ATUALITÂT. 1986: al nas il Motâr

«Clamìnsi Motârs e che e sedi finide!» Moreno Persello, pari de Bikerfest (chest an in program simpri a Osôf dai 17 ai 20 di Jugn 2010: info www.bikerfest.com), al ricuarde cussì la jessude di Jerrì di Rivis Darcjan, che cun altris amîs intune sere di Avrîl dal 1986 a Sant Denêl a forin i testimonis/atôrs de nassite di une gnove peraule furlane.
Chest neologjisim di fat al è vignût cussì dopo oris di discussions «Si sin cjalâts in muse e o vin capît che, se cheste peraule par inglês si voltave come «Bikers», par spagnûl e jere «Moteros» e par francês «Motards»; il leam al jere e ancje il simbul al jere facil di cjatâ: la acuile, il steme araldic dal nestri Friûl» al continue Moreno Persello «Cualchi an dopo (al jere il 1989), la nestre sede si jere trasferide li dal «Biker Bar» di Vilegnove di Sant Denêl e ta chê volte i vin domandât al plevan dal paîs, pre Roman, se al podeve dânus une man par uficializâ la peraule: e cussì tal vocabolari di lenghe furlane vuê si cjate il tiermin «Motâr» cu la definizion di «Motociclist» o miôr «Biker»».
Dal stes grup di «motârs» e je nassude tal 1987 ancje la Biker Fest, destinade a deventâ il cuart motoradun european par spetacolaritât e impuartance: une piçule rivoluzion che e voleve ancje dimostrâ une regjon dimostrâifarente, moderne, indevant in Europe tal so cjamp. E e faseve e e fâs viodi ancjemò vuê al mont che «il Friûl nol è dome vilotis», ma ancje une tiere dinamiche, che e sa stâ al pas cui timps.
Christian Romanini