7. Di Montmaiôr di Taipane al Plan dai Ciclamins. Su e jù pai Cjanâi dal Cuarnap e de Tor, flums di aghe clare e turchine

Sabide al 1n di Novembar dal 2025, dì dai Sants. Dopo di vê durmît ben li de tratorie di Montmaiôr e fate une buine gulizion, cui salûts e lis racomandazions des sioris Margarite e Svetlana, che a vevin viert il locâl dome par nô, si inviìn pe seste tape dal Troi di Aquilee. La tape origjinâl e varès di montâ sul Gran Mont, scjavaçâlu e rivâ al Ripâr de ANA tal versant de Tor. Ma, sei parcè che e je capitade cualchi disgracie, sei parcè che il ripâr al è sierât in cheste stagjon, o fasarìn il troi alternatîf. Invezit di scjavaçâ il Gran Mont, i zirarìn ator, cuntune strade une vore plui lungje ma plui sigure.
◆ O passìn dongje de glesie di Sant Michêl (Sveti Miha) di Montmaiôr, piçule ma avonde pai ultins nûf abitants dal paîs, e si inviìn rive insù par un troi che al puarte ae siele Zaulache. Al criche il dì e il soreli al slusore il fueam zâl e ros che al fodre la tiere. Un spetacul!
◆ Ae beorcje o cjapìn il troi par Cuarnap. A voli nus somee dongje. La dì prime al veve plot e, daûr dal consei de vuide, o fasìn la strade forestâl invezit dal troi sbrissot. Il consei al jere di lâ pe strade forestâl dome par un chilometri e dopo tornâ pal troi. O sin ducj trê di buine lune, o fevelìn de tape fate îr, dal vât che nus à blocat, ma ancje di amîs, di fiestis, che prest al ven Nadâl…. Dopo un trat che o cjaminìn pe biele strade pedrade rive injù, mi ven il dubi. “Al è un biel toc che no viôt segnâi cul pessut celest – o dîs – sino juscj?” Mara e vierç il telefonut: “No ai nissun segnâl”. O provi jo. Nuie, ma o viôt la posizion su Maps. “Se e je juste – o dîs – o sin fûr strade une vore. Cheste e va viers Taipane ma forsit e torne viers Cuarnap”. Consultazion svelte. Emanuela e sentenzie: “No si pues lâ dilunc cence savê dulà che si va! Tornìn indaûr e cjapìn il troi segnât!” “Va ben – o rispuint jo, il mancul alenât – juste, ma se fin achì o sin lâts rive injù cence fature, cumò nus tocje montâ sù par plui di doi chilometris dibant”. Passade la buine lune di prime, planchin planchin o sin tornâts indaûr fin al troi cul pessut celest, che al jere pardabon ripit, dut sbrissot, plen di fueis che no si sa ce che al è sot, se une buse di aghe o un pieron.
◆ O sin tune valade fûr dal mont, da pît dal Gran Mont che chi al à lavinâi e cret blanc di calcâr di dulà che a spissulin fûr une vore di risultivis e pissandis di aghe cristaline. A son lis risultivis dal Cuarnap.
◆ Une vore intardâts rispiet a ce che o stimavin, dopo passât il borgut di Tanaiauarie (nancje mai sintût in vite mê), o rivìn tal paîs di Cuarnap. Mancumâl che o cjatìn vierte la Trattoria alle Sorgenti che e fâs ancje di buteghe. La siore, une vore zentîl, nus pronte cafè e mirinde. Nus dîs che e à pierdût l’om e che, di vedue, no rive plui a fâ di mangjâ pe int. “O tignarai viert il bar ancjemò par un pôc, ma prest mi tocjarà sierâ. Mi displâs pai 30 abitant che a son restâts in paîs. Di bessole no rivi…” Pecjât, o pensìn, Cuarnap al è un biel paîs, dut ricostruît a gnûf, in batude di soreli… ma daûr a murî. Si inviìn pe strade asfaltade viers di Montavierte cul bon ricuart de buinegracie de siore ostere. Cuant che si cjate une persone zentîl in mût spontani e disinteressât, ancje se o vin cualchi marum, la nestre zornade e va sigûr in miôr. Une muse di ridi, un piçul compliment, une disponibilitât a judâ a son chei ats come i rais di soreli che a foropin un cîl innulât, che a fasin ben a cui che i rivin e ancje a cui che ju fâs.
Montavierte, là che o sin dopo di doi chilometris, al è un paîs biel grant, cul borc disot e, dopo un cleve erte, il borc disore, cu la gleseone di Sant Michêl e la Tratorie dal Ors. Des misuris dal plaçâl par parcâ lis machins si capìs che e je une vore di int che e ven a cerçâ l’ors. Fûr dal paîs e je la viere gleseute de Sante Trinitât, dal secul XIII, cun cuatri nivei di afrescs e un râr agjioscopi, ven a stâi une buchere tal mûr che e covente a chei che a son fûr par scoltâ la messe. Di fat ogni Jugn achì si dan dongje dutis lis comunitâts dai cjanâi de Tor e dal Cuarnap pal rît tradizionâl de bussade des crôs. Si conte ancje che li dongje tal 1241 e sarès comparide la Madone che e à lassade la olme dal pît intune grande piere che si viôt ancjemò.
◆ Di Montavierte, dopo cinc chilometris par biele strade, si rive a Micotis. Al tache a gotâ. Lis previsions a disin che al varès di plovi tal dopomisdì. Si parìn sot la lobiute de fermade de coriere. O profitìn par gustâ. Mara, di atlete, mi propon stecutis proteichis o altris matetâts di sâi e vitaminis. Jo o ai miôr un pagnutut cul persut e un cu la mortadele. O vin ancje un dolçut par sierâ.
◆ A pene che al mole di plovisignâ si inviìn par Pradielis. Par consei di un vecjut, prime di Lusevare o molìn la strade e o cjapìn un troi a drete che nus fâs sparagnâ uns trê chilometris. Al va jù dentri di un bosc bandonât, cuntune vore di lens sglovâts di passâ in bande o par sot, ma in curt o jessìn tun prât dongje de Tor che e cor viamente e imburide e si sint di lontan.
Di Pradielis al Plan dai Ciclamins, là che o vin lassade la machine, a son nûf chilometris di fâ ducj sul beton de strade regjonâl 646. Par me al è il toc plui lami di dut il Troi Celest e al è il presi di paiâ par vê sghindade la rimpinade sul Gran Mont. La strade e cor simpri daprûf de Tor che e murmuie vivarose e sbrumose cualchi volte sul font di une gole tal cret, cualchi volte da pît di un lavinâl di claps, simpri di piere blancje e par chest la aghe e à simpri un colôr celest maraveôs. Mi soi simpri domandât parcè che i flums che o ai viodût in tancj cjantons de Europe a àn la aghe scure. Ancje se no je torgule, e je simpri scure intant che chei dal Friûl a àn la aghe clare e turchine. O pensi al Lusinç, al Nadison, a cheste Tor, al Tiliment, ae Livence, ma ducj a àn cheste bielece. O pensi che e sedi propit pe piere calcarie blancje o grise che i fâs di jet. Al è il cret des monts furlanis a jessi diferent dal cret di chês altris bandis. I cogui des pedradis di Udin e son clârs, come chei che i vons a dopravin par tirâ su lis cjasis dal Friûl. Se o lês a Padue, a Milan o a Turin, lis pedradis a son fatis cun cogui marons, verts e neris.
La strade e monte sù cun pendence simpri vualive, cun pocjis curvis, une vore stufadice. Ancje se la valade e je biele, la strade e à une monotonie che le fâs someâ plui lungje di ce che e je. Dopo dal puint di Musis o polsìn suntune bancje par fâ di mirinde. Il cîl si fâs neri e la ploie si svicine. O vin di spesseâ par no cjapâle. I ultins cuatri chilometris a son simpri su la strade asfaltade che di Musis e volte a soreli jevât viers dal pas di Tanamee. O slungjìn il pas ma o sin stracs. La strade sbaliade a buinore e pese dute cumò. Al tache a plovisignâ e nô simpri plui svelts. Chest Istât a Masaruelis le vin cjapade dute, strafonts e contents. Ma cumò o sin in Novembar, o sin scuasit rivâts e no nus garbe pic bagnâsi. Si olme il Plan dai Ciclamins, la nestre destinazion, un grant bosc di faiârs maraveôs. A colp al ven jù un scravaç di aghe, cun aiaron e nui che si tombolin. Un timp di fâ pôre. O rivìn ae machine di corse ma intant si sin cjapade la sglavinade ben e no mâl. Inte machine si disìn che cheste, di 27 chilometris, e je la ultime tape par chest an. Chês che o vin di fâ a son dutis di mont e a son di fâ cu la buine stagjon dal an cu ven. ❚
[Tal numar che al ven la tape n. 8 dal Plan dai Ciclamins a Prât di Resie]