La storiche manifestazion
chest an e conte la 23e edizion
La storiche rassegne di musiche classiche in Cjargne, la uniche che e propon une programazion resonade in Autun e Invier, e no dome di Istât, parcè che e pense no dome ai turiscj di passaç ma soredut ae int che la mont le vîf ogni dì, e tocje chest an la edizion numar vincjetrê. La manifestazion e je stade screade dal compositôr e musicist di Paulâr Giovanni Canciani (1936-2018), il pari des cjasis museu La Mozartina 1 e 2, lûcs di bielece uniche che a son vierts a visitis dut l’an (par informazions: www.lamozartina.it). Cun concierts a Tumieç, Paulâr e Çurçuvint, tal mês di Novembar a son stadis ospitis diviersis realtâts musicâls, cjapant dentri ancje formazions furlanis, come che e fâs par tradizion cheste manifestazion musicâl Cjargnele.
◆ Tra chestis o ricuardìn trê côrs furlans insiemi cu la Orchestre de Universitât dal Friûl inte esecuzion dal Requiem di Mozart e il progjet dedicât aes “Furlanis”, cul cuartet di arcs vuidât di Guido Freschi, tra oparis di Montico, Marzuttini e Canciani. Cheste la programazion dai concierts tal mês di Dicembar, ducj cun jentrade sore nuie: si tache sabide ai 6 aes 18.00 inte Cjase da Int di Çurçuvint, cul Insiemi La Mozartina, nassût dentri de associazion “I Amîs de Mozartine”, ven a stâi l’ent organizadôr de rassegne, che al à preparât un conciert dedicât inmò a Mozart, cjale câs, cu la esecuzion dal Divertiment Kv 563. La dì dopo, domenie ai 7 aes 17.30, cussì come par chei altris concierts che o disarìn, al sarà ospit il pianist plen di talent Luca Chiantaroli che al proponarà un dopomisdì di improvisazions pianistichis.
◆ Ai 13 di Dicembar al è in program il conciert “Tra passion e siums” cul doi dal pianist Matteo Borsarelli e dal violinist Alberto Bongiovanni, cun musichis di Fauré e Beethoven, invezit ai 20 al sarà ospit l’armonicist ucrain Ivan Homolsky, un talent fûr di misure, che al eseguirà un program che di Vivaldi al rive al contemporani Richard Galliano. Domenie ai 21 di Dicembar, l’ultin conciert: “Lejendes e malefizis” cul violinist di fame Guido Rimonda, diretôr artistic de Mozartine, e il pianist Andrea Stefenell, un altri mestri, insiemi tra musichis di Tartini e Brahms e Paganini. Par chei che a son interessâts a partecipâ ai concierts, organizâts cul jutori dai Comuns di Paulâr, Tumieç e Çurçuvint, oltri che de Comunitât di Montagne de Cjargne, de Secab, dal Bim e la colaborazion cul Festival Viotti e la Camerata Ducale di Turin, al pues cjatâ dutis lis informazions sul sît lamozartina.it e su la pagjine social dedicade.
◆ Ocasion ancje par visitâ lis residencis musicâls paularinis, il “Museu dai sunôrs”, come che al diseve il Mestri Canciani, parcè che li dentri ducj i struments, une cuarantine e di grande cualitât, calâts tes ambientazions di grande pertinence storiche, no son incjastrâts dentri des techis, come che al sucêt inte plui part dai museus, ma si puedin sunâ, e trop che si vûl! Duncje, visitait la Cjargne ancje se al è frêt, la musiche us scjaldarà. ❚
