E nas la sezion distacade de Pugjilistiche Udinese. Gianni Stroppolo e Stefano Parise a son ae vuide de scuele di boxe. Intal mês di Lui
e torne une riunion cun atletis di nivel alt
Almancul fin ai agns Sessante, il pugjilât, cul ciclisim, al jere le dissipline sportive plui preseade dai talians. In tancj, o massime chei che a rivavin, a cjatavin in chest sport un mût par scjampâ de miserie e dal lavôr intai cjamps. A Tor di Zuin, un paîs tornât a fâ sù gnûf fra la fin dai agns Trente e il principi dai Cuarante, chest sport al è stât calcolât daurman un mût par tignî dongje ducj e fâ sbrocâ i zovins che a lavoravin te Snia Viscosa. Za intal 1955, inte place dal paîs, sot dal tor dal municipi, si è tignude une riunion di pugjilât cun cetante int e tancj atletis di bon nivel. Spetacul, fieste e incuintris di bon nivel; pecjât che dut al sedi durât une vore pôc, e il pugjilât a Tor di Zuin al è lât in dismentie ae svelte. La passion di cualchidun, dut câs, no si è mai distudade e, in graciis dal lavôr di zovins tant che che Gianni Stroppolo, che al è nassût e cressût propit a Tor, cumò la boxe e je tornade in paîs. Prime cuntune scuele che e jere une sezion distacade de Pugjilistiche Udinese, e tant che ocasion par tornâ a gjoldi di incuintris di nivel. Prin fra ducj, l’esordi intai professioniscj di Marco Sollero, “il Cret di Paulâr”, ai 12 dal mês di Lui sot sere.
_
Gianni Stroppolo, dopo ducj chescj agns, ce vuelial dî par un om dal Tor podê tornâ a vivi in paîs lis emozions che dome il pugjilât al rive a dâ?
Agns indaûr o ai fate une scomesse cun gno pari, che nol è plui. Mi veve dit che jo no sarès rivât a puartâ il pugjilât a Tor e jo i ai dimostrât che al jere pussibil. Tor di Zuin al è simpri stât un paîs che tu âs di jessi dentri par capîlu e cognossilu. Graciis al sindic Enrico Monticolo, o sin rivâts a meti sù une scuele. Une realtât che o vin pensât jo e Stiefin Parise intal 2017 al Forum di Pordenon, intune sere che al jere sul ring Nicola Ciriani cuintri di Stefano Abatangelo: o vin scrit un program su la cjarte dal formadi tal bar e di là o sin partîts. Fat chel, dopo scomençât pardabon, no si sin plui fermâts.
_
Dal timp di vuere in dì di vuê…
La palestre e je stade vierte dopo 80 agns. A son passâts 70 agns de ultime riunion di pugjilât, che intal 1955 si jere tignude intal teatri, denant de Caffaro. O soi lât a lei i gjornâi di chê volte e o ai cjatât tantis bielis robis. Par dîti une, in chê sere, al è montât sul ring ancje il mestri Remo Venzo. Cuant che mi alenavi a Udin, il mestri mi ricuardave simpri che al veve fat un incuintri a Tor e jo no i crodevi tant: al veve reson lui.
_
Une cumbinazion straordenarie: ai 12 di Lui si batarà, pe prime volte di professionist, Marco Sollero, il “Cret di Paulâr”, forsit il personaç plui impuartant de gnove gjenerazion di atletis furlans tirade sù dal mestri Venzo.
Marco al à dât une vore al pugjilât furlan: intai ultins agns al è simpri lât a un pugn dal titul talian dai diletants. In chê categorie al paiave dificoltâts pe sô altece, dut câs cumò al rivarà a fâ viodi ce che al è bon di fâ. Sperìn che il pas che Sollero al à decidût di fâ, insiemi cul so mestri Gianluca Calligaro, al dedi sodisfazions. E mi fâs cetant plasê che il so prin incuintri di professionist al sedi a Tor.
_
Cemût ise la scuele di Tor di Zuin?
O sin vierts di un an e mieç e o vin vût in palestre sessante di lôr. No son restâts ducj, cualchidun al è vignût dome par curiositât, ma plui di cualchidun si è fermât. I dâts uficiâi a disin che o vin plui o mancul dai cuindis ai vinç atletis ogni volte che la palestre e je vierte, un pâr di voltis par setemane. O vin cualchi agonist: Capone al fasarà il debut propit ai 12 di Lui, e me fie invezit e larà cuintri di une atlete de Cravuazie.
__
Di indulà vegnie fûr la passion di Gianni Stroppolo pal pugjilât?
Dut al è scomençât cuant che o jeri a scuele, a Udin, sul principi dai agns Novante. Intal banc dongje dal gno si sentave Gianluca Calligaro, che daspò al è deventât ancje il gno mestri. In chei timps no rivavi a lâ in palestre a Udin, parcè che o scugnivi cjapâ la coriere par Tor aes sîs sot sere: nissun al rivave a vignî a cjapâmi sù li dal palasport Benedetti dopo de ore di cene. Dopo vude la machine par zirâ di bessôl, o soi tornât dongje dal pugjilât. Pecjât che o jeri bielzà masse vecjo e o ai scugnût tacâ tai amadôrs e no cui agoniscj. Par fortune, la Federazion e à cambiât lis regulis par dâi a Roberto Cammarelle la pussibilitât di lâ ae Olimpiade di Pechin (là che al à vint la medaie di aur, ndr) e o ai vude ancje jo la gno ocasion. A 38 agns o soi rivât a debutâ tai agoniscj e no soi mai lât “cul cûl par tiere”. ❚
:::::::::::::::::::::::::::::::::::::::::::::::::::::::::::::::::::::
INTAL 1955 LA ULTIME RIUNION DI BOXE IN PAÎS
I documents e i gjornâi di chê volte a riferissin di spetacul e tante int intal teatri locâl
La prime e, almancul fin ae metât dal mês di Lui dal 2025, ultime riunion di pugjilât a Tor di Zuin si tignì ai 3 di Otubar dal 1955, suntun ring metût sù intal teatri comunâl.
◆ L’arbitri unic, che al à fat ancje di judiç, al jere il siôr Comar di Triest. Intal prin incuintri, il gurizan Fabroni al batè il bisiac Giacomelli. Intal secont incuintri, il triestin Osvara e il bisiac Battaglini a impatarin. Dopo di lôr, inte sfide fra doi triestins, al vincè Bellini cuintri Sabbatelli. Pate ancje intal cuart incuintri, fra il gurizan Podgornic e il bisiac Castagna. Par cuint al è lât su sul ring Remo Venzo di Udin cuintri il bisiac Collovatti, di Monfalcon. Al è l’incuintri che il mestri Venzo, chel che al à puartât indenant la scuele di Pugjilistiche Udinese fin tal 2000, al ricuardave simpri a Gianni Stroppolo, dopo passâts cetancj agns.
◆ Intai ultins incuintris di chê sere dal 1955 a Tor, Princi, di Gurize, al batè Taccia par KO tecnic e l’udinês Buiese e il bisiac Deffendi a impatarin.
◆ Cuissà se ai 12 di Lui ducj chei che a àn scombatût in chê sere si gjoldaran ancjemò une volte une biele riunion? ❚
::::::::::::::::::::::::::::::::::::::::::::::::::::::::::::::::
L’esordi di Marco Sollero tai professioniscj
La prime volte dal “Cret di Paulâr”: cetante passion e determinazion par inverâ un insium
Dopo 54 incuintris di diletant, cuntun record di 24 vitoriis e 21 sconfitis, Marco Sollero, 27 agns, cressût a Paulâr e trê voltis vice campion talian de categorie élite, al à decidût di lâ a batisi cuintri dai professioniscj.
◆ L’ultin furlan rivât a imponisi pardabon a nivel professionâl al fo Nicola Ciriani, par trê voltis campion talian seguît propit di Gianluca Calligaro, il tecnic che al à vude une biele part ancje intal percors di Gianni Stroppolo e che, cumò, al è l’alenadôr di Sollero.
◆ Marco, che al è clamât di ducj “il Cret di Paulâr” pe sô capacitât di no molâ mai e di jessi une vore dûr, al larà sul ring cuintri dal ongjarês Attila Bernáth. Al sarà un incuintri di pês moscje. La dificoltât di Marco, cuant che al jere diletant, e jere chê di no rivâ a cjatâ aversaris di tressadure compagne.
◆ Dut câs, par dute la determinazion che al à metude par rivâ achì, pe passion e pal impegn che al à dimostrât, lant ogni dì sù e jù de Cjargne a Udin par alenâsi, pe olse di lâ simpri indenant, al à bielzà vinçût la bataie plui impuartante. Cumò al è rivât il moment di gjoldise pardabon. ❚