Biodiversitât – Biodiversità – Biodiversity

Cu la peraule biodiversitât o intindìn la varietât de vite su la tiere: plantis, bestiis, foncs, microorganisims e ancje i ambients naturâi (aghe, aiar, tiere) là che a vivin e i leams che a àn tra di lôr. No si trate però di fâ la conte des speciis, ma di capî il grant ecuilibri che lis ten une dongje di chê altre. Pensìn a un bosc, un prât, un flum: sistemis li che ogni vivent, ancje il plui piçul, al à un parcè. Une grande rêt di fîi ben ingropâts.
◆ La biodiversitât nus da i terens fertii, l’aiar respirabil, la aghe buine di bevi. E regole il clime, e jude a scjampâ cualchi disastri naturâl. E je ancje utile pe nestre salût: tancj principis atîfs des medisinis a vegnin gjavâts fûr des plantis, dai foncs e dai microorganisims.
◆ Ogni specie, fintremai chês invisibilis o che nus somein di soreplui, e à une funzion specifiche e fondamentâl pe nestre sorevivence.
◆ Tal cicli normâl de nature, i insets, cu lis âfs in prime linie, puartant ator il polin, nus dan la pussibilitât di gjoldi di pomis, verduris e grans. I viers a smovin la tiere fasintle respirâ e soredut a tegnin controlâts i parasitis. I boscs, supant anidride carboniche (CO2), a regolin ancje il clime. I flums e lis zonis umidis e torbosis, li che lis aghis dolcis o salmastris si impocin parsore dal teren, a filtrin la aghe che o bevarìn.
◆ O clamìn ecosistemis i ambients li che fisiche e chimiche (temperadure, lûs, ossigjen, aghe, teren) a son simpri in vore cui organisims vivents.
Un ecosisteme al pâr une orchestre che e sune la partidure di une composizion musicâl.
◆ Cjalant ben però la rêt di prime, i fîi che a someavin di spali, a son invezit di sede.
Incuinament, distruzion dai ambients naturâi, sfrutament dai terens, pesticidis doprâts cence masse pensâ, importazion cence control di bestiis e plantis esotichis che a deventin invasivis, cambiament climatic. Tantis cuistions che a metin in pericul un ecuilibri cetant delicât e fragjil.
◆ Ce che al sta sucedint al è che l’ambient al cambie masse di corse pâr rivâ a stâi daûr. La biodiversitât e je invezit stabilitât. E je la uniche strade juste pal nestri vivi. No si trate plui di une ambizion, ma di une cundizion fondamentâl pe salût, pe sigurece e pal benstâ.
◆ Difindile e parâle al vûl dî cjapâsi daurman, e di corse, la responsabilitât pe vite di doman. O sin ancjemò in timp. Tignint ancje presint che o sarìn simpri noaltris che o passarìn a paiâ il cont!
◆ La responsabilitât e je di ducj, ma ognidun al à di fâ il so.
Doprâ la aghe dome par ce che al è necessari. Fâ di mancul di cetantis sostancis chimichis. Plantâ rosis e rosutis che a clamìn âfs. Lassâ almancul un toc salvadi tal nestri zardin tant ben seât. Plantâ mancul, o nuie dal dut, plantis esotichis. No comprâ cjar e pes che a vegnin dai arlevaments intensîfs. Doprâ savons comuns e no chei antibaterics. Informâsi soredut prin di cjapâ decisions in merit. La plui piçule sielte positive di ognidun di noaltris, ripetude di tantis personis, e puarte ben a ducj.
◆ Protezi la biodiversitât no je plui nome une cuistion ambientâl; al è un afâr seri e di sintiment. ❚