ise nassude?
Jo o ai simpri vût la passion di tirâ dongje robe antighe – jo o soi casalinghe – e o vevi za fat mostris di ogjiets varis, une dì mi àn domandât se si podeve fâ di gnûf e jo o ai butât li par scherç «fasìnle su lis mudantis». Po ben, la idee e je plasude e cussì mi àn domandât di fâle pardabon, sburtâts de origjinalitât de propueste.
Trop timp i aie cjapât metile dongje?
Di cuant che e je nassude la idee a son doi agns, mi à volut un pôc par pensâi parsore, tirâ dongje il materiâl – ancje se il 90% al è gno – e pensâ a un percors. Si partìs des semencis dal lin, si fasin viodi i filâts e po dopo si rive ai induments fint in dì di vuê.
Cuâl isal il toc che al à interessât il public e cuâl il so preferît?
O disarès che al è plasût dut e a ducj, ancje ai fruts: tantononis lis firmis sul libri de mostre, passe 600! Cumò e je sierade, ma dome parcè che o ai di lâ in feriis. Il gno toc preferît a son un pâr di mudantis dal 1928 fatis cun ingegn e sante scugne: a son tancj tocs di stofe metûts dongje a fâ une mudante taiade dute in maniere particolâr.
E cumò dulà finissial dut il materiâl? Si podarès tornâ a proponile?
Al finìs a cjase mê, o ai ancjemò ator tante confusion… Sigûr si podarès proponile: cun cheste mostre o ai vût tancj preseaments e tante sodisfazion, o soi ancjemò confusionade. Bisugne tignî presint però che i vûl une setemane dome par metile fûr e che bisugnara afitâ un camion par puartâ ator dut! Pai bêçs no son problemis: mi plasarès dome vê cualchi ufierte pes associazions di volontariât che cun lôr o colabori.
(Dree Venier)