SLOVENIE
Une des primis leçs che la Cjamare di Stât di Lubiane e à votât dopo lis elezions dai 22 di Març stâts, e la nassite dal gnûf guvier di centridrete dal Prin ministri Janez Janša juste doi mês plui tart, e je stade chê che e va a scancelâ il dirit di vôt aes elezions locâls (duncje pai Comuns, viodût che in Slovenie no esistin ni lis Regjons ni lis Provinciis) pai residents no citadins ni slovens ni di un Paîs de Union europeane. Cemût mai dute cheste urgjence? Bisugne tignî cont che in ducj i 212 ents comunâi si tornarà a votâ par elei gnûfs Conseis e Sindics ai 15 di Novembar di chest an, duncje e je une dade di timp une vore curte in tiermins politics. La decision di scancelâ une leç in vore za di 24 agns e je justificade dal fat che, stant al Partît Democratic Sloven (SDS-Slovenska demokratska stranka) di Janša, la Costituzion e previôt che il vôt al sedi leât al fat di vê la citadinance slovene, po i tocje aes leçs stabilî se e cuant che i citadins forescj residents a puedin votâ. In ogni câs, chescj forescj ‘di serie B’ no puedin candidâsi par un puest in Comun.
◆ La Slovenie e à za di cualchi an une popolazion in cressite lizere, però dome midiant i imigrâts. Su un totâl di 2 milions 110 mil abitants, chei a vê plui di 18 agns a son cirche un milion 700 mil; in dut il Paîs no podaran plui votâ pal ent locâl li che a vivin 104 mil di lôr, 22 mil dome te capitâl Lubiane. Di dulà vegnie la plui part di cheste int, che e vîf, e lavore, e paie lis tassis in Slovenie a voltis di agnorums? Dai Stâts nassûts dal sfantament de ex Jugoslavie, prime di ducj la Bosgne e Erzegovine, il Cossovo, po la Macedonie dal Nord. La leç pal cambi di citadinance e dîs che al covente dimostrâ di jessi residents in Slovenie par almancul 10 agns di file par podê fâ domande.
CRAVUAZIE
In Cravuazie intant ducj i forescj rivâts par lavôr tal Paîs dopo il prin an di residence a varan l’oblic di passâ un esam di lenghe cravuate almancul di nivel A1, nivel base internazionâl par cui che al studie une lenghe foreste. Dut chest secont il guvier di Zagabrie par integrâ di plui cui che al decît di vivi in Cravuazie, cualsisei mistîr che al fasedi. I permès, fin cumò di rinovâ an par an, a puedin rivâ fin a trê agns. ❚
