CULTURE – E-MARILENGHE. Facebook? Simpri plui musis di libri

A un an di distance o tornìn a fevelâ di Facebook, no si pues propite fâ di mancul. I vielis imprescj de rêt (la e-mail e i blogs prin di ducj) a son aromai doprâts come vistîts di fieste. La maiorance dai utents dumiestics a doprin internet come passetimp o come mieç par tignîsi in contat cu lis cognossincis. La vere «vite online» di chest popul si davuelç massime su Facebbok, che in dì di vuê al conte plui di 400 milions di iscrits, une masse imense che e burìs fûr gnûfs contignûts ogni secont che al passe. E ancje i furlans si fasin sintî, ma in ce maniere?
LA ALBE_ I prins grups a jerin chei che a cirivin di meti dongje i utents di un stes paîs, daspò a nasserin chei di sostegn ae identitât furlane (p.e. «Sosten la Lenghe furlane», «Braure furlane» e v. i.), po dopo a son nassûts chei politically-scoret, ma il plat cun plui varietât al è chel comic o di satire.
«Muselibri» nol domande nuie, al baste sveâsi une dì cuntun pinsîr un pôc mataniç, vierzi un grup cun chest non e invidâ un pâr di amîs. Chescj cuntun pâr di click a invidaran i siei e cussì indenant, in cualchi câs si è rivâts ancje a 10.000 iscrits in pocjissim timp, nol esist confront cui numars dai grups plui impegnâts!
CUSSIENCE CHE E CRES_ E je une dople leture che si pues dâ a chescj intropaments: pe lôr spontanietât e morbin a son segnâi positîfs di une lenghe vive ancje fra la mularie e di un amôr fì di une cussience di popul che ancjemò no vûl murî, di chê altre bande tra lis riis dai frecuentadôrs si cognòs la grandece de dibisugne di alfabetizazion scuelâr dal popul furlan, che cuant che al volarès deventâ paron dal propri mieç linguistic (lontan di ogni furlanisim) al è cuasi simpri in forme no gramaticâl o furlane dome tai titui.
Lait a fâus un dôs ridadis tai grops come:
– «To Agne» (12.000 utents): ogni dì un aforisme di une e-Vedrane – cuntun tentatîf di imitazion
– «Esclamazioni in friulano» (10.000)
– «Va butiti te Ledre» (5.170… cun dome un unic intervent di bande dal autôr!)
Michele Calligaris