Ritrat de “Foemina Furlana”, no agnul dal fogolâr ma buine di plasmâ la identitât de nestre Matrie

E cussì o sin rivâts insom, ae fin di chescj sghiribiçs cjapâts par segnâ une gnove antropologjie dal Homo Furlanus. Benon. O pensi di vê contât avonde, ancje se tant altri al è restât su la ponte dal penin, o sot dai dêts che a batin su la tastiere. Mi sarès plasût tabaiâ di altris pleis che si scuindin dentri de nestre indole furlane, e che a piturin un cuadri tant lontan di ce che par solit il Mont al conte di noaltris: che o savìn jessi esploradôrs, sienziâts, utopiscj, rivoluzionaris, stravagants, torototelis, insumiadôrs. Insome, al valarès la pene di scrivi un tratât complet e articolât. Ma mi cjapi il spazi di cheste ultime rubriche nome par inserî inte suaze dai ritrats ancje un dedeât ae “Foemina Furlana”. Che oviementri si cjate dal dut cjapade dentri ancje in ce che o vin dit dal Homo Furlanus. Ma par une cuistion di preference ideâl, plui che di justizie o di “par condicio”, come che a disaressin i savis, mi cjapi il lus e la libertât di intratignîmi sul teme. Di preference ideâl, o disevi, dal moment che par me, e lu ripet simpri e simpri cence sperance, Matrie e je ben miôr di Patrie. E duncje cheste pontade e je dute par te, “Foemina Furlana”. E mi plâs cjacarâti in maniere direte, come se cumò tu fossis culì, devant dai miei voi. Un biel viodi, se ancje Jacopo Valvason di Manià, inte sô Descrizion de Patrie, propit dulinvie de introduzion, al diseve che la nestre biele lenghe furlane e cjape une ande ancjemò plui graciose cuant che si le sint fevelade des feminis, che des nestris bandis a saressin fuartis, resistentis, vivarosis e ancje bielis. Cemût no jessi dacuardi cul grant inteletuâl dal Cinccent? Dal moment che si tabaie pûr simpri di Lenghe Mari, parcè che e je peade aes nestris maris cheste nestre apartignince, plui che no ai nestris Paris. Nus le àn regalade cul dânus di tete, cuant che o jerin picinins. Insiemi cul lat a miscliçavin cjants, preieris, nainis, fufignis, che nus nudrivin la anime, mintri che la lôr linfe nus nudrive e nus faseve madressi vite e identitât. No ducj a son gjenitôrs, ma ducj a son fîs, e duncje la Mari le àn pûr vude! E sigûr a rivaran a capî ce che o vûl intindi. Di maris e di feminis che a àn plasmade la nestre identitât furlane la nestre storie e je stade tant siore. E intai agns passâts lis vin ancje contadis, chestis Bastiancontrariis. E no dome: lis vin ancje cjantadis. Ma no sarà mai avonde. E cussì mi plâs in cheste ocasion memoreâ trop che la “Foemina Furlana” e je stade, e je ancje ore presint, une vore lontane di ce che la solite storie nus conte. Il stereotip lu cognossìn cetant ben, e no si lu rive a gloti: Fabula fertur che e sedi l’agnul dal fogolâr. Une creature indifese, dolce e delicade. Brave mari, fie ubidiente. Pronte a petâ fûr fîs, straordenarie come massarie, progjetade par lavâ plats e paviments, brave coghe, dome se si concentre su la solite sope. Anime di ort e di gjalinâr, no sigûr di mistîrs mascjos e dûrs, che a son patrimoni, come che si sa ben, dal Homo Furlanus. Fabula, fabula, fabula. Inte nestre storie o vin vût vueririis, regjinis, siamanis, poetis, professoris, esploradoris, ricercjadoris… une briade colorade e potente, che sigûr e à preferît doprâ la sclope plui che no la scove, cuant che e coventave, cence tirâsi mai indaûr, e dimostrant pardabon dispès, di jessi ancjemò plui brave dai siei coparis intal puartâ indevant progjets e utopiis. Forsit ancje par chest e je stade tant di plui tibiade, vie pai secui. Violade, batude, umiliade. Trasformade tant dispès in strie o in putane cuant che e veve la olse di parâsi dai mascjos, o pûr di dâur cuintri, o ancje dome il bon gust di dineâsi o di dîi di “No!”. Trop biele che e sarès une golaine di ritrats. Chi, su lis pagjinis de Patrie, lis Feminis Furlanis Fuartis a son stadis contadis sigûr ben e no mâl. Ma si sa che chest sfuei al nas come eretic e bastiancontrari ancje lui. Fûr di ogni tentazion retoriche, lontan di cualsisedi ande detade de mode, mi plasarès in cheste ocasion contâ une storie che no si le cognòs, e che e rapresente ben il caratar di cheste “Foemina Furlana” che o stoi cirint di rapresentâ in cualchi maniere. No tancj agns indaûr, intun archivi storic de nestre regjon, mi è capitade pes mans une fotografie fate in Spagne intant de vuere civîl scombatude fra lis brigadis internazionâls e i milizians di Francisco Franco, judâts dai Fassiscj e dai Naziscj. La imagjin e je picinine, come che si usave stampâlis in chê volte. In blanc e neri, cul ôr a seghet, come un bol di tacà su lis letaris o su li cartulinis. E mostre une frute. Pôc plui di une frute. Disìn une fantate che no mi pâr mostrâ tant plui di vincj agns. Stant a ce che e ripuarte la schede, e vignive di Glemone e si ere arolade par judâ il Popul spagnûl a difindi la sô Libertât cuintri di un tiran. No savìn cemût che si clamave. Une man sassine le veve copade cuntun colp di pistole. E cualchidun altri le veve fotografade di muarte. No sai sei un partigjan o se un fassist. Ancje su chest no vin elements sigûrs. Ma ce che al conte e je la storie, la storie e un particolâr. Duncje une zovine furlane, di Glemone, probabilmentri tirade sù intune famee libertarie che rivave a gloti mâl la ditature di Mussolini, e veve decidût di partî par lâ a scombati cuintri di un che come il Duce al sperave di dineâ ogni dirit civîl ae sô int. Jê come tancj e come tantis di dut il mont, no veve pensât par se, ma par chei altris. Intal non di un ideâl plui grant de sigurece: chel de Justizie. In fin chi dut al torne. Une storie che no ven contade tant dispès, massime in timps come i nestris, là che une cierte nostalgjie pal “Fascio Littorio” e torne a nudrî la flame che e art su la tombe dal Duce e ancje su la bandiere dal partît che e rapresente – adiriture! – la bandiere politiche dal President dal Consei talian. Une storie che fin a cualchi an indaûr e podeve someâ une conte distopiche, e invezit… Ma tornìn a di chê frute. Ce che plui mi à colpît, in chê fotografie, e ancje comovût intal profont, e je la cjamesute blancje, maglade di sanc, lassade vierte e disbotonade, tant di pandi il sen. Probabil che, prime di copâle, le vedin ancje violade, usant sul so cuarp chê violence che no podevin esercità su la sô anime libertarie. Par fâle curte, dongje de magle e je une rosute ricamade a man. Cun tante gracie, atenzion e delicatece. Come se e savês che bisugne vê creance ancje tal lâ a murî par un ideâl grant tant che la Libertât. Vele chi la “Foemina Furlana”. In dute la sô grandece straordenarie: une anime tignude dongje dal sanc e de rose. ❚