LA FABRICHE DAI… LIBRIS. La religjositât de poetesse frute

«A mi dami, Diu, ‘ne piciule / tombe di glerie / niciade da li’ bugadis di vint. / ‘Ne tombe blancie in somp di un cuel. / Dongie ‘l cîl. / E qualchi margarite nassude di me, / zale e lustre / come une flame trimule. / Lasse ch’o sinti, Diu, il ciant de rosade / de òdule / o la rane che grache / basse, tai rivai. / Io ti darai, Signôr, il miò tasê»
La Pauluce (1931-1995) e je une des vôs al feminin plui significativis de poesie furlane. Poetesse frute, come che e je stade definde plui voltis, pe sô capacitât di viodi lis robis cun voi di frut, une vision sancire e limpide che si tradûs di bessole in poesie. E frute ancje pe dibisugne de mame, che si pues lei intal so diari, là che la presince de mari (muarte cuant che je e veve 29 agns) e je costante, fin a la invocazion scrite straziante, pôcs mês prime de muart: tormentade dal mâl, e scrîf  «mame no puedi plui, ven a cjomi».
E chest al è il secont teme de sô poesie, chel de muart. Tant che la sô poesie e pues jessi viodude ancje tantche la costruzion di une sapiente Ars moriendi, une preparâsi pal moment fatâl: il sens de pierdite al samee rezi les peraulis stessis in tal lôr incjadenâsi une cun chê altre.
Dute la ispirazion de poetesse e si insuaze jenfri chescj doi temis: il passât, cu la considerazion di dut ce che si piert cul lâ dal timp, dai agns, dut ce che e si piert ogni dì. E jenfri chestis robis, cence altri, il jessi fruts, la infanzie e i afiets de infanzie, gjoldûts come che dome i fruts a san gjoldîju. E di chê altre bande la privazion des piçulis robis che a àn jemplade une vite.
Ancje il taramot (Nadia e jere di Buie), sintût tantche un presentiment di muart, al è drenti adimplen in cheste suaze, cussì ben come lis personis che a deventin protagonistis des sôs evocazions: Riccardo Castellani (altri grant poete furlan), Barbe Vitorio, Vigj e Vitorio.
E dute la sô vision dal mont e dute la sô maniere di tradusi in poesie ce che e sint a son bagnadis di une atmosfere religjose. La autore e jere istintivementri religjose e ancje di uen religiositât cunvinte e fuarte. Tant che ancje il so cjalâ la nature al è religjôs. Il paisaç che jê e ame tant, il Friûl des culinis, al è come vuluçât in cheste religjositât.
Laurin Zuan Nardin