ATUALITÂT. Fruticulture? Parcè no

Fevelâ di agriculture in Cjargne al è un pûr eufemisim: i pascs verts, la vite sane de mont, la stale – mai cun mancul di cuatri vacjis – la «mê» latarie, a son aromai lûcs comuns, romantics cence altri,  di un timp che al è lât par simpri. Lis tantis cunvignis e taulis tarondis de politiche di turni no àn puartât a nuie. Lis peraulonis a rivochin ancjemò, intant che un slavin al riscje di fâ saltâ fûr il riulut prime armoniosementri util ae mont, e cumò invadût di une vegjetazion deventade indomabile. E culì o tocjìn un altri pont che al dûl: lis sistemazions idraulichis forestâls. Lis dôs robis, lu dîs il bon sens, di là dai compits dovûts de regjon, a varessin di intersecâsi e di lâ in paralêl par fâ in maniere che la mont e sedi sigure. Si diseve che i vêrs paladins des monts a son soredut i siei abitants: salvâ la mont al vûl dî salvâ la planure. Juste, ma chescj difensôrs no vivin dome di aiar: par restâ sul puest ur coventin struments ad hoc, che ae fin a tornaressin utii a ducj. Un teritori ben tignût al elimine cuasi dal dut i inspietâts, ma prevedibii atacs atmosferics, e duncje i finanziaments publics par meti un blec a saressin sparagnâts. Par difindi la integritât dal teritori e covente une agriculture difondude, e cun chê une zootecnie che la Cjargne no pues svantâ; une alternative e podarès jessi la fruticulture. Naturalmentri, une fruticulture moderne, cui sistemis di coltivazion e cu lis varietâts plui domandadis: fasìnsi une idee zirant pes Provinciis autonomis di Trent e di Bolzan. Si puedin praticâ doi gjenars di fruticulture: chê maiôr (coltivazion di miluçârs, di piruçârs, di siespârs, di pierçolârs) e chê minôr (frambue, cerniculis, ue grispine e  trisculis). Cheste fruticulture  in Trentin e je rivade a formis di specializazion tecniche e di capacitâts imprenditoriâls di prin ordin, cjapant dentri ancje la piçule latarie di paîs e trasformantle in yogurtarie.
Chestis coltivazions a puedin contribuî a mantignî plui coltivât e duncje plui plasevul l’aspiet des vals de Cjargne. Il paisaç che al trasmet la imagjin de trascurance e dal abandon nol è dal sigûr l’ideâl par tirâ dongje i turiscj. Tra il dî e il fâ e je di mieç la volontât di bande di ducj: dai cjargnei, che a àn di meti di bande lis diatribis leadis al frazionament dai fonts ancjemò coltivabii e dulà che i confins (purtrop) a paronin, ai politics regjonâi che a àn di fâ front comun e di dâ i struments necessaris par copiâ e magari par miorâ il model dal Sudtirôl, e tal stes timp proviodi al riordin  fondiari che nol à di deventâ la scuse buine par no fâ.
DINO TEMIL