Intal secul passât, i furlans a son emigrâts
dal paîs de Basse par cirî fortune a Parîs
Intai prins cincuante agns dal Nûfcent, Pucinie, une piçule vile inte Basse Furlane, paîs di agriculture e pôc altri, come pardut no ufrive cetantis pussibilitâts di fâsi une vite, di vuadagnâ bêçs par tirâ sù une famee. I siôrs a jerin pôcs e si faseve fature a lâ indenant.
◆ Tancj di lôr a decidevin di lâ vie a cirî fortune lontan. Cui in Sudameriche, cui in Australie, cui in Gjermanie e cui in France. Une storie di emigrazion come tantis che il Friûl e che i furlans a cognossin ben. Dome che la storie che o sin daûr a contâ cumò e somee di no crodi, parcè che o fevelin di trê personis di Pucinie, doi fradis e un nevôt, che a son deventâts cicliscj professioniscj in France: Giuseppe Sciardis, classe 1912, so fradi Gino, classe 1917 e il plui zovin Ugo Anzile, classe 1931.
E il biel al è che no si varès di fevelâ dome di Giuseppe, Gino e Ugo, parcè che la dinastie e je ancjemò plui largje, stant che bisugne contâ ancje Robert Sciardis, classe 1939, professionist par trê agns cu la Dunlop e la Mercier, pûr se tal principi dai agns Sessante e in garis no di nivel alt. Cun di plui, scrusignant intai strolics, si cjate ancje il non di Guido Anzile, classe 1928. Ducj imparintâts, ducj lâts vie di Pucinie e ducj professioniscj in France.
◆ Pensâle in dî di vuê, e je une robe straordenarie.
A contâle dute, si scuen ricuardâ che la seconde vuere mondiâl e veve fermât dut, massime lis ativitâts sportivis, par almancul cinc agns, dal 1941 al 1945 e par ducj i atletis a son stâts agns une vore dificii. Fausto Coppi, par nomenâ un, al à pierdût ducj i siei agns miôr par vie de vuere e, dut câs, al è rivât a deventâ il “Campionissimo”: cuissà ce che al varès fat cence la vuere!
Gino Sciardis al è nassût a Pucinie ai 28 di zenâr dal 1917. Come tancj siei paisans, ancje lui, ancjemò zovin, al lasse il Friûl par lâ in France, dulà che, tal 1938, al scomence a cori come professionist. Al è un coridôr fuart, resistent, di chei che si cjatin simpri denant, di chei che no molin mai, e cul timp al devente une firme cognossude in chel Paîs.
◆ Il moment plui grant de sô cariere al rive tal Tour de France. Te 11ª tape, ai 12 di lui dal 1948, la Marsilie-Sanremo di 245 chilometris, Gino Sciardis al rive prin, tignint daûr parfin un campion tant che Louison Bobet, che in chê dì al veve intor la maie zale. E cussì il furlan di Pucinie al fâs la storie: parcè che chê e jere la prime volte, di simpri, che il Tour de France al rivave in Italie. Ise stade une casualitât? Fasìn fature a crodilu, parcè che e pâr propit une storie dal destin: chel Tour dal ’48 al jere il Tour di Gino Bartali, chel passât ae storie parcè che, cul so trionf in rimonte, al veve judât a distirâ i spirts talians intant dai fats dramatics dal atentât a Togliatti.
◆ Juste tal mieç a chê epopee taliane, un zovin nassût tra i cjamps di Pucinie al lave a segnâ la sô piçule, grande vitorie personâl. Doi agns dopo, tal 1950, al torne a vinci une tape, la Lion-Dijon, e chel stes an, ai 28 di lui, al deventà citadin francês: un non che, tant che al veve za un sun francês, di culì indenant al deventà francês pardabon, cun cjase, famee e ativitât professionâl di chê altre bande dal confin.
◆ Une gnece di Gino, restade a Pucinie, e veve doi fîs, Guido e Ugo Anzile, ancje lôr nassûts te stesse vile, che a son lâts daûr des olmis dal barbe. Guido, il plui grant, nassût tal 1928, al è deventât professionist tal 1952, cuntune vitorie di tape tal 1956 e plui di un plaçament tra i prins.
◆ Ugo, il plui zovin, al è nassût a Pucinie ai 2 di Fevrâr dal 1931. Tant che so barbe Gino, ancje lui al lasse il Friûl par lâ a fâ il coridôr in France, e al devente professionist tor il 1950. La sô cariere no à vût, forsit, il sflandôr di chê dal barbe, ma no i mancjin sodisfazions impuartantis: tal 1952 al vinç la classifiche gjenerâl dal Tour de l’Ouest, tal 1954 al fâs so il Circuit de Plouay, e in cariere al cor cuatri edizions dal Tour de France, lant une vore dongje a un sucès di tape intal 1955. Come Gino, ancje Ugo al devente citadin francês, ai 15 di Otubar dal 1954. Al mûr a Metz, in France, ai 25 di Avrîl dal 2010, a 79 agns: l’ultin dai trê a lassâ chest mont.
◆ Cheste e je une storie di une piçule vile furlane che, cu la fuarce dai siei fîs, lâts vie par no tornâ, gjavant cualchi zornade di vacance vie pai agns, e à fissât il sô non su la mape dal ciclisim internazionâl. Sciardis e i Anzile no son forsit nons che ducj i tifôs a cognossin, sigûr no son nomenâts come chei di Bartali o Coppi, dut câs par Pucinie e pal Friûl a son la prove che, ancje partint di un paîs piçul, cun cetante fature e il cûr simpri salt si pues rivâ a scrivi une pagjine de storie plui grande, fintremai tal Tour de France. E une storie cussì no si dismentee a facil. ❚
::::::::::::::::::::::::::::::::::::::::::::::::::::::::::::::::::::
Tantis garis, sucès preseâts e sodisfazions sportivis in agns di ativitât come professioniscj
Gino al à vinçût ancje dôs tapis al Tour de France
Il prin al è stât Giuseppe, che al à corût il Zîr di Italie dal 1936, cence rivâ insom, cu la maiute de scuadre “Dei”. Al jere l’an che Gino Bartali al vincè, cu la Legnano, denant di Giuseppe Olmo de Bianchi e Severino Canavesi de scuadre di Ganna. Fausto Coppi al veve 16 agns e al veve ancjemò di vignî fûr.
◆ In cuindis agns di ativitât sportive, come ciclist professionist, Gino Sciardis al à corût cinc voltis il Tour de France, massime cu la scuadre de Mercier. Siet sucès in dut, cjapadis dentri dôs tapis inte “Grand Boucle”, intal 1948 a Dijon e intal 1950 a Sanremo, dulà che forsit al à respirât aiar plui di cjase. Cun di plui, al à vinçût trê tapis al Criterium dal Delfinât, une al Zîr dal Lussemburc dal 1949 e une intune corse clamade GP du Pneumatique tal 1951. In cariere al è rivât denant di ducj ancje intune cuarantine di corsis no cognossudis ca di nô, come il Zîr dal Maroc. Lis cronichis lu cjatin intai prins vincj intune vore di corsis preseadis come la Paris-Tours, la Paris-Roubaix e la Milano-Sanremo.
◆ I strolics sportîfs a contin che Ugo Anzile al à corût come professionist par vot agns, dal 1950 al 1958, prime cu la scuadre de Peugeot Dunlop e daspò ancje lui cu la Mercier. Intal 1952 al è rivât a vinci dôs corsis: il Tour de l’Ouest e la “Poly de Lyon” e, intal 1954, dopo di une biele Paris – Roubaix, al à vinçût il Circuit de Plouay. In dut, Ugo al conte une dozene di vitoriis. Intai ultins agns, tancj plaçaments di nivel une vore bon e, dut câs, nissun sucès. ❚
::::::::::::::::::::::::::::::::::::::::::::::::::::::::::::::::::::::::
Cuatri su passe trê mil
Intai agns Trente dal secul XX,
il sburt a emigrâ al è stât une vore fuart
I archivis a contin che tai agns Trente a Pucinie a jerin sù par jù 3.200 abitants: il numar plui alt de storie di cheste comunitât tal mieç de Basse furlane, fra Rivignan, Palaçûl, Muçane (patrie di Elio Blasigh, un altri furlan emigrât in France ancje par cori in biciclete), Cjasteons e Talmassons. Di chê volte, chel numar al è lât in mancul, massime par vie de miserie e il pôc lavôr di chei agns, che al à puartât tancj a lâ vie. I Sciardis e i Anzile, natîfs di Pucinie, a son dome un dai esemplis di chei che a son partîts. Cuatri di lôr a son rivâts a deventâ professioniscj intal ciclisim e chei che a son restâts a son une vore braurôs par lôr.
◆ Dut câs, la storie dai Sciardis e dai Anzile e conferme une altre veretât: il borc al à une grande anime sportive. Simpri intal ciclisim, il stes paîs al à viodût nassi Franco Zat, professionist intai agns Setante cu la scuadre de Cosatto Marsicano dal diretôr sportîf Gino Bartali. Di Torse di Pucinie e je Tamara Versolatto, campionesse taliane dai zovins, su strade e su piste.
◆ Che al sedi merit dal aiar, da la aghe dal Stele, o di alc altri che si sint e no si capìs? No covente savêlu, baste cjalâ i risultâts. ❚
