Sfuei Mensîl Furlan Indipendent
Archivi de Patrie

LA INTERVISTE – Dino Zoff: «O vin lidrîs buinis, o vin di tignîlis di cont»

Christian Romanini
Dino Zoff al conte, che nol à mai dismenteât lis sôs lidrîs e i valôrs.

Cuant che si fevele di Dino Zoff e ven simpri iniment la sô espression suturne e impassibile, di cuant che al jere zuiadôr fint a lis sôs presincis a la vuide di impuartantis formazions di balon. Cjapant in man il telefon par clamâlu, la man no jere propit ferme par vie di un ciert sens di sogjezion. Ma la prime rispueste che al à dât a pene che i vin domandât se al veve timp par cualchi domande al è stât un confidenziâl e convint «Sigûr!», presentantsi subit come une persone disponibile e par diviersis voltis ancje pronte a la batude, massime ricuardant i episodis plui personâi sedi in cjamp sedi fûr. Partît di zovin dal Friûl, maridât cun Annamaria di Mantue, nol à mai dismenteât lis sôs lidrîs e i valôrs che lu lein ancjemò a la nestre tiere: serietât e concretece a son lis sôs peraulis di ordin.
Vivial a Rome aromai stabil?
Sì, aromai la mê vite e je chi ancje se o torni 3 o 4 voltis par an a Marian, il gno paîs dulà che o ai ancjemò la cjase.
Si cjatial cun altris siei coleghis furlans?
Sì, ancje se in dì di vuê no son plui tancj zuiadôrs come cuant che o zuiavi jo. Cumò al è Reja, l’alenadôr de Lazio… sperìn di viodisi a pene che al finìs i impegns di campionât.
Fevelaiso par furlan tra di voaltris?
Si capìs: tra noaltris furlans si fevelave simpri par furlan, no stin a scherçâ. Però come che o disevi, magari cussì no, cumò no sin tancj tal balon di serie A. Agns indaûr ogni scuadre a ‘nt veve 3 o 4 di lôr, ma no je plui come une volte.

width="198"
Bearzot al fevelave cun me par furlan dome dal Friûl e dal nestri privât.

Ancje cun Bearzot fevelavial par furlan?
Sì, ancje se lui al fevelave cun me par furlan dome dal Friûl e dal nestri privât. Nol à mai doprât la lenghe furlane par no fâsi capî dal rest de scuadre: al è simpri stât clâr.
Parcè vuê sono cussì pôcs i zuiadôrs furlans in serie A?
Secont me parcè che a son mancul fruts. E chei che a son a àn tancj altris sports e duncje a son plui sparniçâts un pôc par dut. Cun di plui, probabilmentri no je plui chê voie di vignî fûr, il spirt di sacrifici parcè che cumò a stan ducj ben e a cjapin la vite in maniere difarente. Forsit e mancje ancje la «fam di deventâ cualchidun».
Ma duncje il caratar dai furlans isal gambiât?
(Zoff al fâs une ridade) I furlans a restin un popul di lavoradôrs che cence fâ tante confusion a van indevant cun serietât, cun misure, cence fevelâ di bant.
E un difiet?
Tai ultins timps o stin deventant un pôc talians. (e al fâs une altre riduçade)
Invezit la scuele dai alenadôrs e je metude miôr (tacant di Bearzot, Fedele, Del Neri, Capello, Reja…). Parcè?
Parcè che i furlans a son int concrete, che no si fâs cjapâ mâl par un risultât negatîf. A van indevant cui pîts par tiere. Cualchidun al dîs che o sin sierâts, ma nol è just: chel al è un stereotip. Magari o sin plui risiervâts, ma chest nol vûl dî jessi isolâts: o savìn vivi cun ducj chei altris, ma cun serietât, stant al pas cui timps che a gambiin. E chest al zove se tu âs di tignî dongje un grup di zovins intune scuadre.

width="300"
Il «cucchiaio» di Totti ai campionâts Euro2000 in Belgjiche.

Fevelant de Sô esperience come alenadôr de Italie, ce aial pensât cuant che in finâl Totti al à fat il «tîr de sedon» (semifinâl vinçude cui rigôrs cuintri de Olande tai campionâts Euro2000 in Belgjiche e Paîs bas, ndr): Lui in panchine al è restât impassibil, ma dentri ce aial pensât?
Nuie: par me se un al fâs un gôl cuntun rigôr al pues tirâlu di plat, cul «cucchiaio», di ponte… baste che e vadi dentri.
Totti di resint al è stât protagonist di un brut episodi (fal di espulsion su Balotelli te finâl di Cope Italie Rome-Inter, ndr)?
Atenzion, chi si à di jessi une vore clârs: cuant che si zuie di balon al è agonisim, scuintri fisic… no si zuie di biliart e di conseguence ogni tant cualchidun al è frustrât parcè che nol rive a fâ ce che al volarès o parcè che il diretôr di gare no i sivile ce che al varès di sivilâi… Alore il zuiadôr al piert il control e al reagjìs fasint ce che no si à di fâ… A son robis che a capitin ancje se no varessin. La espulsion di Totti e je stade juste: i àn pûr dât 4 zornadis di scualifiche… Un nol varès di pierdi mai il cjâf, ma ogni tant al sucêt e no si à di scandalizâsi tirant in bal la «etiche dal sport»… Cuant tu âs un rapuart agonistic cul aversari ogni tant il nervôs ti ven.
Ce i varessial dit se al fos stât un So zuiadôr?
Jo i varès dit che un campion nol pues sbassâsi a chei nivei e che ciertis reazions no son robis di fâ. Massime par un zuiadôr come che al è lui.
Lui al à lassade la vuide de Italie par cause des declarazions di Berlusconi dopo de sconfite cu la Francie a Euro2000… i vadial di fevelâ di chel episodi?
Jo no ai acetât chês declarazions parcè che mi à dit che o jeri une persone no degne di alenâ la Italie, acusantmi di jessi un diletant. Dopo, Berlusconi al è stât avonde furbut tal spostâ il discors su la marcjadure o no di Zidane, ma nol jere chel il pont: a mi no mi interesse se un mi critiche lis sieltis tecnichis parcè che tal balon no soi un integralist. O aceti cuant che une persone e dîs la sô opinion sul zûc e no mi scandalizi par chel. Ma ta chê ocasion al à dopradis peraulis pesantis stant che al à metût in discussion la mê dignitât: mi à tratât come se o fos un fûr di cjâf.
Un pronostic pai Mondiâi in Sudafriche: ce fasie la Italie?
O pensi che al sedi dificil vinci: o viôt miôr Brasîl, Ingletiere, Spagne… a son dutis scuadris fuartonis. O pensi che la Italie e podarà dî la sô, ancje se mi somee dure che e rivedi a puartâ a cjase la Cope dal Mont.
Tra lis favoridis al nomene la Ingletiere di Fabio Capello…
Sì, o pensi che e sedi une scuadre ben metude, se a stan ben: no stin a dismenteâ che lôr a àn un campionât durissim, ma a puedin fâ biele figure.
Une sorprese cheste esperience di un furlan che al va a alenâ intun Stât forest?
Par nuie: Capello al è brâf e al lavore cun serietât. Nol è di smaraveâsi che i vedin dât bon acet e che al sedi stimât. Nol podeve no fâ ben.
Fasìn un non: cui vincial?
Il Brasîl.
Se i proponessin di alenâ une selezion di zuiadôrs furlans, acetaressial?
La idee mi plasarès, ma cumò e mancje «materie prime»: i zuiadôrs furlans cumò a son ducj vecjos (al rît inmò) e i zovins no son: no rivaressin a fâ une nazionâl furlane.
Nus fasial un coment su la anade dal Udin?
Jo o pensavi tant miôr. Mi somee une buine scuadre e no sai cualis che a son lis motivazion di une anade cussì. Potenzialitâts devant a son, ma e à cjapât masse gôi e no mi spietavi che e ves vût di penâ tant.
Te ultime partide in cjase, il public al à saludât il tecnic Marino cun tant afiet. No je vere che i furlans no son calorôs…
I furlans a son ancje int un tic strane ogni tant: se magari o jeri jo tal puest di Marino probabilmentri no mi batevin lis mans ni si alçavin in pîts… Cualchi volte a son plui calorôs cun chei che a vegni di difûr.
Ce sintial un furlan a zuiâ cu la maie dal Udin?
Jo o soi rivât a Udin une vore zovin e o soi stât ben: o rivavi dal paîs, de promozion. Ma no ai biei ricuarts a nivel sportîf. O ai tacât cui zovins e te stagjon 61-62 o ai fat lis ultimis 4 partidis in serie A: la prime o vin cjapât 5 gôi cu la Fiorentine, ancje se no jere propit tant colpe mê. Purtrop o ai fat un brut campionât in B l’an dopo… Cumò mi ven di ridi, ma mi clamavin «Zoff come zuf» e nol jere dal sigûr un compliment… (al rît ancjemò)
Par me e je stade une biele emozion meti sù la maie de scuadre plui impuartante de mê tiere, ma purtrop e je lade mâl e no mi àn batût tant lis mans… (al rît ancjemò)
Parcè ancje tal Udin no sono zovins furlans?
Parcè che l’Udin al è deventât une scuadre internazionâl e al va a cirî zuiadôrs ancje fûr, fasintlu une vore ben, spindint ancje di mancul: la globalizazion e je rivade tal mont dal balon e ancje a Udin, come par chês altris grandis scuadris. Ma no pensi che i zuiadôrs forescj a sedin un probleme: se un zovin furlan al merte, al ven fûr. La vere cuistion, come che si diseve prime, e je che i zovins furlans che a zuin di balon a son pôcs, al è un probleme di fonde.
Pozzo lu aial mai cirût par proponi di alenâ l’Udin?
No, no.
Ce rispuindiaressial se e rivàs chê telefonade?
Se no je rivade prime, vuelial che e rivi cumò che o soi vecjo?…
Insome «vecjo»?… che nol stedi a butâsi vie cussì…
(al riduce un tic, ma dopo al torne suturni sul discors) Dut câs, bisugne viodi… se nol è sucedût prime… no mi plâs fevelâ di chestis robis ca sui «se» e sui «ma»…
Ce pensial dal gjornalisim in lenghe furlane?
Su la tutele dal furlan, jo o soi favurevul: ancje parcè cuant che tai agns 50-60 o soi rivât a Udin, buine part de borghesie e jere di chei dal «cosa ghelo?… cosa gastu?»… Ma jo i ai simpri tignût al furlan, o vin di jessi braurôs de nestre identitât parcè cu la globalizazion al è il pericul di pierdile. Mi fâs tant plasê che al sedi un gjornâl come il vuestri, che o lei di gust, parcè che o torni a lis mês origjins. Si à di continuâ a puartâ indevant la lenghe furlane parcè o vin di difindi lis nestris lidrîs, e parcè che, disìnse dute (la vôs di Dino Zoff si scjalde marcant une volte di plui trop che inmò al sint il leam cul Friûl), a son lidrîs buinis e o vin di tignîlis di cont. No vin di vê pôre a fâlis insedâ ancje cun chei altris, ancje se nol è facil!
Isal favorevul al insegnament dal furlan a scuele?
O pensi che ancje pai fruts, dongje di chês altris lenghis, al sarès ben cognossi ancje il furlan.

width="300"
Bruno Pizzul organizatôr a Cormons de fieste dai 50 agns di «Tutto il calcio minuto per minuto».

Prin di saludâsi, Dino Zoff nus fâs un invît…
Us spieti ducj a Cormons ai 28 e 29 di Mai pe fieste dai 50 agns di «Tutto il calcio minuto per minuto», al è Bruno Pizzul che al à organizât un biel event.
(E noaltris che o sin stâts o podìn confermâ che lis peraulis di Dino Zoff no son stadis di bant.)
Christian Romanini

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +