In Friûl si alce il sipari su lis “lenghis” cence stât

Par une setemane, dai 23 di Otubar, il Friûl al deventarà il centri di gravitazion par ducj chei che in Europe a lavorin suntun palc cu lis lenghis minorizadis. E va in sene la prime edizion di “Lenghis – Festival dal Teatri des Lenghis Minoritariis”, inmaneât dal Teatri Stabil Furlan a Gurize tal an di Go!2025 cuntun program di gale che al metarà a confront i operadôrs e i lôr lengaçs di espression.
◆ Disevot spetacui, vot compagniis e passe trente artiscj di cinc paîs: Italie, Slovenie, Cravuazie, Olande e Spagne. A montaran sul palc cetantis lenghis: furlan, sart, frison, catalan, albanês ma ancje talian e sloven, come lenghis des comunitâts di confin slovene e taliane. E la anteprime, a Nova Gorica, e viôt insuazade tal discors ancje la fevele grecaniche, doprade in Pulie e in Calabrie.
◆ Dopo la biele aventure di “Suns”, che di tancj agns al puarte il Friûl un concentrât de musiche plui inovative des minorancis europeanis, la mission di agregâ lis lenghis cence Stât che a àn voie di resisti e persisti traviers la art e la bielece e fâs un pas in plui: la valence dal calendari metût in pîts dal diretôr dal Tsf Massimo Somaglino e je pardabon straordenarie, parcè che no si limite a proponi spetacui ma ju cree, traviers laboratoris che a metin insiemi int di cà e di là dai confins.
◆ A saran trê i laboratoris tignûts di mestris di nivel internazionâl (Claudio De Maglio, Davide Carnevali e Ivor Martinić), e a saran ancje 16 incuintris di aprofondiment su esperiencis di “mise en scene” e di traduzion vierts al public. “Laboratoris e incuintris a son la vere anime di un festival come chest – al spieghe il diretôr – parcè che Gurizia e il Friûl intîr a son simpri stâts une farie di dialic e viertidure viers di che altris, di scambi linguistic e artistic”.
◆ Par chei che a vuelin un detai dai spetacui: ai 24 di Otubar al vierç “Ce crodistu di fâ” (frison-furlan), ai 26 “Drugačen svet /Un altri mont” (furlan-sloven), ai 27 “Istorias” (sart logudorês), ai 29 “L’Empestat/Il burlaç” (catalan). E un dei esperiments plui interessants al è par sigûr “Meet a mestri”, che cul messedâ furlan e inglês al invide a scoltâ artiscj che a contin la lôr vite e lis lôr ideis su la art e su cemût che a àn sielzût di esprimilis, a nivel linguistic e no dome.
◆ A saran ancje dôs cunvignis: ai 24 di Otubar te Sale Riva Piazzutta e je in program a partî des 6 di sere la Assemblee dai autôrs e des autoris pal teatri furlan, par metisi in scolte des ideis e des dibisugnis dai protagoniscj dal teatri in Friûl. Un apuntament che al è realizât cul jutori di Matearium, associazion di ponte rispiet ae inovazion teatrâl. Ai 28 aes 11 a buinore invezit si resonarà al Auditorium de Culture Furlane su cemût “SA-VOLT”, intun incuintri su “La traduzion pal teatri ta lis lenghis piçulis”: a saran a confront dramaturcs e tradutôrs come Gabriele Zanello, Elisa Copetti, Axel Zanella, Davide Carnevali, Ivor Martiniç, Federico Scarpin, PierPaolo Piludu, Serena Fogolini, Jos Thie.
◆ Sìn sigûrs che chest festival al varà il bon acet che al merite. Parcè che al mostre chê muse che il musicolic american Alan Lomax al veve ricognossude agnorums indaûr che Somaglino al vûl cjapâ come pont di riferiment: “Il Friûl e je la tiere de polifonie, des vôs viertis, licuidis, che a van lontan, messedadis intune dolce armonie e intune secuence di acuardis che i talians plui a sud no capissin, e soredut e je la tiere là che a rivin lis influencis de Europe dal nort”. ❚