LA FABRICHE DAI… LIBRIS. Nus salvarie la poesie?

Intal vivarôs dibatit sul avignî dal furlan che si è davuelt intai ultins mês, un dai slogans che si è cirût di pandi di plui, ancje in maniere un tic masse strumentâl, al è che a salvâ il furlan e varès di jessi la poesie.
Un compit une vore ambiziôs e forsit no masse cirût dai nestris poetis. No pe lôr tristerie ma pe nature intrinsiche di ce che la poesie e je e di cemût che e ven sintude. Ven a stâi un scandaiâ une vore intim inte proprie anime dulà che dome il doprâ une lenghe personâl, par solit la proprie varietât furlane, magari reinventade di pueste, al permet di svicinâsi ae veretât des robis. E o stin cjacarant di une espression artistiche che no je dialetâl, ni di un pont di viste linguistic ni soredut par chel che al inten lis tematichis tocjadis, e che rive a pontis une vore altis ancje cuant che e ven confrontade cun chê scrite intes grandis lenghis.
Al è un fat che la poesie e vignedi considerade la ponte di diamant de leterature furlane. Di Pasolini in ca a son tancj i autôrs impuartants, de Cantarute a Zanier, di Giacomini a Bartolini, di Vit ae Vallerugo, di Valentinis a Tavan e a Cappello, nome par fâ cualchi non, che a son rivâts a sedusi ancje la atenzion de critiche taliane tant di fâle fevelâ di un »Caso Friuli».
L’ultin esempli di segnalazion a nivel nazionâl a son stadis lis bielis peraulis spindudis dal poete gjenuês Franco Loi sul Sole 24 ore, cjacarant dal ultin libri di poesiis di Zuan Laurin Nardin »Il disCori dal timp».
Chê furlane e je dut câs une produzion une vore eterogjenie, cun sensibilitâts, tematichis, stîi une vore difarents fra di lôr. Ma no stin a pretindi masse dai nestris poetis no son lôr chei che a àn di olsâ di plui pal nestri avignî.
Maurizio BIASIZZO