Autonomisim: movisi o murî…

In regjon, e in Friûl ancjemò di plui, o sin ae vee di un moment politic determinant. Comunâls a Triest e Gurize e in cualchi altri comun te Vierte dal an che al ven, politichis di Rome prime de Sierade DAL 2027, regjonâls e lis gnovis/vecjis Provinciis te Vierte dal 2028. Se o lin a cjalâ la situazion cu la lint dal autonomisim, plui di cualchi nûl si olme sul orizont.
◆ Scomencìn cul dî che nol pues esisti un statût di autonomie cence un partît autonomist che al marchi la diference cul podê centrâl di Rome in man ai partîts talians. Al baste cjalà il Sudtirôl, dulà che il SVP no dome al fâs capî che li no je Italie, ma al dopre il podê cence se e cence ma. O ancje inte Vallée (di Aoste) dulà che, o cu la çampe o cu la drete, e je simpri la Union Valdotaine che e da lis cjartis. In Sardegne il Partito Sardo d’Azione al à une grande tradizion e un rûl. In Sicilie altris podês a garantissin la autonomie de isule… E chi di nô?
◆ In Friûl i partîts autonomiscj no àn rivât mai a jessi di racuelte. A son, ma relegâts a une presince limitade che no à mai rivât a deventâ gjestion reâl de aministrazion. Dai timps di Tessitori a chei dal Moviment Friûl fintremai ae “Primavera friulana” di Convergenza per Cecotti no son mai lâts plui inlà di une testemoneance identitarie, plui culturâl che politiche. Lis precondizions, cu la presince di minorancis linguistichis storichis todescjis, slovenis e furlanis che a domandaressin une vision diferente rispiet al podê di Rome, a esistin. Ce mancjial? E mancje la cussience che la lenghe e fâs la diference, che la identitât e je denant de ideologjie. Che la culture, ven a stâi cemût che un popul al dopre lis risorsis che al à a disposizion, e je ae fonde de diference e e ven prime dai schiriaments. E alore ancje chi di nô al covente, te politiche, un sfuarç di fantasie, par dâi al Friûl e a dute la regjon une autonomie plui fuarte e caraterizade soredut de lenghe. Juste il contrari di ce che Fedriga al è daûr a fâ cul so “io sono FVG” che invezit di valorizâ lis diferencis, lis fâs sparî, intun brand comerciâl reclamizât fintremai ai cjans ma che, impen di frontâ la complessitât, la semplifiche pierdint savôrs e valôrs che son la base de nestre specialitât.
◆ Il Pat pe Autonomie, partît che za tal non al à une valence precise, puedial no dâ rispuestis a chestis visions identitaris? Puedial subordenâ la sô marche di fabriche a une apartignince di schiriament? Al à di stâ al solit ricat di centriçampe che, se no stin unîts, a vincin i fassiscj e o riscjìn di lâ in vuere? Cuale ise la ufierte politiche dal Pat pe Autonomie che lu rint diferent rispiet al PD o ae AVS? Difindint i palestinês e dant jù a Israêl la int votie plui il Pat o il M5S?
◆ O sin di front a un moment politic che al sarà determinant pal Pat. O slargjâsi e inlidrisâsi tal teritori e tai comuns o il pericul al è chel di sparì. A esistin singulis personis, sintiments, clapis, moviments plui o mancul civics che a àn bisugne di cjatâ un denominadôr comun, di sintîsi RÊT. Valorizâ ancje chi lis diferencis identitariis al sarà fondamentâl. Al è ce che si spietisi dal Che Guevara di San Marc clamât a une sielte di cjamp ineludibile e improrogabile. La alternative e devente eutanasie. ❚