E le clamin Istât

La energjie de nature si insede tai nestris pinsîrs e nus mene ideis gnovis, intune sorte di strieç che si rinove ogni Istât, cu lis zornadis lungjis e lusorosis che nus stuzighin a restâ plui timp difûr, gjoldisi une cjaminade te nature, une cene intun prât o une gnotolade a cirî lis stelis tal cîl.
◆ Dispès, dut câs, il scjafoiaç dai mês plui cjalts nus gjave vie lis fuarcis e nus lasse flaps e cence voiis, sierâts dentri in cjase, in spiete di une svintulade di aiar che nus gjavi la sflacje: e je la “canicule” (dal latin “dies caniculares”, o ben “dîs dal cjanut”, par vie che il Soreli si cjate inte costelazion dal Canis Maior, che si pues ricognossile de lûs de stele Stele di Betlem/Siri), za cognossude dai nestris vons, che a metevin in vuaite di chestis zornadis sfolmenadis e insidiosis. In dì di vuê, chest periodi al è ancjemò plui fûr dal vade, cui termometris rivâts a temperaduris record in dute la Europe, li che cheste dade di timp de fin di Lui ae fin di Avost e ven ricuardade cun diviersis mitologjiis, dispès peadis a avigniments negatîfs, ancje se il non al reste scuasit dapardut compagn, cul “canícula” spagnûl e “canicule” francês che a deventin “dog days” par inglês e “Hundestage” par todesc (i dîs dal cjan). In Finlande e Svezie, dut câs, a son cognossûts come “dîs fraits”, par vie che il mangjâ al pues lâ di mâl o che lis feridis a puedin infetâsi.
◆ Il cjaldon e l’umit a crein il “scjafoiaç” (parcè che al gjave il flât e ti scjafoie), cognossût tant che “afa” par talian, peraule misteriose che forsit si pues peâ al grêc “haphé”, o ben “impiâ” (par vie de lûs dal soreli che e je al nivel massim), ancje se a son diviersis teoriis che le fasin derivâ di altris tiermins. Par inglês o cjatìn “muggyness”, suntune evoluzion di “mug” che une volte al lave a marcâ la plovisine fine che si forme cu la fumate e che dopo al è passât ae umiditât tal cjalt. Par spagnûl o vin il “bochorno”, che al rive dal latin “vulturnus”, ven a stâi un aiar mediterani di Sudest une vore cjalt che al scjafoie. Par prionte, “bochorno” al ven doprât ancje par definî chê sensazion di malcuiet che si prove cuant che si è a disasi o si prove vergogne. Par todesc si dopre “Schwüle”, di un tiermin cul significât di “scotâ, sbrovâ”, ancje se il sostantîf al pues jessi bon ancje par descrivi situazions di disasi o vergogne, o ben par intindi sensualitât.
◆ Clâr che vie pal Istât (peraule che cumò o dopri al masculin, par lâ a marcâ la stagjon, biel che se o volìn lâ a definî il timp di feriis le mudìn al feminin) il periodi di sut al pues lassâ la volte al brut timp, cun ploiis ancje fuartis e burlaçs che a puedin mudâsi in events atmosferics estrems e pericolôs. Nol è plui di maraveâsi a sintî lis previsions che a metin in vuaite de bissebove, chel madracat straordenari de mitologjie popolâr bon di mangjâsi ancje dut un bo, e magari cussì no – lu vin imparât ancje masse ben in chescj ultins agns – in stât di gloti tal so gosolâr ancje arbui, tets e fintremai cjasis. Mancul evocatîf il tiermin “tornado” doprât intes altris lenghis europeanis, che al ven dal spagnûl “tornada”, o ben “temporâl”, su la fonde dal verp “tronar”, o ben “zirâ”, tant che l’inglês “twister”, par vie che l’aiar al zire intun mulignel (ancje clamât “whirlwind”, o ben “aiar in cercli”).
◆ Come che e dîs la tradizion, no ‘nd è mai stade ploie che il bon timp nol sei tornât, si che, al è impussibil fermâ un furlan che al vedi decidût di cjapâsi feriis (magari ancje dome par stâi daûr dal ort, ancje se a son simpri di plui chei che a van a cambiâ aiar par uns cuatri dîs lontan di cjase) e gjoldisi lis vacancis. Intal mont roman “Feriae” a jerin i dîs dedicâts al cult public e privât, li che no si podeve convocâ i comizis, che dopo cul cristianisim a son deventâts i dîs di celebrazion di un sant. In dì di vuê, lis feriis a son il moment di polse, li che no si lavore, biel che “feriâl” al va a marcâ i dîs di lunis a vinars che no son dedicâts a figuris principâls (duncje i “dîs di vore”), tant che la Madone o il Signôr (la sabide e la domenie, ven a stâi i “dîs di fieste”, che però par francês a vegnin ancjemò ricuardâts tant che “jours fériés”). Par inglês, lis feriis a son lis “holidays”, e duncje i “dîs sants”, biel che par todesc o vin “Ferien” (il periodi di vacance), ma ancje “Urlaub”, che al ven dal tiermin “Erlaubnis”, ven a stâi “permès”, tal sens che te Ete di Mieç ai cavalîrs ur vignive dade la pussibilitât di molâ il servizi par un periodi, e di li cheste concession e je dopo passade a marcâ lis zornadis di timp che si cjapisi dal lavôr. Par francês, di fat, o cjatìn “vacances”, compagn dal spagnûl “vacaciones” o dal talian “vacanza”, che a divegnin dal latin “vacans”, ven a stâi “che al mancje, che nol è”, duncje il vueit tal cjâf lassât de mancjance dal lavôr o ancje la lontanance fisiche di cjase. Il tiermin al à viazât lontant, rivant ancje tal inglês merecan “vacation”, li che duncje no si à a ce fâ cun zornadis speciâls dal lunari, ma dome cu la voie di lâ a torzeon ator pal mont.
◆ Za che o vin nomenât i dîs di fieste, impensìnsi ben che “ferragosto” (lis “feriae Augusti” inviadis dal imperadôr Otavian intal 181 prin di Crist par ricuardâ la fin dai lavôrs tai cjamps) par furlan al è la “Madone di Avost”, te stesse maniere dal “Feast of the Assumption” inglês, de “Asunción de la Virgen” in Spagne, de “Assomption” in France o dal “Mariä Himmelfahrt” todesc (il viaç intal cîl di Marie). Se di no, o podìn ancje clamâlu “Mitte August” (todesc) o mid-August (inglês), par lâ a marcâ che o sin a miezis dal mês.
◆ Dopo vê lassât l’ort o lis bestiis di cjase tes mans di cualchi bon amì o di cualchidun di famee, si pues decidi di partî, cun destinazions che a van dal mâr ae mont, no masse lontan o fintremai tal forest (cu la stesse etimologjie dal inglês “foreign”). Par cui che al è amant de splaze, o ricuardìn che il tiermin si è origjinât dal latin “plagia”, o ben estension di tiere, che forsit al pues jessi rivât dal grêc “plaghia”, o ben cueste, pendence, flanc, ancje se cualchidun al ricuarde ancje la someance cun “pelagos”, ven a stâi mâr. Intes altris lenghis o cjatìn il talian “spiaggia”, la “playa” spagnole, la “plage” francese. L’inglês “beach” intal principi al vignive doprât pai claputs lissâts de aghe che si cjatavin te rive dal mâr e po dopo invezit al è lât a marcâ dute la zone de cueste. In cualchi test poetic o cjatìn ancje “strand”, che al è il tiermin doprât ancjemò in dì di vuê par todesc.
◆ Il tiermin latin “maris” al à concuistât diviers popui, fintremai i todescs, che a clamin il mâr “Meer”, biel che il lât lu nomenin “See”, tiermin che par inglês al à dade vite a “sea”, o ben mâr, li che invezit il “lacus” al devente “lake”, fale che no si ledi sù in Scozie par clamâlu “loch”. In Olande, a àn pensât ben di doprâ “See” par mâr e di clamâ il lât “Meer”. In tantis lenghis slavis o cjatìn “jezero” par lât (o lâc), biel che in Islande o vin “vatn”, che al diven di “water” o ben “aghe”.
◆ Cualchidun di voaltris al varà miôr lâ a cjapâ il frescut parsore di cualchi piche in mont (che o ricuardìn che par furlan e je peraule feminine, e no masculine, che invezit al è il gjenar par definî l’univiers, o ben “il mondo”, par talian). La “montagne” e je une formazion che e rive di “montanus”, duncje peât al “mons, montis”, alc che si alce sù de tiere e si bute fûr rispiet al plan. Di li a rivin ancje i tiermins francês “montagne” (ancje se di li al è saltât fûr ancje il tiermin “montaigne”, che o cognossìn par vie dal filosof), il spagnûl “montaña” e il portughês “montanha”, il rumen “munte”, ma ancje l’inglês “mountain”. Altris lenghis gjermanichis a àn vût miôr peâsi al concet di puest elevât, che duncje al devente “Berg” par todesc (la mont tant che cjadene o paisaç e je “Gebirge”), svedês e danês. Al va ricuardât che ancje “Burg” (o ben “fuartece”) si è origjinât de stesse çocje, dant vite ancje al latin (e dopo al talian) “burgus”. Tes lenghis slavis lis montagnis si puedin clamâ “gora” (o “hora”), ma ancje “planina” (che al è probabil che al rivi di “polje”, o ben “cjamp”, “plan”, intindût come alture li che si puartave a passonâ lis bestiis, che e je par altri la situazion che si cjate in Slovenie).
◆ Par polsâ, dut câs, nol covente cjapâ e lâ vie lontan di dut e di ducj. Si pues gjoldise ancje a cjase o dulintor, magari cui pîts te aghe frescje di cualchi nestri flum e tes mans un biel libri, o magari un gjornâl, miôr ancjemò se dut par furlan, come il sfuei che o sês daûr a lei in chest moment. ❚