Salts, lavoradôrs e… laris. Almancul i laris a fevelin par furlan

Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant dai imnis: Un popul, une tiere, une lenghe. Nuie! Il Messaggero nol fâs politiche. In compens però un articul di sabide ai 13 di Jugn a pagjine 33 te croniche di Tavagnà – Pasian di Prât – Cjampfuarmit al ripuarte a plene pagjine un titulon: Coppia sequestrata in casa, i ladri: “Tu sês plen di bês”. O pensi che sedi la prime volte che il cuotidian di viâl di Palme (isal ancjemò li?) al fasi un titul cussì in grant in marilenghe. Si trate di un articul e soredut di un titul che al podarès jessi sogjet par un tratât di sociologjie. L’articul al ripuarte la croniche di une robarie tune vilute te zone residenziâl di Vile Vierte. Come capitât in tancj câs, si pensave di rumens, di dispatriâts pakistans, di zingars… Invezit no! I laris a cjacaravin furlan. Jo, al prin colp, o ai ancje pensât che si tratàs di doi albanês che vedin fat un cors di furlan li de Filologjiche. No, no, al somearès invezit che il furlan nol ves inflessions. E duncje bisugne concludi che, a fuarce di stâ cui talians, ancje chi si è imparât a çuetâ. Ancje i furlans a son deventâts laris e delincuents. Biadelore! Cumò si spietìn che si organizin, che a fasin criche, insume che a metin adun un tic di criminalitât organizade. Nol è nuie di inventâ, al baste copiâ napoletans, calabrês, puliês… Che no vedin di fâ di bessôi ancje ta chest contest. Si spietìn une biele “Mafie dal Cormôr”! Almancul come chê “dal Brenta”. E sarès la volte buine che o otignaressin di sigûr plui autonomie. No dîs come i sicilians, ma scuasit. Al è interessant però marcâ come che l’ in glesie al pree par talian, tai uficis al fevele par talian, a scuele al impare e al insegne par talian, ma par blestemâ e robâ no! Li i furlans si spitichin: furlan rût. Dal pont di viste antropologjic il caratar furlan si inricjìs: vie “onescj” e indenant “laris”. Salts, lavoradôrs e laris. Dopo jessi alpins, donadôrs di sanc, amants des “Frecis Tricolôr” cumò i furlans a son ancje laris.
◆ Laris che a fevelin par furlan. E ancje il Messaggero Veneto, si sin acuarts, biadelore al fevele furlan. Di fat al è plui di otante agns che al cîr di robâ la identitât al Friûl. ❚