Daspò dai timps eroics dai fradis Di Centa, ancjemò un aur di une nestre atlete
a Milano Cortina 2026 cun “Monna” Lisa Vittozzi
IntaI 2008, i citadins di Sapade a àn sielzût di distacâsi dal Venit e di vignî in Friûl-Vignesie Julie. Une decision che e je deventade uficiâl insom dal 2017, cuant che ancje la Gazete Uficiâl dal Guvier Talian e à metût par iscrit la cuistion. Intal 2008, Lisa Vittozzi e veve 13 agns, e veve tacât a fâ sport di pôc e, par sigûr, si insumiave forsit di deventâ une atlete olimpiche. Pensâ di vinci une medaie di aur, 18 agns plui indenant, a Cortine, dongje cjase, intal mieç dai siei tifôs, par dâ une sodisfazion cetant grande al Friûl al jere forsit un sium straordenari ancje par je.
◆ Invezit, ai 15 di Fevrâr dal 2026, la atlete di Sapade e à scrit la storie dal biathlon talian, lant a vinci une medaie di aur preseade e meretade. La prime pe Italie intune Olimpiade invernâl inte dissipline dal cori sui schîs e trai intun poligon. Vittozzi, che cumò e à 31 agns e e je intal plen de sô maturitât sportive e atletiche, e à fat viodi a ducj che chel sium al spietave dome le ocasion juste. Tant di meretâsi il sorenon “Monna” Lisa.
◆ “O savevi cetant ben – e à contât Lisa Vittozzi dopo des premiazions – che une dì o sarès deventade campionesse olimpiche. No savevi ben cuant e indulà, dut câs o speravi che al podès jessi achì, intal mieç de mê int e cu la mê famee. Intal ultin chilometri o vevi i sgrisui. O lavi bande la fin de gare savint bielzà il vantaç su lis primis aversariis, e o sintivi il businâ de int e dai tifôs che mi sburtavin. No ai mai fermât un moment di crodi di rivâ a vinci une medaie olimpiche di aur: il viaç al è stât une vore dificil, dut câs cumò al è biel rindisi cont di ce che o ai fat. Cumò o pensi di cjapâmi une vacance biele lungje, par gjoldi di dut ce che o ai vivût a Antholz/Anterselva (il lûc indulà che si son tignudis lis garis di schi di font e di biathlon, ndr), e daspò o decidarai se o ai voie di lâ indenant”.
◆ Sintî a fevelâ i atletis furlans daspò des garis al è stât, par sigûr, une emozion cetant fuarte par ducj i tifôs che a jerin là, dongje des pistis e dai lûcs de Olimpiade 2026, e ancje par ducj chei tancj che a son stâts daûr aes garis par television.
◆ “Cinc centesims – e a dite Lara Della Mea – a son un bati di cee. Sigûr al fâs mâl, dut câs cualchidun al à di rivâ cuart e, cheste volte, mi è tocjât a mi. Inte seconde frazion de gare di Zigant o ai fat dut ce che o vevi in cuarp e o ven fûr de Olimpiade cence nissun vaiût e nissun displasê. I miei tifôs di Tarvis, che a jerin a viodi la gare, mi àn sburtât une vore. In futûr o larai a cjapâmi altris ocasions”.
◆ Martina Di Centa, classe 2000, e à bielzà decidût di molâ l’agonisim insom de stagjon sportive. “Il gno percors nol podeve sierâsi miôr di cussì, cuntune biele esperience intune Olimpiade – e à dite la fie di Giorgio e la gnece di Manuela –. In gare mi insumiavi un biel risultât, o vin sperât ancje intune medaie. Il belanç al è une vore positîf”.
“O ai spindût dut ce che o vevi – e à contât Giada Andreutti – par vê un bob di nivel. I particolârs, in cheste dissipline a fasin une vore la diference. Jessi intune Olimpiade dongje cjase al è un sium che al devente realtât e o ai dât dut in gare. Une esperience maraveose: pardabon al valeve la pene dut”.
◆ O vin tignût par ultin Alessandro Pittin. A 36 agns, forsit Milan Cortine e je stade la sô ultime Olimpiade. “Al è stât un onôr tignî sù il non dal Friûl e de Italie par dut chest timp. Viodi l’entusiasim e il calôr di dute la int pai Zûcs,mi scjalde il cûr. O ai dât dut ce che vevi e o soi une vore braurôs di dut”. ❚
:::::::::::::::::::::::::::::::::::::::::::::::::::::::::::::::::::::
Il moviment dai sports invernâi in Friûl
al è avonde in salût
Inte dissipline dal biathlon, Lisa Vittozzi e à metût insiemi une medaie di aur inte specialitât dal inseguiment sui 10 chilometris e une medaie di arint, cu la stafete misturade (feminis e oms) taliane inte distance dai 6 chilometris. E e à sierât al cuint puest la gare “sprint” dai 7,5 chilometris. Il ledrôs de medaie al è stât la delusion inte gare “mass start” di 12,5 chilometris, indulà che la campionese di Sapade e je finide al 18f puest.
◆ Di no crodi la gare di Lara Della Mea intal Zigant Feminin. Dopo vê sierât la prime manche al 15t puest, la zovine di Tarvis si è rimpinade al cuart puest, lant dongje, par 5 centesims, al tierç puest. 2’13”55 il timp di Lara. Che e à finît al 11n puest la prove di Slalom speciâl. Par sigûr, il futûr de zovine di Tarvis al è colorât e plen di tantis pussibilitâts di fâ ben a nivel internazionâl.
◆ Biele esperience ancje par Martina Di Centa. Le zovine di Paluce e puarte indenant un cognon mitic intal schi di font, massime pes carieris che a àn metût adun so pari, Giorgio (aur a Turin tal 2006), e sô agne, Manuela (aur a Lillehammer tal 1994). A Milan Cortine, Martina e à onorât la tradizion di famee, sburtant la scuadre taliane de stafete 4×5 chilometris al sest puest, corint la sô frazion simpri fra lis primis trê. Cun di plui, Di Centa e à finît al 20m puest la gare a tecniche classiche e al 28f puest la prove di Skiathlon.
◆ Al ven fûr di Sapade ancje Davide Graz, che al à cjapât la medaie di bronç jessint part de stafete masculine di schi di font.
Intal biathlon, la stesse dissipline di Lisa Vittozzi, si è fat viodi pe prime volte intes garis olimpichis Nicola Romanin, di For di Avoltri. A 31 agns, al à dimostrât che nissun al è masse vieli par scomençâ une aventure fra i cinc cerclis. Inte distance dai 10 chilometris, Romanin al à sierât 16t. Al à finît al 28f puest la gare in inseguiment sui 12,5 chilometris e sui 15 km cun partence ducj insiemi. In ultin, cu la stafete taliane, intai 7,5 chilometris al à tirât dongje il 14t puest.
◆ Cetant interès a clamât dongje lis garis di salt dal trampulin, cun Martina Zanitzer e Francesco Cecon, ducj i doi di Tarvis. I doi zovins, che a vivin sot dal Lussari, no son lâts dongje di risultâts cuissà ce preseâts, dut câs a àn fat dut cul massim impegn e si scuen batiur lis mans.
◆ Su La Patrie dal Friûl dal mês di Avrîl dal 2022, Giada Andreutti, di Ruvigne, nus veve contât il sium di partecipâ ae Olimpiade di Milan e Cortine, pûr cun ducj i problemis dal competi suntun bob in Italie. Intai ultins agns, a son vignudis fûr polemichis di no crodi, pai bêçs e lis risorsis che Cortine e à tirât fûr par fâ une piste gnove (e ancjemò vuê si continue a mastiâ fumate par vie che il tet de piste al è vignût jù intes ultimis zornadis di garis). Dut câs, Giada e à finît al 24t puest inte gare di bessole. E al 20m puest cu la lombarde Alessia Gatti.
◆ Intal bob si fate viodi ancje Anna Costella, zovine di Sacîl: in cubie cun Simona De Silvestro e à finît la sô prove in 23e posizion.
◆ Un cjapitul in bande lu merete Alessandro Pittin, di Tumieç, specialist de gare clamade “Cumbinade nordiche”, un miscliçot di salt dal trampulin e di schi di font. Pal cjargnel, “Milano Cortina” e je stade la seste partecipazion ai Zûcs invernâi. Al à tacât a Turin intal 2006, daspò Vancouver 2010, Sochi 2014, PyeongChang 2018 e Pechin intal 2022. Chest an al à tocjât un 19m puest inte gare dal trampulin piçul e il 24t inte gare dal trampulin grant. Dut câs, Pittin al è bielzà fra i atletis furlans plui preseâts par serietât, resilience e continuitât di risultâts. ❚
:::::::::::::::::::::::::::::::::::::::::::::::::::::::::::::::::::::
E INTAL MÊS DI MARÇ, SI FÂS LA PARALIMPIADE
Dai 6 ai 15 dal mês di Març, simpri a Milan e a Cortine, si fâs la Paralimpiade Invernâl numar 14. Pe tierce volte la Italie e inmanee in cjase la manifestazion olimpiche pai atletis cun disabilitât, daspò di Rome 1960 e Turin 2006. Chest an si previodin 6 dissiplinis paraolimpichis: biathlon, curling, hockey, schi alpin, schi di font e snowboard. I tifôs furlans a sostignaran massime Martina Vozza, di Monfalcon, e la sô vuide Ylenia Sabidussi, di Tarvis, intes garis di schi alpin. ❚
