ATUALITÂT. Zoventût cjargnele cun snait

Dut al è scomençât inmò tal 2005 cuant che in Cjargne, tai Comuns, al è rivât il progjet presentât da Societât Alpe Adria Energia S.p.A. relatîf ae realizazion di un eletrodot aerei di interconession transfrontaliere che di Würmlach, in Austrie, passant pe strente Val de Bût al varès di rivâ a Somplât. L’eletrodot, cun traliçs di 30/60 metris di altece, di 220 KW, campadis di 300 metris e fassis disboscadis di 60 metris al ruvinarès il paisaç di cheste valade cence pensâ aes conseguencis su la salût dai citadins par chel che al rivuarde l’incuinament eletromagnetic.
Un trop di zovins cjargnei de Val de Bût, cjapâts di un sens profont di apartignince al propri teritori, a àn sintût la necessitât di cjatâsi insieme clamantsi «Carnia in movimento» (www.carniainmovimento.it) par viodi e par studiâ ce che a podevin fâ in difese de proprie tiere.
E cussì a àn scomençât a organizâ incuintris informatîfs cu la popolazion di dute la Valade. Ma no dome! Si son dâts di fâ a butâ jù e presentâ, ai organisims competents, osservazions tecnichis ben precisis, a son lâts a cjacarâ cui politics… La lôr non vûl jessi une rivoluzion cuintri cui che al vûl meti in pîts chescj progjets, il lôr «no» nol è viers un «no» eletrodots, ma viers une politiche sbaliade, fondade dome su confronts tra oms di podê e no di dialic ancje cul popul e cu lis istituzions dal teritori. A son cuintri lis infrastruturis caladis dal «alt», cun pôc o nissun rispiet de int che e vîf sul puest e progjetadis dispès a taulin cence un minim di cognossince dal teritori e sul teritori.
Dongje de bataie cuintri l’eletrodot il comitât si sta dant di fâ ancje sul sintût probleme de privatizazion de aghe e cuintri il slargjament de gjave di zes di Dentramp informant la popolazion in cont a ce che al sta sucedint e po dopo cirint di cjatâ e proponi soluzions e alternativis ai problemis.
«Carnia in movimento», vuidât di Renato Garibaldi, nol è dome chest! Se di une bande al sta in vuaite, come un gjal, tal so teritori di chê altre no si dismentee des propriis lidrîs, des propriis tradizions, de proprie culture e chest lu fâs organizant, dilunc dal Istât, interessantis seradis culturâls.
Insome zovins cjargnei sveâts, atents a viodi ce che al sucêt fûr di cjase e se al covente pronts cun dignitât a lâ intes placis par bati i pugns, domandant rispiet pe int, pal ambient e pal teritori.
Marta Vezzi