I taramots che no si viodin

“Mê mari e veve 5 agns. E ricuarde che tai dîs dopo il taramot si viveve ducj insiemi e si davin ducj une man un cul altri. E prove tenarece e displasè pe int che no je plui, ma ancje tante braùre pe fuarce dimostrade de int furlane in cheste disgracie. Mê mari si vise che in chei dîs so pari che al jere un miedi al è stât tal ospedâl par judâ la int par trê dîs, cence mai tornâ a cjase”. Chestis peraulis a son di un dai fantacins des mediis di San Denêl che 10 agns indaûr a àn intervistât paris, nonos, agnis e barbis sul Orcolat dai 6 di Mai dal 1976. In chest lavôr par furlan, coordenât des docentis Donatella Bello e Elisa Mengato, al jere vignût fûr dut ce che al covente par impensâsi di ce che e jere in chê volte la nestre tiere. Dopo 50 agns, vino ancjemò il stes caratar?
◆ Stant aes peraulis dai parincj dai piçui di Sant Denêl, “si viveve ducj insiemi”: saressino bogns vuê di condividi alc fûr dai posts, dai “status” o dai “reels” virtuâi? Nol è un misteri che la coesion sociâl e je stade dismenteade, e che il benstâ vignût dopo dal taramot al à menât cun se la disgregazion des relazions: la modernizazion e à fat saltâ ancje tancj nuclis che in chel moment a jerin coventâts come rimpin intun moment malsigûr e disperât, de famee ae Glesie. Il stes concet di “dâsi une man” al va simpri plui al mancul: il numar dai volontaris si sbasse, la cussience ancje, e la burocrazie e je buine di copâ ancje dut ce che al nassarès di bon dentri des comunitâts.
◆ No dome: la “braùre” pe fuarce dai furlans no je masse di mode, stant che la identitât vuê e somee di soreplui. Anzit, ben che al vadi si cjate int che si definìs taliane, europeane, o citadins dal mont… Furlans, pôcs: ancje parcè che la Regjon, se no tu ses “friulveneziagiuliano”, no ti da un boro. E vuê a son propit tancj che che a son pronts a movi il poleâr dome se al rive il contribût de Regjon. Ultime robe: il miedi che tal 1976 al molave dut e al steve trê dîs a curâ i ferîts al sarès simpri plui râr in dì di vuê. Intant parcè che i miedis a son simpri di mancul, e po parcè che – stracs de disorganizazion de sanitât publiche – a van ducj a vore tal privât, des 9 aes 5, e la emergjence le lassin a pocje int di buine volontât.
◆ Al somearès alore che la int furlane no vedi plui i gnerfs e il fîl de schene che a àn permetût ai nestris vons di tornâ in pîts dopo dal scjas che in Mai e in Setembar di chel an maledet al à sdrumât paîs, copât personis, scancelât une storie di secui. Ma dopo al rive un event teribil come la diluvion dai 17 di Novembar che e a soterât lis cjasis di Breçan dulà che a jerin a stâ Guerrina, une siore di passe 80 agns, e Quirin, un zovin todesc che al cirive di judâle a scjampâ. No dome: dut il paîs di Vierse al e finît sot de aghe e dal pantan. Puescj impuartantons pe storie e pe culture de comunitât furlane e che nô de “Patrie” o cognossìn ben. A “Casa Versa” o sin stâts ospits cu “La Patrie sot dal Tei”, a Romans tantis voltis o vin cjatât bon acet de aministrazion o dai “Scussons”, clape une vore atente a tignî cont de marilenghe e de identitât furlane intal Friûl di Jevât. E ancje a Cormons o vin fat dispès iniziativis. Par chest, viodi la sdrume di int che si è metude daurman a disposizion par lâ a judâ e meti in vore dut ce che al coventave par netâ, justâ, butâ vie e tornâ a meti in sest dut ce che si podeve al è stât pardabon – inte tragjedie – un esempli clâr di ce che al reste de fuarce interiôr e solidarie dai furlans. Une energjie straordenarie, che si met in azion in maniere coletive e coordenade, purtrop, dome cuant che lis dificoltâts si viodin claris sot dai voi. Al coventarès invezit che o fossin ducj bogns di metile a servizi de comunitât ancje par chei taramots che no si viodin, ma che dut câs a metin a risi il destin de comunitât interie. Cuistions come l’avignî dai nestris zovins, che a tornin simpri plui dispès a jessi “libars di scugnî lâ”; o la tutele de nestre sanitât e de scuele, simpri plui in dificoltât; o la stesse situazion de demografie, che no cres, come la nestre economie. Pale e picon, pompe o badîl, a Vierse si è cirût insiemi di lâ indevant e cjatâ soluzions. E sarès ore di fâlu ogni dì, ancje pes emergjencis che no si viodin a colp, ma che a podaressin metinus in zenoli. ❚