In curt, il tecnic di Udin al tacarà a insegnâ
il zûc de bale ovâl a Lubiane. Daspò di une vite
di lavôr in Friûl, une biele esperience tal forest
Il confin statâl fra Italie e Slovenie al è “colât” tal 2004 cu la jentrade dai slovens inte Union Europeane. Intal sport, dut câs, lis tradizions talianis e slovenis a son restadis avonde diferentis e, in cetantis suazis, i atletis cu la bandiere blancje, blu e rosse a otegnin risultâts une vore miôr dai lôr coleghis sot dal tricolôr talian. Tal ciclisim, par esempli, in gracie de presince dai portents Tadej Pogacˇar e Primož Roglicˇ soredut. Inte bale tal zei, sante scugne, par vie de stature di nivel mondiâl di Luka Doncˇic´. E ancje inte graduatorie internazionâl dal hockey e de bale a man, par citâ ancje chescj sports, la Slovenie, un paîs cun pôc plui di doi milions di abitants, e je indenant de Italie. Par no fevelâ di schiadôrs di velocitât, saltadôrs, velociscj e schiadôrs di font che a lassin indaûr cetancj talians.
Intal rugby, la Italie e je al decim puest inte graduatorie mondiâl dai oms, cumò dominade dal Sud Afriche. La Slovenie e je fûr dal radar principâl dal rugby, al otantesim puest. Cuntun grant desideri di lâ indenant e di scomençâ la sô cressite, Lubiane e à decidût di clamâ un talian, o miôr, un furlan, che al à dât un contribût decisîf par fâ lâ indenant il sport in Friûl tal gnûf mileni: Davide Macor.
Natîf di Udin, al à dedicât la sô vite al rugby, lavorant come gjornalist, blogger, comentadôr, organizadôr di events, diretôr sportîf e alenadôr. Al sarà l’alenadôr dal Rugby Klub di Lubiane, une scuadre de capitâl slovene, a partî dal Autun che al ven. Insiemi cun Cesare Zambelli, al vuidarà la scuadre di zovins locâi, cun chê di otignî risultâts significatîfs.
_
Davide, cemût ise rivade la oportunitât di alenâ in Slovenie?
“Cualchi timp indaûr, in cualitât di conseîr de Federazion dal Rugby dal Friûl-Vignesie Julie, mi soi cjatât intune riunion par discuti di colaborazion fra i doi comitâts, par tirâ dongje i slovens sot dai 16 agns intes struturis furlanis, che a son un tic plui indenant. Mi soi declarât subit disponibil pal rûl, ancje se o ai domandât un tic di timp, parcè che, cun cetante sodisfazion, o jeri ocupât a Pasian di Prât”.
_
La esperience a Pasian e jere finide cuntune promozion in Serie C1…
“O ai un leam fuart cun Pasian di Prât. In cuatri agns o vin vinçût doi campionâts. Al è stât une vore dificil cjapâ la decision di lassâ chel puest. Dut câs, mi plasin lis sfidis e mi plâs metimi in prove. Alenâ une scuadre cuntun obietîf clâr e il desideri di cressi intun contest internazionâl al è un ambient indulà che no ai mai mai lavorât. Mi à cjapât la oportunitât di vignî sù come alenadôr intun paîs diferent dal gno, lavorant in sinergjie cu la Federazion. Cuasi ducj i zuiadôrs de scuadre nazionâl a zuin te scuadre di Lubiane e il moviment al vûl rivâ a cressi tocjant i nivei plui alts pussibii”.
_
Davide Macor nol sarà bessôl: cun lui ancje un altri furlan, Cesare Zambelli, copari di simpri.
“Si, Cesare al sarà cun me e al varà di alenâ chel che par talian si clame “pacchetto di mischia”, une ativitât tatiche specifiche tal cjamp di rugby. Insiemi cun lui o vin tirât sù cetantis ativitâts in Friûl: il “beach rugby” sul savalon di Lignan, il “snow rugby” su la nêf a Tarvis. Si cognossìn di agns e mi fâs plasè che al sedi ancje lui a Lubiane”.
_
In ce lenghe fevelarâstu?
“O fevelarai massime par inglês. Dut câs, o scugnarai passâ un esam di lenghe slovene, par lâ indenant intal timp. O ai bielzà tacât a studiâ un tic e o ai voie di jessi pront prin che o pues”.
__
Daspò tancj agns di bale ovâl in Friûl, cumò ce sensazion ise lâ in Slovenie, di là dal clap?
“A cjase mê o ai fat dut, in ducj i ambits dal rugby, di zuiadôr a tecnic, di dirigjent a gjornalist. O larai indenant cui miei impegns professionâi, massime chei di gjornalist e organizadôr di events. Dut câs, mi sint une vore pront par une gnove sfide”. ❚
:::::::::::::::::::::::::::::::::::::::::::::::::::::::::::::::::::::::::::::::::
Tantis versions di un zûc
che al entusiasme
une vore di apassionâts
Un sport che al favorìs socializazion
e integrazion fra i plui zovins
Il rugby al è une des ativitâts sportivis di scuadre cun plui specialitâts. L’origjinâl al è la version cun cuindis zuiadôrs, nassude dusinte agns indaûr. Daspò, a son vignudis fûr lis variantis dal rugby a 13, dal rugby a 9 (intindude come modifiche de version a 13) e a 7. E a esistin ancje regulis diviersis par ogni variante. Al esist ancje un Rugby a dîs, ma nol è tant svilupât.
◆ Intai ultins agns, si viodin ancje specialitâts come il Beach Rugby, che si zuie intal savalon, e il Touch Rugby, ven a stâi une ativitât di rugby a 13 cence contat fra i zuiadôrs.
◆ Propit Macor e Zambelli si son inventâts ancje il Snow Rugby, che si zuie su la nêf. Tal mês di Zenâr, a Tarvis, un torneu di bale ovâl su la nêf al è un dai moments plui spetacolârs che si pues gjoldi par ducj i apassionâts.
◆ Il denominadôr comun di dutis lis variantis dal rugby e je la bale ovâl, adun cu la imposizion di jessi simpri daûr de bale. Si scuen passâ la bale dome indaûr: ven a stâi che si pues vinci dome cuntun sfuarç di scuadre.
◆ Cun di plui, i “minirugby”, la ativitât che a zuin i fruts fin ai 12 agns, al favorìs la socializazion e la integrazion dai zovins, parcè che al lasse zuiâ, in scuadris misturadis, fruts e frutis. ❚
:::::::::::::::::::::::::::::::::::::::::::::::::::::::::::::::::::::::::::::
UN MOVIMENT SPORTÎF REGJONÂL CHE AL SBURTE
PAR VIGNÎ A FLÔR
Vincjedôs societâts e cualchi biele rivalitât, cuinçade cuntune biele culture di condivision di cheste ativitât sportive par ducj
Intal Friûl-Vignesie Julie a son vincjedôs societâts che a puartin indenant il rugby. Intal ultin an a risultavin afiliadis sîs sodalizis cuntune prime scuadre di oms a nivel senior e cinc cuntune prime scuadre femenine.
◆ Dîs des vincjedoi a son dal teritori udinês: Alp Rugby Tarvis, Juvenilia Bagnarie, Black Ducks di Glemone, il Forum Julii Rugby, l’Ali Rugby Udin, l’Hungry Bears Rugby Udin (che al zuie dome inte categorie Old e Touch Rugby), l’Over Bug Line di Codroip, il Rugby di Pagnà, il Rugby Udin e la scuadre di Pasian di Prât, dulà che al jere atîf Davide Macor.
◆ Trê a son lis societâts di Gurize: il Gorizia Rugby, il Rugby Club di Monfalcon e il Fogliano Rugby. A Pordenon la bale ovâl e je une vore praticade: o vin il Pedemontana Livenza di Polcenic, il San Vît dal Tiliment, il Rugby Sile di Sant Andree di Pasian, il Manià Rugby Club, il Rugby Pordenon, il Rugby di Fontanefrede e il Tiezzo Rugby di Daçan.
◆ Un tic di mancul a Triest, ancje se ator dal cuel di Sant Just a son dôs societâts cun tante voie di lâ indenant: Rugby Educativo Propaganda e Venjulia Rugby.
◆ Par culture, il rugby al è simpri stât une ativitât sportive par ducj, indulà che la part sportive e di competizion e cjamine par man cul rispiet e la condivision dal divertiment, prime e massime dopo lis partidis. Il famôs “tierç timp”, che cumò cuasi ducj i sport a cirin di vivi, al è une situazion nassude tai cjamps di rugby.
◆ A nivel di prime scuadre, forsit il Rugby Udin al è chel che al à la storie plui impuartante. Chest an a àn zuiât in serie B e, cuntune gnove clape di dirigjents, il progjet al à chê di tornâ in serie A. Cun di plui, Alessandro Zanni, par agns cjapitani de Nazionâl taliane e tierç zuiadôr talian cun plui presincis cu la maiute dai “Azzurri” (118, il secont, daûr di Sergio Parisse e Martin Castrogiovanni), al ven fûr juste di Udin: al tacà cu la Leonorso. Dut câs, massime a nivel di campionâts dai zovins, a son une vore di rivalitâts fra lis societâts che a lavorin une vore ben cui frututs e i under. Il miôr mût par tirâ sù gjenerazions di zuiadôrs di bon nivel.
◆ Il Pasian di Prât Rugby al è rivât a concuistâ risultâts une vore preseâts sedi cu la prime scuadre, sot dal alenadôr Davide Macor, sedi cul setôr dai zovins, masculin e feminin, contant ancje il minirugby. Un moviment cetant positîf che al continuarà a apassionâ ancje intai agns che a vegnin in graciis de bale ovâl. ❚
