Mario Mascagni e il so periodi udinês. Un libri al conte la sô esperience in Friûl

Al è jessût di pôc un libri che al conte dal periodi udinês di Mario Mascagni, cusin dal plui famôs Pietro Mario Mascagni, il pari de “Cavalleria Rusticana”. Si intitule, voltât par furlan: “Mario Mascagni. Vite, Musiche e Direzion”, realizât de Ambima FVG, editât de Nota di Valter Colle e scrit a plui mans: Roberto Calabretto, Marco Somadossi e Luigi Antonini Canterin.
◆ Mario Mascagni al è stât diretôr dal liceu musicâl di Udin, cumò Conservatori Jacopo Tomadini, e al à animât benon la vite musicâl furlane in particolâr cu la gjestion de bande udinese. Nomenât diretôr de Bande e de Scuele di Musiche tal 1910, Mascagni al tache subite une vere e proprie opare di rinovament che e puartarà l’Istitût a pâr cui conservatoris talians. Al potenzie il cuarp dai insegnants, invidant personalitâts come Antonio Ricci pal pianoforte, Enrico Veronesi pal violin e Giuseppe D’Arienzo pai struments a flât. Cun di plui, al met in fuarce ancje il supuart de popolazion, par sburtâ in grant lis iniziativis musicâls, oltri a strenzi amiciziis e colaborazions di significât cun personalitâts come Luigi Garzoni, Giovanni Battista Marzuttini, Piero Pezzè.
◆ Al inaugure parfin une societât orchestrâl intitulade a Giuseppe Verdi, realtât che e tignarà il so prin conciert ai 11 di Avrîl dal 1912 tal teatri Minerva. Al è protagonist ancje te nassite de Societât dai Amîs de Musiche di Udin, tal 1922, associazion une vore ative inmò cumò. Il so larc contribût lu à dât ancje midiant de composizion e de direzion. Tra dutis lis sôs oparis, si ricuarde la “Sinfonie par bande” che e ven tratade dentri dal libri, che al è dividût in cuatri cjapitui plui une prefazion e une introduzion. De espression de culture musicâl popolâr dal timp, ae analisi de sô opare par bande, il libri al trate dal so periodi udinês cjalant la sô opare riformadore e la ativitât didatiche, cun cetantis testemoneancis tant letaris e corispondencis.
◆ Un libri facil di lei e apassionant, che al pues vierzi a gnovis ricercjis, sedi su la esperience furlane di Mario Mascagni, sedi su la dimension de musiche in particolâr bandistiche dilunc la prime part dal Nûfcent, oltri che su la evoluzion dal insegnament de musiche in Friûl a nivel academic e cooperatîf, a traviers la fondazion di societâts, associazions e altris ents di promozion culturâl sul teritori furlan. Un periodi pardabon atîf, ancje se ruvinât de ombre de Prime Vuere Mondiâl che e rindarà il procès evolutîf plui dificil e lent, ma che al à menât a ogni mût a un passaç pardabon significatîf tal orientament dal fâ musiche, a partî di une dimension diletantistiche par rivâ a une cussience professionâl, sedi a nivel didatic che performatîf.
◆ Come che e ripuarte la cuarte di cuviertine: «Chest libri al vûl jessi un piçul omaç a un musicist che al scuen restâ vîf inte memorie de comunitât udinese». E o zontarès furlane. ❚