Minority Safepack, la Cort di Justizie e conferme: la Comission e à fat ben a dî di no

La Cort di Justizie de Union Europeane (UE) e à dât fûr une gnove sentence in cont de sielte de Comission Europeane (CE) di no dâ acet e prospetivis di disvilup aes propuestis di inzornament e di infuartiment de normative de UE che a tocjin la tutele des minorancis, che a jerin stadis fatis indenant cu la Iniziative dai citadins europeans (ICE) Minority SafePack. La decision cjapade de Cort ai 5 di Jugn stâts e va daûr di chê che e veve za dât fûr ai 9 di Novembar dal 2022: i judiçs di Lussemburc a confermin, in maniere definitive, che la rispueste che la CE ur veve dât ai promotôrs de Iniziative, ai 15 di Zenâr dal 2021, e je legjitime.
◆ La posizion uficiâl de CE e jere stade presentade de bande di Věra Jourová, che in chê volte e jere une dai siei vicepresidents, cu lis deleghis specifichis pai valôrs de UE e pe trasparence: lis cuistions fatis indenant – e veve declarât Jourová – a son par sigûr impuartantis pe Union, però nol coventave fâ bon un at juridic di pueste, stant che pe tutele des minorancis, dai dirits linguistics e des lenghis minorizadis «a jerin avonde la normative e lis politichis za in vore».
◆ Cun chê comunicazion la CE ur veve dât une sorte di patafon a passe un milion e tresinte di lôr (ancje se ae fin a jerin stadis fatis buinis dome 1.128.000 firmis) che, in ducj i Stâts membris de UE, a vevin firmât chê che a nivel european, cuntune buine aprossimazion, e je une sorte di propueste di leç di iniziative popolâr. Dopo jessi stade blocade “in partence” de CE ancjemò tal 2013, la ICE Minority SafePack e jere tornade in vore, daûr di une sentence de Cort di Justizie che i veve fat cuintri al prin stop preventîf de Comission, e tra il 2017 e il 2018 a jerin stadis tiradis dongje lis firmis de bande dal comitât promotôr, vuidât de FUEN (Union Federâl des Nazionalitâts de Europe), juste cun chê di domandâ ae UE di indotâsi di une normative specifiche in cont de tutele des minorancis a nivel european. Vie pal 2020 i siei contignûts a jerin stâts frontâts in plui ocasions intai palaçs di Brussels e di Strasburc e fintremai il Parlament European (PE) al veve palesât la sô posizion a pro cuntune Risoluzion fate buine ai 16 di Dicembar di chel an. Al someave che la strade dal Minority SafePack e fos di rive jù e invezit e je lade a finîle intune altre maniere.
◆ Lis dôs sentencis i dan reson ae CE lant daûr di aspiets formâi che a tocjin la normative za in vore intai cjamps de promozion des ativitâts culturâls e de produzion audiovisive e poiantsi sul fat che la UE, tant che istituzion che no fâs part dal Consei de Europe, no pues ni firmâ e ni ratificâ la Cjarte Europeane des Lenghis Regjonâls e duncje no pues lâ daûr des sôs previsions.
◆ Al è clâr che la cuistion no je dome juridiche, ma soredut politiche. Il nivel plui o mancul alt (o bas) de atenzion che a mostrin lis istituzions europeanis in direzion de tutele des minorancis, dai dirits linguistics e dal pluralisim culturâl si pues calcolâlu tant che un spieli de situazion de Europe, dal procès di integrazion e di chês stessis istituzions. Cussì, intune UE là che a contin simpri plui i guviers dai singui Stâts e i nazionalisims dominants e plui in gjenerâl intune Europe là che a ducj i nivei la partecipazion democratiche e va simpri plui al mancul, intant che lis cundizions di vuere e fintremai lis ideologjiis di vuere a cressin simpri di plui, nol è masse spazi pe citadinance ative, pai dirits e pe «unitât inte diversitât».
◆ La gnove sentence de Cort di Justizie e ferme in maniere definitive il Minority SafePack, ma in chel istès e conferme il valôr e la impuartance de mobilitazion dai citadins par fâ sù une Europe che e sedi pardabon di ducj, cemût che a àn marcât, comentant il judizi de Cort, la presidente de Aleance Libare Europeane (ALE), la basche Lorena López de Lacalle Aritzi, e il vicepresident de ALE, il frison Frank de Boer, che al è stât un dai promotôrs e dai redatôrs dal test de ICE. ❚