Un sium che al devente realtât. Viodi personis cun disabilitât e normodotadis che a fasin garis insiemi inta la aghe di une pissine, intune competizion mondiâl, e je stade une sodisfazion grande par Massimiliano Popaiz, che al à scomençât come tecnic e anime de societât Pinna Sub San Vito e che vuê al è president regjonâl dal comitât de FIPSAS FVG e tecnic a nivel nazionâl talian. Propit la nazionâl taliane di Apnee, vuidade dal furlan di San Vît dal Tiliment e dal so coleghe Marco Giachino, pe prime volte e à partecipât ai Zûcs Mondiâi 2025, la preseade manifestazion sportive internazionâl che e ten dongje atletis che a rivin di dut il mont, par competi in dissiplinis che no si cjatin intal program olimpic, ma che purpûr a son ricognossudis dal CIO, il Comitât Olimpic Internazionâl.
La edizion di chest an dai “World Games” e restarà pardabon inte storie, parcè che la selezion dai “Azzurri”, ducj ae prime partecipazion, e à puartât a cjase sîs medais, un risultât di no crodi.
_
Massimiliano Popaiz: tornâts indaûr de Cine, ce sensazions vêso?
“No pues platâ la mê sodisfazion come alenadôr de rapresentative paraolimpiche, e ancje tant che comissari internazionâl. Lavorant cul coleghe Marco Giachino o vin viodût la fin di un lavôr cetant lunc di preparazion a cheste presince de Italie ai World Games. O savevin di jessi une vore fuarts: la dissipline de Apnee paraolimpiche e je nassude juste al Pinna Sub di San Vît dal Tiliment. Intai agns o sin rivâts a meti adun manifestazions di nivel, campionâts talians e mondiâi, duncje o vevin esperience. Dut câs, rivâ a vinci intune competizion cussì al è un sium che al devente realtât”.
_
World Games: ce vuelial dî?
“Une manifestazion di nivel mondiâl, come che al dîs il non, indulà che si cjatin atletis che a rivin di 135 Stâts dal mont, par partecipâ in 35 dissiplinis sportivis diviersis che no son tal program dai Zûcs olimpics. Te scuadre taliane di apnee o vevin vot atletis e o sin une vore braurôs dai risultâts. Al è stât un onôr e un plasê jessi là cun i nestri atletis, insiemi cun Marco Giachino”.
_
Si puedial dî che o vês fate la storie par cheste dissipline tant particolâr?
“Chest an, pe prime volte, o sin rivâts a meti adun une clape di atletis une vore fuarts par jessi competitîfs intes garis di apnee e o vin lassât un segnâl indelebil. Sîs medais, dôs di aur, dôs di arint e dôs di bronç a vuelin dî scrivi pardabon une pagjine di storie dal sport paraolimpic talian in aghe. Talent, çucje, inzen, determinazion, spirt di scuadre: par jessi stade la prime partecipazion, miôr di cussì no si podeve fâ. E mi plâs ancje dîi graciis ae organizazion dal event parcè che, biadelore, e à viert aes dissiplinis de apnee e de apnee paraolimpiche”.
_
Une peraule su la medaie di arint di Katia Aere, furlane di Spilimberc?
“Un spetacul! E à fat viodi un spirt di no crodi. Sul podi, dongje de sô compagne di scuadre, Ilenia Colanero, che e rive dal Abruç: a àn comovût dute la int in tribune. Cheste dissipline de apnee e je nassude propit a San Vît dal Tiliment, inte pissine di Prodolon, indulà che o fasin dute la ativitât di base. Propit par chest, o savevin di jessi fuarts, dut câs, i cinês si son alenâts une vore ben, massime parcè che a ospitavin i Zûcs, e nus àn dât fîl di stuarzi, cun prestazions di no crodi. Katia e Ilenia a àn mostrât esperience e cun chê a àn fat une vore ben”. ❚
::::::::::::::::::::::::::::::::::::::::::::::::::::::::::::::::::::::
La FIPSAS e je la cuarte Federazion taliane presinte in Cine par numar di medais
Al prin colp, bielzà un sucès preseât pai Azzurri, vuidâts di Popaiz e Giachino: il svant dal president De Sanctis
Ai Zûcs mondiâi che si son davuelts a Chengdu, une metropoli di scuasit 21 milions di abitants, intal mieç de Cine, la scuadre taliane e à puartât a cjase, in dut, 13 medais di aur, 25 di arint e 19 di bronç. Risultâts che a vuelin dî il cuart puest intal medaîr; prime la Cine, cun 36 medais di aur (e 64 in dut), denant de Gjermanie, seconde cun 17 medais di aur (45 in dut) e Ucraine, tierce cun 16 medais di aur (44 in dut). I atletis talians a son stâts bogns di montâ sul scagn plui voltis di Gjermanie e Ucraine, cundut che i todescs e i ucrains a àn vinçût plui garis.
◆ Inte scuadre taliane, la selezion de Fipsas, la Federazion taliane di pescje sportive e ativitâts sot da la aghe, ancje se ae sô prime partecipazion ai Zûcs, e à concuistât sîs medais in dut. Il secont miôr risultât par une federazion taliane, daûr dome ae scuadre de Federazion taliane di nadâ e salvament, prime cun 17 medais in dut.
◆ Cjalant i singui, pe Italie, Alessandro Cianfoni e Ilenia Colanero (cul record mondiâl) a àn vinçût l’aur, Katia Aere e Marta Pozzi un arint e un bronç e Fabrizio Pagani il bronç.
◆”Un svant, no dome pe FIPSAS: si pues fevelâ di un travuart di no crodi par dut il moviment sportîf talian”, al à comentât il president dal Comitât Paraolimpic talian Marco Giunio De Sanctis. ❚
:::::::::::::::::::::::::::::::::::::::::::::::::::::::::::::::::::::::::::::::
Pinna Sub San Vito: un sucès metût adun in Friûl
In plui di 25 agns di ativitât, il sodalizi di San Vît al è deventât un pont di riferiment pes dissiplinis acuatichis e inclusivis
La associazion Pinna Sub di San Vît dal Tiliment e je nassude ai 20 di Març dal 1998 cul obietîf di lavorâ intal setôr dal nadâ cu lis pinis, ven a stâi nadâ cu lis alis di natazion e intal nadâ subacui. La cjase e je la pissine di Prodolon, dongje dal cjamp di balon. A son plui di 100 i atletis, fra i 9 e i 70 agns di etât, che a fasin garis a ducj i nivei, sot dai colôrs dal sodalizi sanvidot. Une part cetant impuartante le à la scuadre di “Pinnato” cun 25 atletis cun disabilitâts.
◆ Intal 2012 la Pinna Sub e à metût adun il prin campionât talian di “nuoto pinnato” par personis cun disabilitât. Intal 2015 e je rivade la prime edizion di “Ori e Valori”, cun cetantis ativitâts peadis ae inclusion e al sport paraolimpic. Il sodalizi al è pardabon un pont di riferiment par ducj chei che, di ca e di là da la Aghe, a vuelin nadâ, e une placefuarte pes ativitâts inclusivis. ❚
