A cressin une vore i incidents mortâi

Vie pal 2025, su lis stradis de Slovenie e de Cravuazie al è stât un vêr maçalizi di int di dutis lis etâts, cun personis muartis in ocasion di incidents stradâls, o ancje cjapadis sot biel che a passavin li des strichis di pueste pai pedons.
◆ Ve che alore l’an passât a son muarts in Slovenie 93 di lôr, vâl a dî 25 plui dal 2024: la percentuâl di incressite e je stade fintremai dal 37%. Al è lât sù ancje il numar totâl dai incidents regjistrâts des autoritâts, che a son stâts 20.824, il 2,9% in plui dal an prime. Il mês piês par cont dai muarts su lis stradis al è stât chel di Lui, cun 25, cuasi un ogni dì. Ancje i mês di Jugn (15) e Avost (10) a son stâts chei cun plui vitimis su lis stradis, ancje par vie dal fat che ogni Istât a rivin culì un grum di turiscj. Cualis sono lis resons di tancj incidents mortâi? Si stime che uns 40 di chei che a àn pierdût la vite a vedin corût masse, cuintri dai 30 dal 2024. Altris motîfs a son il vê bevût alcul e cjolt droghis, il no vê tacât la cinture di sigurece, il no vê rispietât il dirit ae precedence e il fat di vê doprât il celulâr. Ancje tancj motârs a àn pierdût la vite l’an passât: 26, juste il dopli di chei muarts tal 2024.
◆ Chescj numars a disin a clâr che lis iniziativis puartadis indevant dal Guvier tacant dai plui zovins, cun lezions teorichis e pratichis tes scuelis, no àn puartât zovaments. Par intant, la Cjamare di Stât di Lubiane e à fat buine la leç che e puarte di 12 a 15 agns la etât par podê menâ i monopatins che a corin fin a 25 km/h, stant che il 20% dai incidents cun chescj mieçs di traspuart a viodin protagoniscj i plui zovins.
◆ Si pues dî che la maniere di menâ i veicui e varès di cambiâ tal non de sigurece. Stesse cuistion ancje in Cravuazie, li che tal 2025 a son muarts su lis stradis in 263, cuant che l’an prime a jerin stâts 239, tal 2023 274 e tal 2022 in 275. Dome in Istrie, 17 muarts a pet dai 9 dal an prime, ancje se i incidents a son stâts di mancul (1.745 cuintri 1.754). A fâ scjas in dut il Paîs la muart ai prins di Otubar di dôs cubiis di zovins maltês, che a vevin cjapât a nauli une machine te citât di Senj a sud di Reka/Flum: magari cussì no, il lôr veicul al è finît tal mâr, e nol è stât pussibil salvâ i cuatri turiscj. ❚