Lavament vert – “Ambientalismo di facciata” – “Greenwashing”

Cun “lavament vert” si intint une comunicazion ingjanose su cuistions ambientâls. Intai ultins agns, a man a man che il probleme al cresseve, une vore di aziendis a àn scomençât a pandi il lôr interessament pe sostignibilitât, pe responsabilitât sociâl e pe difese dal ambient.
◆ Clâr al è che par disvelâ lis propriis convinzions e jessi crodibii bisugne fevelâ sclet, precîs e puartâ dâts di buine fonde. Nol è lât simpri cussì. Cualchi volte, daûr di afermazions publicitariis (“claims” par inglês) che a somein atendibilis, a son dome bielis peraulis e messaçs bausârs indreçâts a noaltris consumadôrs.
◆ Si à di tignî cont che o sin simpri ducj plui disponibii a cuistâ prodots biologjics e servizis che a rispietin l’ambient e il lavôr dai cristians ancje se a costin alc di plui de medie. E o sin puartâts a fidâsi de propagande, cence impegnâsi plui di tant a cognossi miôr e lâ insot.
◆ In altris peraulis, lis impresis disonestis a àn facil fâ profit cun prodots e servizis “verts” di non ma no di fat. Nol baste scrivi e fevelâ di sostignibilitât, bisugne meti adun, tai procès di produzion e organizazion, pratichis compatibilis cul ambient.
◆ Cuant che al capite, lu clamìn “lavament vert” che al vâl par ecologjisim di façade. Tant che sborfinâ la mufe sui mûrs dal bagn e daspò dâ di blanc par cuvierzi lis taculis di umiditât. Cun di plui, il “lavament vert” al pues lâ indenant tal timp par agnorums e durâ fintremai che i consumadôrs, i citadins e lis organizazions de societât civîl no capissin i trucs daûr di chestis comunicazions ingjanosis. Se invezit nissun al fâs câs, lis impresis a van indenant a fâle francje.
◆ La Union Europeane e à mandât fûr une vore di normis ambientâls. La diretive plui resinte, la 2024/825/UE, cognossude come “Empowering Consumers for the Green Transition”, e je stade publicade ai 6 di Març dal 2024 e e sarà operative dal 27 di Setembar dal 2026 indenant. L’obietîf al è chel di insaldâ e rinfuarçâ lis normativis za in vore e obleâ lis aziendis a jessi plui coretis tes lôr declarazions ambientâls.
◆ Din un cuc a www.eur-lex.europa.eu e www.europarl.europa.eu par fâsi une idee dal significât di cualchi etichete ecologjiche. In zonte aes cognossudis “EcolabelUE”, “Fairtrade”, “FSC” e altris innomenadis, al sarà miôr tignî di voli ancje www.ecolabelindex.com.
◆ In gjenerâl, stin atents aes frasis che no àn sostance e che a son dome fum tai voi, tant che: “I nestris furnidôrs a rispietin le nature”, “O sin simpri plui sostignibii”, “O vin calcolât cetant che o incuinìn”, “O compensìn lis nestris emissions di CO2” e cussì indenant.
◆ Par lâ a fonts, cjapìn il telefonin che al è simpri a puartade di man, informìnsi e, se no sin convints, lassìn pierdi di cuistâ.
◆ Tignint ancje cont che la cuistion dal “lavament vert” si sta slargjant ae politiche e ai guviers, la regule e reste simpri chê di stâ in vuaite. Par altri, in cualchi câs, l’intric al è dabon preocupant.
Fra lis gnovis straviantis, lis cjacaris su la sostignibilitât, la tindince, magari cussì no, ae polarizazion pro o cuintri la tutele di clime e dal ambient, vuê o sin obleâts a restâ informâts par capî, pal miôr vivi nestri e di chei che a vignaran dopo noaltris, e ancje par no fâsi cjoli vie! ❚