La “Nize austriache”

Se il baron Carl von Czoernig al spassizarès ator par Gurize in dì di vuê e al sintarès ripeti che in citât nol è nuie ce fâ, nol larès indenant rassegnât, ma facil che i regalarès al interessât il so libri “Gorizia, la Nizza austriaca”. Chest il titul de edizion taliane dal 1969, risultât de otime traduzion dal piranês Ervino Pocar: in chê a son unificadis sedi la opare menzonade te ultime pontade, sedi une plui curte jessude tal 1874.
◆ Propit in cheste ultime al comparìs pe prime volte il biel sorenon di “Nize austriache”, une definzion che e cjatave il so sens no tant, come che si podarès pensâ, tal riclamâ lis cualitâts architetonichis, ma pluitost tal indicâ la marcjade vocazion climatiche di Gurize pes permanencis di cure invernâls. “Nissun altri lûc de monarchie austriache, gjavant la lontane Dalmazie meridionâl” al jere, par lui, adat a chestis ativitâts in maniere compagne. Cussì, par un cuaranteni, fintremai al tonâ de Prime vuere mondiâl, la citât si presentà come mete bramade par une vore di esponents de aristocrazie austroongjarese. Ancje la cumbinazion temporâl e zovà a chest sucès turistic: Czoernig al rivà in citât tal stes an che il Venit al passà ae Italie. Par chest, la eventuâl concorence venite intal Adriatic setentrionâl imperiâl no podè concretizâsi.
◆ Inamorât dal clime, des bielecis naturâls e ancje de int, intai doi lavôrs menzonâts l’erudît boem al fo bon di contâ in mût complet tieris che, fin a timps dongje di lui, a jerin ancjemò une “incognite pal forest”. Al descrivè la posizion di Gurize come “paradisiache”, “circondade di bielis culinis e di cjadenis lungjis di monts”.
◆ Partint dai elements plui antîcs, come il Cjistiel (“il simbul de citât”), lis viucis sot e lis vecjis cjasis che a “rivochin la prime Ete di Mieç”, al tocjà daspò i cûrs de vite economiche: vie Rascjel, che al definì “centri dal cumierç”, e la Place Grande (vuê “della Vitoria”), dulà che, par la sontuositât dai siei edificis e esercizis, si concentrave “il corîr dal mont elegant”. Chestis frecuentazions a cjatavin une continuazion naturâl inte plui setentrionâl vie Carducci (toponim corint), cui siei albiercs rafinâts e i palaçs nobiliârs. Tant che amant de salubritât, nol podeve no risiervâ une atenzion speciâl ai zardins e ai parcs, dulà che, cu la vignude de Primevere, e rompeve fûr “une imense cuantitât di rosis che a jemplin l’aiar cuntun profum che al incjoche”. Al fo il zardin de vile di Vielm von Ritter, tal rion di Stracis, a colpîlu di plui.
◆ Tant al sarès ancjemò di dî sul impegn di chest prolific studiôs inte promozion de Contee e de sô capitâl. Par cumò, e par concludi, o podìn dî di vê motîfs valits di crodi che al sarès content de Gurize di vuê: cu la plui grande superficie di vert public par abitant fra i cjâf lûcs talians, si presente inmò come une “citât zardin”. Aspiet, chest, che par fortune nol è stât trascurât di GO! 2025, in gracie de iniziative “Verde Capitale”. Forsit, almancul di chest pont di viste, la Belle Époque par Gurize no je mai finide. ❚